ХАКАСИЯ ӰНІН ПУТИНГЕ ПИРГЕН
20.03.2018
Хабарлар
Табығлар-2018. 18 мартта тиксі Россия, ол санда Хакасия, хазна устағҷызын тапхан.Азынада сананыстар хоостыра табығларда тоғынчатхан президент Владимир Путин ізестіг чиңіс тутхан
***
ИРТКЕН ПОЗЫРАХТА, 18 МАРТТА, ПІСТІҢ ХАЗНА ПОЛИТИКАЗЫНДА ТАНЫҒЛЫҒ КИРЕК ПОЛҒАН - РОССИЯ ПРЕЗИДЕНТІНЕ ТАБЫҒЛАР. ТАҢДАҒЫЗЫ ХАЙДАҒ ПОЛАРЫНҶА, ХАЗНАНАҢ УСТИРЫН КЕМНІҢ ХОЛЫНА ПИРЕРІНҶЕ ТАЛЛАҒ ИДЕРІНДЕ ТАБЫҒҶЫЛАР ПӰӰЛ, ИРТКЕН ЧЫЛЛАРДАҒЫ ТАБЫҒЛАРНАҢ ТИҢНЕСТІРЗЕ, ХАЙ-ХАЙ ӦТКІН АРАЛАСХАННАР.
ТАБЫҒҶЫЛАРНЫҢ САНЫ 67 ПРОЦЕНТКЕ ЧИТКЕН, ХАКАСИЯДА - 65,87 ПРОЦЕНТКЕ. АЗЫНАДА САНАНЫСТАРҶА ВЛАДИМИР ПУТИН ІЗЕСТІГ ЧИҢІС ТУТХАН - АНЫҢ ӰЧӰН РОССИЯНЫҢ 76 % ТАБЫҒҶЫЗЫ (52,6 МИЛЛИОН КІЗІ) ӰНІН ПИРГЕН, ХАКАСИЯДА ТАБЫҒЛАРНЫҢ АЗЫНАДА САЛТАРЛАРЫНҶА ТОҒЫНЧАТХАН ПРЕЗИДЕНТТІҢ ӰЧӰН 69,16 % ТАБЫҒҶЫ (170 МУҢҶА КІЗІ) ӰНІН ПИРДІ.
ТАБЫҒЛАР КӰНІ
Хакасия. 18 март, 8.00 час. 391 табығ участогы, ізиин азып, тоғынып пастабысхан. Хакасияның Табығ комиссиязы искіриинең, пістің республикада ӱн пирер праволығ 372 муң артиинаң табығҷы пічікке кирілген. Пу табығларда наа ниме - табығҷыларға постарына килістіре табығ участогын таллап, анда ӱн пирер оңдай пирілгені. Анзына айланыстығ пічік пазары ла киректелген. Полчатхан орны хоостыра ӱн пирер оңдайнаң Хакасияда 12 муң азыра табығҷы тузаланған.
Ағбандағы 24 № школада орныхчатхан табығ участоктарынзар (анда ӱс участок: 51 №, 60 №, 63 №) чӧрчеткен табығҷылар хабарҷылар кӧп полчатханына кӧнік тее парған поларлар, Хакасияның пазы Виктор Зимин ӱнін пирерге пеер кил парча нооза.
Хакасияның пазы В.М.ЗИМИН 24 № школадағы табығ участогында
Республика устағҷызы сӧбірезінең хада 63 № табығ участогынзар 10 час иртен килген, аны сах андох сомҷылар паза телеоператорлар ибірібіскеннер. Виктор Михайлович табығ бюллетеньін ӱн пирҷен электроннай урназар кире суххан. Чоохтирға кирек, табығ бюллетеньнерін санға алҷаң комплекстер (КОИБ) Хакасияда пӱӱл пастағызын на тузаланысха кирілді. Мындағ наа техника республиканың 19 табығ участогында турғызылған, кӧбізі городтарда. Хакасияның пазы Россия президентіне кандидаттың ӱчӱн ӱн пирібіскен соонаң республиканың ӧӧн городының хайдағ чирін иптирінҷе ӱн пирісте араласхан. Чиңісчі полыбысхан проекттерҷе Ағбанның кӧп чон чӧрчеткен чирлері пӱӱлӧк иптеліп пастирлар нооза.
Виктор Зимин , табығ участогынаң сығып, ӱр нимес хабарҷыларнаң чоох алызып алған.
Ізенчем, Хакасияда табығҷыларның араласханы 65 -70 процент полар, - ухаанҷылаан республика пазы. - Пу табығлар хазна политиказындағы ӧӧн кирек полча. Киртінчем, табығлар сидіксіністер чох ирт парар -хазнаның устағҷызын таллир табығларға тимненіс республикада чахсы парған. Амды тоғыссар, кабинедімзер парарбын, табығ участоктарында тоғыс хайди парчатханын сыныхтағда тударбын. Хакасия - Россияда иң амыр регионнарның пірсі, аннаңар прай ниме чахсы полар тіп сағынчам.
Хакасияның Ӧӧркі Чӧп кнезі Владимир Штыгашев Ағбан городтың Чайаачы олғаннар кінінде (ЦДТ) орныхчатхан 33 № табығ участогында ӱн пирген.
Пу кӱн мағаа уғаа танығлығ, - теен Владимир Николаевич. - Мин ӧңнен турар Россия ӱчӱн ӱнім пиргем. Ізенчем, Россиябыс мыннаң мындар ідӧк ле тыып турар, анзы мині ӧріндірче.
Ӧӧркі Чӧп кнезі Хакасияның чоны табығларда ӧткін аралазар тіп ізенізінең ӱлескен. Табығларда нинҷе кӧп табығҷы араласча, анҷаа кандидат сын оңдайнаң табылғаны киречілелче тіп таныхтаан ол.
Федерация Чӧбінің кізізі В.А.ПЕТРЕНКО ӱн пирерге ӧнетін Хакасиязар кил парған.
Россияның Федерация Чӧбінің Хакасия правительствозынаң сығара табылған кізізі Валентина Петренко Хакасиядох ӱн пирген.
- Хакасия - минің ікінҷі чир-суум, - таныхтаан сенатор. - Минің чуртазым республика чуртазынаң пик палғалыс парған. Аннаңар Россия президентіне табығларда 24 № школадағы 63-ҷi табығ участогында ӱн пирерге чарадығ алғам.
Петренконың чооғынаң, пу табығлар кӧп наа ниме кирілгенінең, кӧп сыныхтағҷы араласчатханынаң пасхалалча.
Хакасияның Табығ комиссиязы искіриинең, 18.00 часха республикадағы табығҷыларнын 59,80 %-і ӱнін пирібіскен.
Табығлар кӱнінде республиканың музей-культура кінінде Халыхтар сыныхтағҷыларынын кіні тоғынған. Сыныхтағҷылар кіні Хакасияның Халыхтар палатазы паза республиканың Табығ комиссиязы кӱзінең тӧстелген. Хакасияда табығлар хайди парчатханынаңар искіріглер андар чыылғаннар паза кӧні трансляцияҷа Интернетте кӧзіділ турғаннар. Іди чонға республикада табығлар хайди парчатханын кӧріп алар оңдай пирілген.
18 март, 20.00 час. Хакасиядағы табығ участоктары чабыл парғаннар. Табығ комиссиялары бюллетеньнерні санап пастааннар, тоғыс иртенге теере парған...
Оӧркі Чӧп кнезі В.Н.ШТЫГАШЕВ табығ участогынзар
килген пастағы табығҷыларның санында полған
ТАБЫҒЛАРНЫҢ АЗЫНАДА САЛТАРЛАРЫ
Киҷее, 19 мартта, Хакасияның Табығ комиссиязы, пресс-конференция иртіріп, Россия президентiне табығларның республикадағы азынада салтарларын искірген.
Хакасияда хазна устағҷызын табарында табығҷыларның 65,87 проценті (245 муң 366 кізі) ӱнін пиртір. 2012 чылдағы табығларнаң тиңнестірзе, илееде ӧс партыр. Андада хазна устағҷызына табығларда Хакасияда 58,40 % табығҷы араласхан.
- Амғы сан хоостыра, піс Сибирьдегі федеральнай округта 4-ҷі орында пол парғабыс, Россия регионнары аразында ортызындабыс - 47-ҷі орында, - таныхталған Хакасияның Табығ комиссиязында.
Таныхтирға кирек, табығҷылар араласханы хоостыра пӱӱл Россияда иң улуғ санны хонҷых Тыва Республика кӧзітті - 93,66 % .
Хакасияның Табығ комиссиязы кнезі чооғынаң, республикада Россия президентіне табығлар тузында пір хоп таа кірбеен. Анзы табығлар сын оңдайнаң, законнарға килістіре ирткенін кӧзітче тіп таныхтаан ол. Республикада иң ӧткін табығҷылар Алтай аймаанда полтыр, анда ӱн пирер праволығ полчатхан чуртағҷыларның 74,98 %-і табығ участогынзар килген. Ікінҷі орында Таштып аймаа - 73,94 %, ӱзінҷізі Орджоникидзе аймаа пол парған - 73,65 %.
Городтарның аразында иң ӧткін араластырлар Абаза чуртағҷылары - 71,70 %, ікінҷі орында Саяногорск - 69,16 %, ӱзінҷізі Сорығ - 69,08 %.
Хакасияның Табығ комиссиязы искіриинең, республика чуртағҷыларының кӧбізі (170 муңҷа кізі) ӱнін Владимир Путиннің ӱчӱн пирген. Тиксі, тізең, Хакасияда табығҷыларның ӱннері кандидаттар аразында піди ӱлестіріл партыр:
Владимир Владимирович ПУТИН - 69,16 %;
Павел Николаевич ГРУДИНИН - 18,46 %;
Владимир Вольфович ЖИРИНОВСКИЙ - 7,18 %;
Ксения Анатольевна СОБЧАК - 1,37 %;
Борис Юрьевич ТИТОВ - 0,66 %;
Григорий Алексеевич ЯВЛИНСКИЙ - 0,65 %;
Максим Александрович СУРАЙКИН - 0,65 %;
Сергей Николаевич БАБУРИН - 0,64 %.
Город-аймахтарны алынҷа алза, Владимир Путиннің ӱчӱн иң кӧп ӱн Шира (79,38 %), Таштып (78,53 %), Орджоникидзе (72,79 %), Асхыс (71,63 %), Пии (71,39 %) аймахтары пиртір.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы