АЛЫМ ПАР-ЧОҒЫЛЫН СЫНЫХТАП ТУРЫҢАР
10.04.2018
Хабарлар
Пресс-конференция. Чарғы приставтары федеральнай службаның (ФССП) Хакасияҷа управление устағҷызының тоғызын толдырчатхан Алёна Романова паза аның орынҷызы Валерий Берняцкий хабарҷыларға пресс-конференция иртіргеннер.
Ӱр ниместе Хакасияҷа УФССП-ның устағҷызы тоғызын толдырарға Алёна Анатольевна Романова турғызылған. Ол юстицияның ікінҷі класстығ хазна советнигі полча, Хакасиязар Томск облазынаң килген. Наа орында пу аның пастағы пресс-конференциязы полды.
Хайди Алёна Анатольевна искірген, амды, пылтырғы тоғыс салтарларынзар айланмин, законодательстводағы наа алызығларны ӱзӱрерге чапсых полар. Іди алымнарын тӧлебин тис чӧрчеткен кізілер сағба чох чіт парғанға саналарлар (кӧбізі алимент тӧлебин тис чӧрче). Андада аның ис-пайын садып, алымнарын чабарға чарир. Алимент алчатхан кізее азырир кізізі чіт парғаны хоостыра пенсия пирілер. Кӧп кізі алимент ал полбин айланча.
Чол чӧрізінҷе правилоларны сайбап, ГИБДД-ның штрафтарын тӧлебинчеткен кізілернің счёттарынаң ахча суурылча. Штрафты тузында тӧлезе, аның сині илееде хызырылча. Социальнай тӧлеглердең штраф ахчазын суурарға чарадылбинча, аннаңар андағ тӧлег алчатханнаңар справка апар пирерге кирек. Пристав счётсар хайдағ ахча кіргенін пілбинче нооза. Андағ справканы алымнығ кізее чыл сай пирчедерге кирек, пристав, чыл иртіп парза, ол справканы прай пічіктернең хада архивсер ызыбысча.
Чарғы приставтарының ізіктері сыбыра азых. Че оларның тоғыс кӧп, олар алымнығ кізілернің адрестерінҷе чӧрчелер, аннаңар кӧзіділген тоғазығ кӱннерінде андар парза, чахсы полар. Азых ізіктер кӱннері, кӧні линия удаа иртірілче. Хакасияда алымнығ кізілер кӧп, піреезінің нинҷе-де алым полча. Пылтыр алымнарҷа 132 миллион салковай чыылған. Республиканы прай алза, алымнарның сині 14 миллиард салковайға тиңнелче. Олар хаҷан даа чох иділбес, алымнар прай чыылар.
Алым 50 салковай даа полза, аның прай ис-пайына арест салылча, алым ахчазы тӧлелзе ле, ол суурылча. Тоғынминчатхан кізінің парызы удаа чох полча, тоғыс чоғылына сылтанып, ол алымын тӧлебинче. Андағларны приставтар чонға тоғыс тапчаң кінзер ысчалар, анда олар пазох постарына килістіре тоғыс таппинчалар. Пістің хазнада амды тоғынарға хынминчатхан ӱчӱн уголовнай нандырығ кӧрілбинче, совет тузында андағларны чарғылаҷаңнар.
Піреезі, алымнарын тӧлирге хынмин, харанға тоғынып, парыстарын чазырча. Россиядаң пасха хазналарзар парарға оларға чарадылбинчатханы алымны тӧлеттірер чахсы оңдай полча. Кізее хырығ озаринзар хайди даа парарға кирек пол парча, андада алымнығ кізі, хынзын-хынмазын, прай алымнарын тӧлебісче.
Мының алнында ӧӧнінде иреннер ле алимент тӧлебин тис чӧрҷеңнер. Амды алимент тӧлебин тис чӧрчеткеннернің санында ипчілер илееде. Андағ кізі сағба чох чіт парғанға саналза, ағаа прай праволарын чарғы пастыра ла айландырып аларға чарир. Хакасияда алимент тӧлебинчеткеннердең тоғыр 6230 толдырығ производствозы азылған, пылтыр 1230 производствоҷа тоғыс тоозылған, ам даа 5900-че халған.
Алымны тооза тӧлебізерге кирек. Хайди тидірлер, ӧдіс ӧлбеҷең. Кӧзідімге, палаа 18 час тол парза даа, алименттерні читіре тӧлебеен алымы ідӧк халча. Аны тӧлирге хайди даа кирек полар. Кізінің чалғыс ла чурты полза, чарғы аны, кічіг арах чуртха кӧзіріп, алымын тӧлеттірер чарадығ алыбызарға айабас.
Ідӧк пілерге кирек, чарғы приставтарына алым ахчазын аларға чарадылбинча. Ахчаны терминаллар, банктар пастыра ла ызарға кирек. Пірееде кӱҷӱрлер, пристав полып, квартираларҷа ахча чыып чӧрчелер. Андағлардаңар полицияа искірерге кирек.
Хакасияҷа УФССП-да ам 158 кізі тоғынча, анзы уғаа асхынах, аннаңар оларға кӧп тоғыс артылча. Илееде кізі сыдаспин парыбысча. Ағаа хоза, приставтарның чал ахчазы улуғ нимес: аттестация ирткелек тоғынҷы 17-18 муң салковай алча, аттестация иртібіссе - 22-23 муң салковай. Че пристав полып тоғынған кізіні пасха учреждениелерде тоғысха хынып алчалар.
Ідӧк УФССП-ның сайтында алымнар парын сыбыра сыныхтаңар, кізі удаа анзын пілбин халча. Ундубаңар сыныхтирға, алымны тузында тӧлирге.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы