ӦРТТЕҢ АРАЧЫЛАПЧАЛАР
04.05.2018
Хабарлар
(Сомда И.М. Туспиякова.)
Танығлығ кӱн. Ирткен неделяда Ағбанда тимір чол бригадазының культура туразында СССР-ның ӧрт ӱзірчеңнер хадааның 100 чылына паза Россияның ӧрт ӱзірчеңнер хадаа тӧстелгенінің 369 чылына чарыдылған пайрамнығ мероприятие ирткен.
Пайрамнығ мероприятие пасталғанда, ӧрт ӱзірчеңнернің ӧмезі, сценаа сығып, позының тоғызынаңар сарын толдыр пирген. Анаң сценаа Россияның флагы паза МЧС-тың Хакасияча управлениезінің знамязы сығарылған, Россия паза Хакасия гимннері толдырылған. Хакасия пазы Виктор Зимин, сценаа сығып, республиканың ӧрт ӱзірчеңнерін алғыстаан.
- Сірернің иңнілеріңе улуғ тоғыс артылча: республика чуртағчыларын арачылиры. Сірер ол тоғысты турыстыра толдырчазар. Полған на саайда полызыға килчезер. Тоғызыңар сірерге дее хорғыс ағылча. Че сидік паза хорғыс ағылчатхан тоғызыңарның пасха сари пар. Ол - арачылалған кізілернің чуртазы. Оларның ӱчӱн турызып, сірер, пір дее нимедең чалтанмин, тӱзімніг тоғынчазар. Сойан-Сус ГЭС-та саай полғанда, сірер, махачы тудынып, аның салтарларын чох иткезер, полызыға иң пурун килгезер. Улуғ суғ тасханда, сірер ідӧк кізілерге полызыға килгезер. 2015 чылдағы улуғ ӧрттең пістің аалларыбысты паза городтарыбысты арачылаазар. Ветераннарға улуғ алғызым читірчем. Сірер чииттерге кӧзідім полчазар, ӧрт ӱзірчеңнер службазының тилізіне улуғ хозым иткезер, - чооғында таныхтаан Хакасия пазы.
Ідӧк республиканың ӧрт ӱзірҷеңнерін алғыстирға республиканың Ӧӧркі Чӧп кнезінің орынчызы Светлана Могилина сыххан. Аның чооғынаң, ӧрттең тоғыр кӱресчең тоғысты таллап алғаннар чонның амыр чуртазының хадаанда турчалар. Постарының чуртазын айабин, олар пасха кізілерні арачылапчалар.
- Сӧбірелеріңде чобағ полбазын. Палалар пабаларын удаа кӧрзіннер. Сірернің асхынах тоғыс ползын тіп прай чӱреемнең алғапчам, - чооғын тоосхан Светлана Викторовна.
Пайрамнығ кӱнде кӧп ӧрт ӱзірчеңе Хакасия правительствозы паза Ӧӧркі Чӧбі адынаң Аарластығ паза алғыстас пічіктер читірілген. Сыйыхтар алғаннарның санында Ирина Туспиякова полған. Ол Асхыстағы ӧрт ӱзірчеңнер частьында диспетчер полча. Аның тоғызынаң ӧрт ӱзірчеңнернің ӧрт хабылған орынзар табырах чидері палғалыстығ. Ӧрт ӱзірчең службада ол 18 чыл тоғын парир. Че тоғызын Ирина Михайловна инструктор полып пастаан, профилактика тоғызын апарчаң. Школаларча, садығ тураларынча чӧріп, ӧрт сығартпас оңдайларны сыныхтачаң. Таныхтирға кирек, Ирина Михайловна пабазының чолын пасча. Михаил Петрович Ачитаев, Свердловсктағы ӧрт ӱзірчеңнер училищезін тоозып, кӧп чыл ӧрт ӱзірчең полып тоғынған. Ирина Михайловна тоғызынаңар піди чоохтапча:
- Диспетчер искірігні санға аларға, анаң ӧрт сыххан орынзар автомобильлерні ызарға кирек. Кізілер чурттарын ӱзірерге ікі ӧрт ӱзірчең автомобиль ызылча. Улуғ объект ӧртке хабылза, андар кӧп арах машина сыхча.
2015 чылның 12 апрельінде ӧрттер сых парғанда, Ирина Туспиякова дежурствода полған. Асхыс аймаанда ӧрт сыхпаан даа полза, Асхыстағы ӧрт ӱзірчеңнер пасха аймахтарға полысханнар.
Хайди таныхтапча Ирина Туспиякова, часхы-кӱскӱде ӧрттер саны ӧс парча. Ол сылтағнаң диспетчерлер тоғызы ідӧк хозылча. Пірееде кізілер хончыхтары сӧп-сапты ӧртепчелер тіп сығдыратчалар.
- Андағ искіріг кірзе, піс аны МЧС-тың сыныхтағчыларына читірчебіс. Олар, орынзар сығып, от тамысхан кізілерге штраф салчалар. Ідӧк пістің службаның тоғынӌылары патрульға сыхчалар.
Іди ӧрт ӱзірчеңнер, диспетчерлернең палғалыс тудып, ӧрт хабылған орынзар табырах читчелер, кізілер чуртазын, ис-пайын арачылирға прай кӱстерін салчалар.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы