ЧУРТАСХА НАА ТЕХНОЛОГИЯЛАР КИРІЛЧЕ
24.04.2018
Хабарлар
Кӧзідіг-форум. Республиканың музей-культура кінінде 19 - 21 апрельде «ХакСтройЭКСП0-2018» регионнар аразындағы кӧзідіг-форум 11-ҷі хати ирткен. Анда пӱдіріг материаллары, оборудование сығарчатхан паза пӱдіріг полызығларын пирчеткен 60 азыра предприятие араласхан.
РЕСПУБЛИКАДА ИРТЧЕТКЕН «ХАКСТРОЙ-ЭКСПО» КӦЗІДІГ-ФОРУМНЫҢ ТӦСТЕГҶІЛЕРІ ХАКАСИЯНЫҢ ПРАВИТЕЛЬСТВОЗЫ, ПӰДІРІГ ПАЗА ЧУРТ КОММУНАЛЬНАЙ ХОНЫХ МИНИСТЕРСТВОЗЫ, ХАКАСИЯНЫҢ ТИЛІС ФОНДЫ, «СИБ-ИНФО ЭКСПО» КОМПАНИЯ ПОЛЧАЛАР.
КӦЗІДІГНІ ПАЙРАМНИ АЗАРЫНДА ХАКАСИЯНЫҢ ПАЗЫ ВИКТОР ЗИМИН, ПӰДІРІГ ПАЗА ЧУРТ-КОММУНАЛЬНАЙ ХОНЫХ МИНИСТРІ ВАЛЕРИЙ КЕЛИН АРАЛАСХАННАР.
- «ХакСтройЭКСПО» регионнар аразындағы кӧзідіг-форум 10 чыл аразына опытнаң, ӱлесчең тузалығ паза экономиканың ӧӧн кӧстегліг площадказы полыбысхан. Пӱдіріг отрасльынаң минің істеніс чолымның кӧп чыллары палғалыстығ, - таныхтаан Виктор Зимин.
Кибір хоостыра «ХакСтройЭКСПО» теестегі кӧзідігні асчатхан кізі кірпис салча. Хакасияның пазы, кӧзідіг азылғанынаң прайзын алғыстап, «2018 чыл» танығлығ кірписті сал салған.
Кӧзідігде ідӧк Хакасияның тиліс фондынаң «Ростелеком» ПАО хада-пірге тоғынардаңар чӧптезіг иткеннер. Тиліс фондының директоры Денис Пауль паза «Ростелеком» ПАО-ның директор орынҷызы Валерий Клейкин ол пічікте хол салғаннар. Пу ікі предприятие телекоммуникация инфраструктуразын тилідер паза, хада-пірге тоғынып, улуғ инвестиция проекттерін чуртасха кирер.
Кӧзідіг пайрамни азылған соонда, Виктор Зиминнең Валерий Келин кӧзідіг площадкаларынаң танысханнар. Туралар пӱдірҷең пенополистиролны сығарчатхан Хызылчардағы «Полипак-10» предприятие Хакасия пазының паза пӱдіріг министрінің хайиин тартхан. Пенополистирол пенопластха тӧӧй пӱдіріг материалы паза аның кӧдірімі андағох ниик.
- Чурт пӱдірерінде пу технологиянаң 1930 чылларда чааҷылар тузаланғаннар. Ағас туранаң тиңнестірзе, пенополистирол хай-хай чылығ. Ол чылығны ағастың хыринда 10 хати чахсы тутча. Андағ чуртты кӱн батареяларынаң алай чарытхынаң чылыдарға чарир. Кӧзідімге, 100 квадрат метрліг тураны чылыдарына 3 киловатт чарытхы хорир. Ағаа хоза, пу материал кізі хазиина хорғыс ағылбинча, -теен «Полипак-10» ООО-нын директоры Иван Ковалёв.
«Термодом» ООО - харағайдаң туралар пӱдірчеткен компания. Хызылчардағы Кежемск аймаанда ӧсчеткен харағай пістің харағайдаң хай-хай пик, аннаңар аннаң пӱдірілген туралар, іріктебин, ӱр турчалар. Пу харағайны Хызылчарзар ағылып, анда брусха кисчелер, анаң, «Тиккурила» акрил сырнаң сырлабызып, Ағбанзар ағылчалар. Ағбандағы «Термодом» ООО-ның директоры Александр Сагалаковтың таниинаң, термобрустаң пӱдірілген туразар 3 ай пазынаң кӧзерге чарир. Ағаа хоза, андағ чуртты чылығлирға паза істі-тастын иптирге киректелбинче. Термобрус чылығны чахсы тутча паза иптіг кӧрінче.
Казаньдағы «Инновационные технологии» ООО чуртты чылығлаҷаң сырны сығарча. Ол сырнаң тураны сырлабысса, стенелерін чылығлирға киректелбинче. Сырның халыны пір миллиметрҷе полза, тураны соохтаң чахсы арачылир.
Минсуғдағы «Тягач-Авто» ООО мрамор унағынаң пасхаҷыл лего-кірпистер сығарча. Ол кірпистің ортызында ікі тизік пар. Кірписті салчатса, растворны тизіктерзер урарға кирек. Тизіктерзер раствор урар орнына ідӧк тимір трубаларнаң тузаланарға чарир. Предприятиенің директоры Сергей Прокудиннің чооғынаң, лего-кірпис сиден идерге чарапча. Аннаң пес салза, ол ізіге чарыл парар. «Тягач-Авто» ООО чонға таарлағларны тартар хабазығлар пирче. Че ирткен чылдаң сығара ол мрамор унағынаң кірпистер ит сыххан. Кірпистер прай саринаң чылбыраң иде чазалғаннар, аннаңар иптіг кӧрінчелер.
- Хакасиязар Башкириядаң ааллап килгем. Музей-культура кінін кӧріп аларға сағыныбысхам, че мында «ХакСтройЭКСПО» кӧзідіг иртчеткенін пілбеем. Мында кӧп хынығ ниме кӧріп алғам. Оларны кӧріп, матап чапсаам, сағыстарынаң ӱлескен кӧрігҷі Людмила Ибрагимова.
«ХакСтройЭКСПО» кӧзідіг-форумда араласчатхан предприятиелер устағҷылары, тоғынҷылары аймах «тегілек столларда», мастер-класстарда араласханнар паза килген чонға ниме сығарчатханнарынаңар искіргеннер.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде