ПРОЕКТТЕРІ ЧУРТАСТЫ ЧАХСЫЛАНДЫРАРЫНА КӦСТЕЛЧЕ
25.04.2018
Хабарлар
Марығ. Ағбанда С.П.Кадышевтің адынаң культура кінінде «Иң артых муниципальнай пӱдіс» республика марииның финалы ирткен.
Хакасия правительствозы 2007 чылдаң сығара аал чӧптері аразында марығ иртірче. Аны иртірерінҷе хай пірее алызығлар кирілген. Оларның пірсі - муниципальнай пӱдістернің пастары проекттерні финалда постары арачылапчалар.
Марығда 57 муниципальнай пӱдіс араласхан, че финалға 29-зы сыххан. Проекттері тоғыс номинацияҷа паалалғаннар.
Марығның пӧгіні - муниципальнай пӱдістернің чуртас-экономика сурығларына, орындағы сидіксіністерні пӧгеріне чонның хайиин тартары паза муниципальнай пӱдістернің тоғызында иң чахсы опытты тарадары. Полған на муниципальнай пӱдіс аалның ағырсымнығ суриин пӧгіп аларға кӱстенген. Прай даа аал чӧптері, проект тимнеп, чуртағҷыларның сурыныстарын санға алған. Хай піреезі, чуртағҷыларнаң чыылығ иртіріп, таллап алған проекттерні ӱзӱрген. Аның сылтаанда прай даа муниципальнай пӱдістернің проекттері чуртағҷыларға киректелчеткен паза турыстығ полчатханын сизінерге чарир.
Мероприятиені асхан Хакасия пазының орынҷызы Владимир Крафт. Марығның финалы Орындағы пос устаныс кӱні алнында ирткен. Орындағы пос устаныс тилізіне хозым идіп, кӧп чыл тіспен істенген ӱчӱн, иң артых тоғынҷылар Хакасия пазының Аарластығ паза алғыстас пічіктерінең таныхтатханнар. Ідӧк марығ чиңісчілерін, алғыстап, сыйыхтааннар.
- Пу марығда прай даа муниципальнай пӱдістер пастағы орынға турыстыра проекттіглер. Че хай піреезінiң пастағы орынға ниме-де читпин парған чіли пілдірген. Комиссия тоғызын чахсы толдырған, марығласчатханнарны, прай саринаң кӧріп, орта паалаан. Муниципальнай пӱдістернің пастары проекттерін турыстығ арачылааннар. Чон сірерні тиктең нимес устағҷаа тапхан. Ідӧк устағҷыларға ахчаны кӧрілген не кирекке хорадарға чӧп пирчем, - чоохтаан Владимир Крафт. Полған на муниципальнай пӱдіс турыстығ проект тимнеп салған. Прайзы даа кізі хайиин тартхан.
Кӧзідімге, Асхыс аймаандағы Чоғархы Асхыс аал чӧбінің пазы Александр Окунев «Универсальнай спорт площадказы - чон ӧткін тынанҷаң орын» проектін арачылаан. Проектті арачылирында ідӧк Чоғархы Асхыс аалның олғаннары араласханнар. Олар, сценада сарнап, меспекнең ойнап полчатханнарын кӧзіткеннер. Полған на проектті таныстырарына онар минута пирілген. Ол тус аразына проекттің ӧӧнін читір пирерге киректелген. Чоғархы Асхыстағы муниципальнай пӱдіс «Республикада позының ӱлгӱзінде тӧрт алай аннаң даа кӧп аал, чон саны 1500-тең асхынах кізілер чуртапчатхан иң артых муниципальнай пӱдіс» номинацияда чиңісчі полыбысхан. Оларға диплом, статуэтка паза 400 муң салковайға сертификат пирілген. Чиңіс тудып, муниципальнай пӱдістің пазы Александр Окунев кӧңнінең, сағызынаң ӱлескен:
- Марығның салтарларын сахтап, тың чӱрексеем. Чиңісчі полыбыcханнанар ис салғанымда, сала чӱреем кӧксімнең сығара «атығыбыспаан». Амды тоғысты апарҷаң кӧңнім кӧдірілген. Чыл тоозылғанҷа маңнанарбыс тіп сағынчам. 2013 чылда пістің кічіг футбол ойнаҷаң орын пӱдірілген. Ол арған кӧк отнаң тӧзелген. Пирілген ахчаа ибіре 4 метр азыра пӧзік тимір сиден ит саларға киректелче, ағаа хоза аны сетканаң тартыбызарбыс. Олох ахчаа пеер чарытхы тартары кӧрілче. Аймах пазы Абрек Челтыгмашев аймах бюджедінең хоза 600 мун салковай позыдар тіп чоохтаан, 25 мун салковайны кресен-фермер хоныхтары, идінчектер чыып, полыс пирерлер.
Ідӧк чиңісчілернің аразында Аршандағы муниципальнай пӱдіс полыбысхан. Аал чӧбінің пазы Николай Танбаев «Этнокультурнай кін» проектті арачылаан.
- Пістің социальнай танығлығ проект, ол Аршаннар аалында сигіс пулуңнығ хакас иб пӱдірии полча. Пістің аалда ӧӧнінде хакастар чуртапчалар, че анда хакас тілі чітче. Ол ағырсымнығ сурығ тіп сағынчам. Улуғлар пос тілінең чоохтаспинчалар, чииттернiң аразында хакастапчатханнар чоғыл, че тӧреен тілін пілчеткеннер аалда пар.
Пӱӱнгі кӱнде Хакасияның правительствозы паза Алтай аймааның администрациязы даа хакас чонның этнозын хайраллирға кӱстенчелер. Аннаңар пістің аал чуртағҷыларынаң мындағ проектнең марыға сығарға пір чӧпке килгебіс. «Этнокультурнай кін» тіл суриин пӧгерге паза кибірлерні хайраллирына улуғ туза ағылар тіп сағынчабыс. Пістiң проектті чуртасха киреріне 1 миллион 100 мун салковай киректелче. Сигіс пулуңнығ хакас ибні пӱдіреріне 600 муң киректелче. Аның улии 35 квадрат метр полар. Піс, «Республикада позынын ӱлгӱзінде ікі-ӱс аал, чон саны 1500-тең артых кізілер чуртапчатхан иң артых муниципальнай пӱдіс» номинацияда аралазып, чиңісчі полып, 450 мун салковайға сертификат алғабыс. Пу марығда ікінҷізін араластыбыс. Ирткен чылда 300 мун салковайға сертификат алғабыс. Ол ахчаа Илбек Ада чаа ветераннарына хумартхы тасты нааҷылаабыс, - чоохтаан Николай Танбаев.
Прай даа муниципальнай пӱдістер пастары проекттерін турыстығ арачылааннар. Чиңісчілернің кӧңнілері чалахай полған. Прайзы тоғыс апарар кӧңнілерінең ӱлескен.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы