ЧАСХЫ ТААРЫҒ - ХЫРАӋЫЛАРНЫҢ МАҢ ЧОХ ТУЗЫ
04.05.2018
Хабарлар
Аал хонии. Хыраӌыларның маң чох тузы пасталыбысты. Пии аймааның Табат аалындағы Виктор Баузернің кресен-фермер хонии хыра тоғызын республикада прайзынаң пурун пастады
ПУ КРЕСЕН-ФЕРМЕР ХОНИИНЫҢ ХЫРАЛАРЫ ТАБАТ ААЛ ИБІРЕ ОРНЫХЧА. МЫНДА ӦЗІМНЕР ӦСКІРЧЕТКЕН НИНҶЕ-ДЕ КРЕСЕН-ФЕРМЕР ХОНИИ ПАР. ВИКТОР БАУЗЕРНІҢ ХОНИИ -МАҢНАНЫСТЫҒ, ЧАХСЫ ТИЛІПЧЕТКЕН ХОНЫХТАРНЫҢ ПІРСІ. АНЗЫ ТИКТЕҢ НИМЕС. КРЕСЕН-ФЕРМЕР ХОНИИ ХЫРА ТОҒЫСТАРЫН ТОҢАСТЫҒЛАРНЫ ІДӦК ТУЗЫНДА ЧЫЫРҒА КӰСТЕНЧЕ.
ПӰӰЛ ОЛ 24 АПРЕЛЬДЕ ХЫРА ТОҒЫЗЫН ПАСТАДЫ. ПУ КӰНГЕ ТЕЕРЕ ПРАЙ ТЕХНИКА ТЫХТАЛҒАН, СОЛЯРКА АЛЫЛҒАН. ЧАСХЫ ТААРЫҒНЫҢ ПАСТАҒЫ КӰНІНДЕ 150-ӌе ГЕКТАР ЧИРДЕ КӦЧЕ САЛЫЛҒАН.
25 апрельде таарығ тоғызы узарадылған. Анаң наңмырлар полып хырада пір ле сеялка тоғынған. Кресен-фермер хониинда «Бюллер» ікі таарығ комплексі пар. Устағҷы Виктор Баузер Ужурзар парыбысханнаңар хыра тоғызы хайди парчатханнаңар аның орынҷызы Сергей Игнатенко чоохтап пирген.
- Часхы таарығны пастир алнында техниканы сыныхтаабыс, тыхтаабыс паза солярка садысхабыс. Пӱӱл пылтырғыох чылдағы чіли 3100 гектар чирде кӧче, пуғдай, сула, соя, горох, рапс паза донник таарирбыс. Ирткен чыл ӱреннернең сидіксіністер полган, аннаңар оларны садызарга киліскен. Чахсы кӱннер турза, таарығны тузында тоозарбыс.
Ирткен чылда 15 майда таарығ тоғыстарын тоос салғабыс. Амғы туста техникабыс таа, тоғынӌыларыбыс таа читкіӌе. Чир кӧп арах полған полза, тоңастығларны уламох кӧп саларӌыхпыс. Нинӌе-де чыл изере хоза чир алып аларға кӱстенчебіс. Таарыпчатхан хыраларның улии ідӧк ле 3100 гектар. Табат аал ибіре тузаланылбинчатхан чир ам даа илееде, - таныхтаан Сергей Игнатенко.
Пӱӱл В.Ф.Баузернің кресен-фермер хонии 560-ҷа гектар чирде кӧче, 600 - 700 гектарда сула, 1500-че гектарда пуғдай паза 300-че гектар чирде рапс, горох, соя саларға пӧгінче.
Пуғдайны кресен-фермер хонии Минсуғда паза Ағбанда садыбысча. Сула хойлар азиина парча. Амғы туста хоныхта 1600 пас хой саналча. Сергей Владимировичтің чооғынаң, пӱӱл суланаң хада ідӧк донник от одыртып саларға пӧгінчелер. Тоңастығларның сығызын чахсыландырар ӱчӱн, чыл сай хыраларда удобрение чайчалар паза опыттар иртірчелер. Пір гектар чирге 100-че килограмм удобрение парыбысча. Опыттарны «Август» фирма иртірче. Іди хыраның улуғ нимес кизегінде, удобрение чайып, ӧзімнер одыртылча, ікінҷі чардығында, удобрение чайылбаан чирде, ӧзімнер салчалар. Иртірчеткен опыттар хайдағ удобрение иң чахсы полчатханын кӧзітче.
28 апрельге республиканың ӱс аймаанда хыралар пораналылған: Алтай аймаанда - 2600 гектар чир, Пии аймаанда - 1190 гектар чир, Шира аймаанда - 180 гектар чир. Пии аймаанда 602 гектар чирде кӧче одыртылған. Асхыс аймаанда 150 гектарда культивация иртірілген, Пии аймаанда - 905 гектарда, Шира аймаанда - 1045 гектарда.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы