НИИК ПААНАҢ ПАЗЫНАРҒА МАҢНАНЫҢАР
17.04.2018
Хабарлар
Аарлығ чир-суғҷылар!
2018 чылның II чарым чылына пазыныс парча. Прайзы даа сизінче полар, амғы туста газета-журналлар редакцияларының пазыныс кирее иң ағырсымнығ паза ӧӧн сурии полча.
Ӧӧн сылтағларның санында почта пастыра пазыныс аарлыға турчатханы.
Мының алнында, пазыныс ниик ползын тіп, хазна саринаң почтаа субсидия позыдылҷаң. Іди прай хазнадағы газета-журналларның, паазы ниик полып, тиражтары даа кӧдіре полҷаң.
Кӧзідімге алза, «Хакас чирі» 2001 чылда редакцияда аларға 24 салковайға турҷаң, почта пастыра, тізең, 48 салковай. Ікі хати ле аарлығ. Чуртас парча, алызып одырча. Законнар паза чуртасха теелчеткен аймах чарадығлар ідӧк алысчалар. Халғанҷы туста, аймах сылтағларға паза законнарға тӧстеніп, ол субсидия чох иділген. Салтары кӧріндіре - амғы туста редакцияда аларынаң почта пастыра алары 4 хати, теедег, аарлығ пол парған. Пістің газетабыс 2018 чылның I чарым чылына редакцияда алары 168 салковайға турған, почта пастыра - 548 салковай 80 ахчаа. Кӧрінче ӧӧн парыс хайдар парча. 2018 чылның II чарым чылына почта пастыра пазыныс хатабох ӧс парды. Амды почта пастыра аларға чарым чылға пазыныс 686 салковай 46 ахчаа турар. Мында алынҷа таныхтирға кирек, редакция паазын ӧскірбинче. Редакцияда алар паза редакциядаң, позыбыс тартып, таратчатхан паалар пылтырғыох синде халарлар.
Пір саринаң почта даа сизінче, паазын ӧскіріп, газета-журналларның тиражын паза пазынчатхан чонның санын чідірче. Кӧзідімге алза, чон хынчатхан «Аргументы и факты» мының алнындағы ӱс миллион тиражтаң пір миллион чарымға тӱс парған. Аны сизініп, Россия почтазы ӧнетін пазыныс кӱннерін иртірче (декада подписки). 2018 чылның ікінҷі чарым чылына ӧнетін пазыныс кӱннері 10 майда пасталар.
Аннаңар, аарлығ чир-суғҷылар, пу кӱннерде газетабысха ниик паанаң пазынарға маңнаныңар. Чарым чылға 686 салковай 46 ахча орнына 617 салковай 81 ахчаа турар. 68 салковай 65 ахчаа ниик турар. Хоза таныхтирға кирек, піс республикадағы почта пӧлиинең ниик паанаң ӧнетін пазыныс кӱннерін 30 июньға теере узарадарынаңар чӧптезіг апарчабыс. Пазыныс тузында сурығлар полза, редакциязар, сӧӧ тартпин, сығдырат турыңар.
Сағынчабыс, тилекейде чалғыс хакас газетабысха пазын-чатханнарның кӧңнін почтаның наа паа тың тӱзірбес. Полған на пазынған кізі чоныбыстың пілінізін кӧдірер, тілібісті, кибірлерібісті хайраллир паза тилідер чӧрімге улуғ хозым итче.
Аарлығ чир-суғҷылар! Пу сағыс-кӧрісті тыыдып, хозылыңар хакас тілін тилідер чӧрімге, ундубаңар газетабысха пазынарға.
Автор :
Радион СУНЧУГАШЕВ, «Хабар» газетаның ӧӧн редакторы
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде