ӦӦН СУРЫҒЛАР КӦДӀРӀЛДӀ
21.04.2021
Хабарлар
УСТАҒҶЫЛАР ЧООҒЫ
Хакасия пазы - Хакасия правительствозы кнезі Валентин Коноваловтың съездте тутхан чооғынаңар алғым арах. Хайди ол таныхтаан, республика устағ-пастааның ӧӧн пӧгіннерінің пірсі хакас чонның тілін, кибір-чозахтарын хайраллиры полча.
- Че Хакасияның амғы олаңай нимес тустағы экономиказының тилізі чох культураны алғыдар оңдай чоғыл. Олох туста, чуртағҷыларға чал ахчазы тузында тӧлелзін, тураларында чарытхынаң чылығ ползын тіп, республика правительствозы прай кӱзін салча. Ахчанаң сидіксіністер полза даа, пӱӱнгі кӱнге муниципальнай пӱдістернің кредит ӧдістерін тӧлир сурығны 99%-ке пӧк салғабыс. Паза пу чыл оларға чылығ пирҷең тусха тимнен саларына хоза 45 миллион салковай кӧріл парған.
Хакастар кӧп чуртапчатхан аалларға «Ааллар тилізі» федеральнай программа хоостыра чахсы полызығ иділче. Национальнай кадрлар тимнирінде хабазығ пӧзік синде апарылча, ол санда республика тастында специальность алчатхан чииттерге, - чарытхан Валентин Олегович.
Хакасия нацпроекттерде ӧткін араласчатханын ідӧк таныхтаан республика устағҷызы. Оларны хоостыра пу кӱнге теере пістің регионда асхынах нимес Культура туразы, школа, олған сады пӱдіріл парған. Правительствоның кічіг паза ыраххы аалларны тилідер пӧгінніг программазынаңар алынҷа чоохтаан ол.
- Аал хониина хабасханы этно-туризмні тилідерге оңдай пирче. Хакас чонның чуртазынаң, культуразынаң аалларда ла чахсы танызып аларға чарир нооза. Оларныңох кӧбізінде тигір алтындағы музейлер тӧстел парғаннар. Хакасияда хумартхы тастар уғаа кӧп. Оларны паза ибіркі чир-чайаанны хайраллирынҷа тоғыс ідӧк асхынах нимес апарылча, - теен Хакасия пазы.
Чоохтирға кирек, Хакасия правительствозы паза Улуғлар чӧбі ӧнетін чӧптезіг пазыбысханнар. Аны хоостыра пис чылда пір хати иртірілчеткен съездте кӧдірілген сурығларны пӧгерге хабазар тоғысчы ӧме тӧстелген. Кӧзідімге, 13-ҷі съездтегі Улуғлар чӧбінің чӧбін санға алып, Хакасия правительствозы «Хойбал чазызының кӧллері» заказник тӧстирдеңер алғым тоғыс толдырыбысхан. 2020 чылда Птичье, Собачье, Заливное кӧллерге «ӧнетін хадағдағы чирлер» ат пирілген. Паза ӱр ниместе ле Таштып аймаанда «Маранкульский» чир-чайаан паркы тӧстелген.
Хакасия Ӧӧркі Чӧбінің кнезі Владимир Штыгашев, тізең, «ХакНИИЯЛИ-даңар» закон проектін тимнебізеріне ӧӧн хайығ салған.
- Хакасияның пу наука-істезігліг институды хакас тілін, литературазын, хакас чонның тархынын паза культуразын хайраллир, тилідер иң ӧӧн кіннернің пірсі полча нооза. Аның тоғызына хабазар закон хайди даа кирек тіп санапчам. Ол проектті тимнирге институт устағчызының тоғызын толдырчатхан Нина Майнагашеваа паза Хакас Республикаҷа хазна инспекторы Николай Сайбараковха чахығ пирілген, - теен Владимир Николаевич.
САННАР, ХОРАДЫҒЛАР
Пӱӱнгі кӱнде хакас чон ӱс чӱске чағын родтаң пӱтче. Оларзар тиксі пис муң азыра фамилия киріл парған. 15 апрельде ирткен хакас чонның 14-ҷі съездіне, тізең, 400 делегат хығыртылған полған. Оларның ӱгредиинеңер искіріглерні санға алған соонда мындағ танығлар иділгеннер: делегаттарның кӧбізі - 322 кізі - пӧзік ӱгредігліг, 19 кізі - ученай степеньніг паза 60 кізі - ортымах ӧнетін ӱгредігліг.
**********************************************
Материлларны толдыразынаң хығырарға сағынчатхан улусха газетаның PDF-кӧрiмiне пазын саларға сурынчабыс.
Чол мында - http://khakaschiry.ru/gazetaa-pazynys.php
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде