БЮДЖЕТКЕ ПОЛҒАН НА АХЧА ТУЗАЛЫҒ
16.03.2018
Хабарлар
Ӧӧркі Чӧп. Теестегі чыылығда президиум сессияа сығарылар нинҷе-де сурығнаң танысхан.
Комиссия паза комитет кнестері республика парламентінің кнезі Владимир Штыгашевтің устаанынаң ікі закон проектінең, Хакасияда пала праволарынҷа уполномоченнай Ирина Аульның, идінҷектер праволарын арачылирынҷа уполномоченнай Василий Кудашкиннің 2017 чылдағы тоғыс салтарларынҷа сан пирістерінең танысханнар. Ідӧк президиум кізілері Татарстанның Хазна Чӧбінің Россия правительство кнезі Дмитрий Медведевсер сӱт ас-тамаа рыногындағы киректерҷе айланызына хабазарға чаратхан.
Хакасияның Ӧӧркі Чӧп кнезінің орынҷызы, бюджетче паза налогча комитет кнезі Сергей Комаров «Ойын бизнезіне налогтаңар» Хакасияның законынзар алызығлар кирердеңер» закон проектінең таныстырған. Алызығлар федеральнай законға килістіре кирілчелер. Аны хоостыра налог ставкалары иң пӧзік синде турғызылар. Ойын бизнезіне ӧӧнінде букмекер конторалары кірче, хайзылары утхан ахчаа налог тӧлепчелер. Закон проектінде ідӧк Интернет пастыра, спорт ойыннарының салтарларына турғызып, ахча утчатханнарға налог кӧрілче. 2017 чылда ойын бизнезінең республика бюджедінзер 440 муң азыра салковай кірген полза, алызығлар кирілген соонаң ікі хати кӧп налог кіреріне ізеніс пар. Сидік оңдайларда бюджетке полған на ахча тузалығ полар.
Хакасияда пала праволарынҷа уполномоченнай Ирина Ауль 2017 чылдағы тоғыс салтарларынҷа сан пирізінде чуртастың сидік оңдайларына кірген олғаннарның праволары сайбалчатханына паза хайди толдырылчатханына хайығ айландырған. Аның кӧрізінең, чуртастың сидік оңдайларына кір парған олғаннарға, хайзыларын ибде дее, школада даа иреелепчелер, психологтың паза психотерапевттің полызии киректелче, че имнег тураларында даа, школаларда даа пу специалисттер чидіспинче.
Ирина Аульның искіриинең, ӧкіс олғаннарның чуртха праволарын толдырарына ахча асхынах пирілче. Чылда 200 азыра ла чурт алылча, теесте, тізең, 2000 азыра пала турча, оларның 41% 23 час толдыр салған. Постаң оол-хыстарның піреезі сӧбіреліг дее, че пос чурты чох. Владимир Штыгашев пу кӧстеге хоза ахча пирерінҷе республика правительствозынан хада тоғыныбызарға чӧп пирген.
Хакасияда идінҷектер праволарын арачылирынҷа уполномоченнай Василий Кудашкин сан пирізіндегі ӧӧн сурығларны адап пирген: айланыстарның ӱзӱрии, чылдырылбинчатхан ис-пайға кадастр паазы, налог льготалары хыйа алылғанының, хазна хабазии хызырылғанынын теелізі. Толдыразынаң сан пиріс 70 азыра страницада тимнелтір. Василий Кудашкин чағынғы сессияда аны сала алғыда чарыт пирер.
Пӱӱнгі кӱнде сӱт ас-тамаа рыногы аал хониинаң на айғасчатханнарны сағыссыратпинча, чуртағҷылар даа, садығ тураларындағы сӱт ас-тамаан кӧріп, хазыхтарына сағыссырапчалар. Сӱт алчатсаң, ол сын сӱт алай пальма сӱдінең пораластырылған суғ ба, пілдізі чоғыл. Прай ол ниме ӧӧнінде пасха хан чирлерінең килче: хуруғ сӱт, сыр продукты паза пасха ас-тамах. Олох туста сӱт сығарызынаң айғасчатхан фермерлернің ас-тамаа паазы тӱзірілче. Пу сурығларны кӧдіріп, Татарстанның Хазна Чӧбі Россия правительство кнезі Д.Медведевсер айланча. Хакасияның парламент президиумы айланысха ікінҷілес чох хозыларға чаратхан.
Пазағы сессияны 28 мартта иртірерге чарадылған.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы