Коммунардағы рудник хорғыс ағылбинча
21.04.2021
Хабарлар
Хакасияӌа Россия МЧС-ының ööн управлениезiнде республика пазының орынӌызы Юрий Курлаев Шира аймаандағы Ах Ӱӱc cуғда хоора палыхтар öлген хоостыра пазох чыылығ иртiрдi. Пу кӱннерде, «Коммунардағы рудник» ПАО-ның дамбазын тыыдып, улуғ тоғыс парды. Тыхтағлар ам даа тоозылғалах. Ағаа хоза, рудникте Москвадаң паза Хызылчардаң килген Ростехнадзорның комиссиязы тоғынча. Олар дамбаны сыныхтапчалар. Тӱрчедең салтарларын искiрерлер. Дамба нормативтерге килiccе, хорғыс паза ағылбас.
– Пiстiң иң ööн пöгiн – палыхтар öлген орынның ибiркi чир-чайаанын паза суғны сыныхтиры, – теен Юрий Николаевич. – Регионның чир-чайаан ис-пайы паза экология министерствозынаң Росприроднадзор суғны сыныхтаға алып алғаннар. Аның cалтары чöпсiндiрбезе, сыныхтағларны узарадарбыс, палыхтарның öлген сылтаан тiлирбiс.
Таныхтирға кирек, майых парған палыхтарда оолығ ниме-ноо табылбаан. Аннаңар хооралар хырылғанында палыхчылар пыролығ поларға айабас. Олар токтығ хармахтарнаң даа палыхтапчалар.
Хакасия пазының орынӌызы Юрий Курлаев чир-чайаан ис-пайы паза экология министерствозына республикадағы пасха гидротехническай пӱдiрiглернi хайығда тударға чахығ пирген.
Автор :
Татьяна Тютюбеева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы