АНЫҢ АДЫ ХАҶАН ДАА УНДУЛБАС
27.03.2018
Хабарлар
Алғыстас. Асхыс аймаандағы Ӱс чул аалның школа стенезіне Хызыл Чылтыс орденінің кавалері Анатолий Бурнаковтың хумартхызына чарыдылған хумартхы чарды хызылған соонда редакциязар ӱндезігліг пічіктер кірче.
Ӱс чулдағы школаны Анатолий БУРНАКОВНАҢ хада 1979 чылда тоосхан арғыстары.
Іди редакциязар Анатолий Бурнаковнаң хада ӱгренген Зинаида Торокова паза пасха даа аның арғыстары пічікнең айланғаннар. Анда олар махачы хакас оол Анатолий Бурнаковтың ады хаҷан даа ундулбазына улуғ тоғыс апарған Хакас телевидениезінің хабарҷызы Алексей Боргояковха алғыс сӧстерін читірчелер. Оларның алғыстас пічиин толдыразынаң пирчебіс:
«Изеннер, пістің хынчатхан аарлығ «Хабар» газетабыс. Сірернің чарадииңар хоостыра, Алексей Михайлович Боргояковты улуғлап, кӧп нимес пас пирерге сағынчабыс. Ол Хакас телевидениезінің хабарӌызы, Россияның Журналисттер пірігізінің араласчызы полча. Хакасияда Алексей Михайловичті таныбинчатхан кізі чох полар, неке. Пістің чон телевидениеӌе аның кӧзідіглерін хынып кӧрче. Хайдағ ол иптіг, амыр хылыхтығ кізі. Пістің пай хакас тілін хайди матлама, ӧтіре пілче. Кізілернең тіл алысчатса, сӧстерні хоостап, сіліг адапча, уғаа нымзах чоохтасча. Аар-пеер чорыхха сығып, кізілернең, тоғазып, чоохтасчатса, сурығларға килістіре нандырығлар таапча.
15 февральда Асхыс аймаандағы Ӱс чул аалда М.Е.Кильчичаковтың адынаң ортымах школа стенезіне хызылған чааҷы-интернационалист, гвардияның улуғ сержанты, Хызыл Чылтыс орденінің кавалері Анатолий Ананьевич Бурнаковтың хумартхызына чарыдылған граниттең тимнелген хумартхы чарды азылған. Олох кӱнде Анатолий Бурнаковтың хумартхызына чарыдылған мылтыхтаң атарынҷа ӱгренҷілер аразындағы марығ ирткен. Чӱректі уғаа тибіретчеткен мероприятие полған.
Толя Бурнаков піснең хада ӱгренген арғызыбыс полча. Ол хыйға сағыстығ, кӱлӱк, иптіг, сіліг, пӧзік сыннығ кізі полған. Чиит позынаң 29 частығда, кинен полып, ах чарыхтаң парыбысхан. Уғаа ачырғастығ.
Аның ады хаҷан даа ундулбазын тіп, ағаа хумартхы чарды азар сағыснаң Алексей Боргояков сыххан. Ол школада, институтта ӱгренген арғыстарынзар, ахча кирек полар тіп, сурыныснаң айланған. Амды ахча киреенең сидік тее полза, киректелчеткен ахча пір дее ікінҷілес чох чыыл парған. Тың аарластығ, улуғ тоғыс иділ парды Тӧӧ чирінде. Алексей Михайлович Толянаң хада служба ирткен прай арғыстарын тапхан. Олар Москвада, Киевте, Минскте, Мурманскта, Харьковта, Ростов-на-Дону городта, Иерусалимде дее чуртағлапчалар. Хакасиядаң Толя чалғызан на полтыр. Пу чааҷы полған кізілернең Алексей Михайлович пик палғалыс тутча.
Ол уғаа кӧп тілег-істезігліг тоғыс толдыр салған. Пістің «Хабар» газетабыста Толядаңар статьяларында хығырығӌыларға кӧп искіріг, кӧп тоғыс читір пирген. Ол пір кӱннің не тоғызы нимес нооза. Чыллар иртче, анда полған киректерні чиит улус пілзін, поғдархазын.
Мылтыхтаң атарынҷа марығда пістің чиит ооллар постарын матлама, турыстыра тудынғаннар, кӧрігцілерні чапсытханнар, ӧріндіргеннер. Хумартхы чарды азылған пайрам соонда ирткен марығ оларның сағыстарында ідӧк хаӌанға даа халар.
Алексей Михайлович, тоғынҷаң кӧңніңер сыбыра улуғ кӧдірілісте ползын, Хакасияның чуртазын прай саринаң ідӧк ле чахсы чарыт турыңар. Піс Сірерні улуғлапчабыс, андағ улуғ тоғыс ит салған ӱчӱн поғдархапчабыс. Пу тоғысха кӧп кӱзіңерні салып, сағызыңарны читіргезер. Хаӌан даа узах частығ, часкалығ, хазых полыңар. Пір дее туртухпин, алнынзар ла хаалап турыңар. Анатолийнең хада ӱгренген прай арғыстары Сірерге улуғ алғыс читірчелер. Піс Анатолий арғызыбыстыхаҷан даа ундубаспыс. Улуғ аарласнаң Зинаида Торокова паза хада ӱгренген арғыстары».
Алексей Боргояков - сыннаң даа мындағ алғыстас сӧстеріне турыстыра кізі. Махачы чааласхан чир-суғҷызының адын кӧдірерінҷе уғаа чахсы, тузалығ тоғыс ит салған. Чииттер ам ағаа тиңнезерге кӱстенерлер. Республиканың пасха даа аалларында чаада, кизек чаалазығларда ідӧк махачы чааласхан, істеністе пӧзік чидіглер кӧзіткен, пӧзік сыйыхтарға турысхан саблығ кізілер кӧп полар. Оларны сабландырарға, хумартхылирға Алексей Боргояковтың тоғызы чахсы кӧзідім ползын.
Автор :
Тимнеен Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы