ОЛАР ЧОННЫ ӦРТТЕҢ АРАЧЫЛАПЧАЛАР
12.05.2021
Хабарлар
Танығлығ кӱн. МЧС-тың Крыловтың орамазында орныхчатхан туразы хыринда ӧрт ӱзірчең службаның 372 чылына чарыдылған пайрам ирткен
Пістің хазнабыстың чуртағҷылары 1994 чылның 30 апрельінең сығара ӧрт ӱзірчең службаның тоғынҷыларын алғыстапчалар. Ол кӱн тоғыста пӧзік чидіглерге читкен тоғынчыларға медальлар, Аарластығ паза алғыстас пічіктері читірілчелер. Пӱӱл дее ол кибір сайбалбаан.
Ӧрт ӱзірчең службада істенчеткен иреннер пайрамнығ кӱнде, стройға турыбызып, аарлығ аалҷыларны удурлааннар. Россия МЧС-ының Хакасияча ӧӧн управлениезінің пастығы Александр Мулл, ӧрт ӱзірҷеңнерзер айланып, оларға чылығ сӧстер читірген:
- Мин полған на тоғынҷаа аның аар паза хорғыстығ тоғызы ӱчӱн улуғ алғызым читірчем. Сірер кӱннің сай чурғағӌыларыбысты ӧрттең арачылапчазар. Пістің системада уғаа нандырығлығ кізілер істенчелер. Олар хаҷан даа чонға полызыға килерге тимделер.
Хакасия пазы Валентин Коновалов, махачы иреннерзер айланып, таныхтаан:
- Ӧртӱзірчең служба 300 чыл артиинаң чир-суғҷыларыбысты ӧрттең арачылапча. Пӱӱнгі кӱнде наа техника пар даа полза, сірерге тоғызыңарда махачы тудынарға кирек полча. Чир-суғҷыларыбысха полызып, ӧрт ӱзірчең службада істенчеткен улусха постың даа чуртазын пир саларға килісче. Аннаңар мин махачы хылииңар ӱчӱн сірерге улуғ алғызым читірчем. Чыл сай апрель-майда пістің республикадағы ӧрт ӱзірчең службаларның кӧп тоғыс полча. Че, андағ даа полза, сірер тоғызыңарны пӧзік синде апарчазар.
Анаң кибір хоостыра аймах ӧрт ӱзірчең службаларның пӧліктеріне аарлығ сыйыхтар читірілген. Кічіг судноларҷа хазна инспекциязының пастығы Евгений Граф наа УАЗ-тың клӱзін холға алған паза наа КамАЗ-тар клӱстері МЧС-тың Хакасияҷа ӧӧн управлениезінің хорғыстығ киректерде устаҷаң кіннің пастығы Андрей Сазоновха, ӧрт ӱзірҷең службаның пастағы отрядының пастығы Николай Бондаренкаа читірілген.
Ідӧк, кӧп чыл тӱзімніг істеніп, тоғыста пӧзік чидіглерге читкен ӱчӱн «Хакасияның істеніс сабланызы» медальнаң «Ӧрттең тоғыр служба» хазна управлениезінің пастығы Александр Кужаков таныхтатхан.
Чоохтирға кирек, Александр Антонович 44 чыл азыра ӧрт ӱзірҷең службада істен парир. Ағаа тоғыс хоостыра хазнабыстың аймах регионнарында істенерге киліскен.
- Мин істеніс чолын 1977 чылда Иркутскта курсант полып пастаам. Анаң Москвада Олимпиада тузында тоғынғам. Соонаң тоғызымны Хызылчарда узаратхам. 1982 чылда мин Хакас автоном облазынзар айланғам. Тӧреен чир-суумзар айланғандох, мині Абазазар тоғынарға ысханнар. Амды мин Ағбанда орныхчатхан ӧрт ӱзірҷең службада тоғынчам. Мағаа пӱӱн сыйлалған медаль - ол минің не чидиим нимес, ол ідӧк миннең хада істенчеткен арғыстарымның пӧзік чидии полча, - теен Александр Кужаков.
Ол кӱн ӧрт ӱзірчең чаачыларға Аарластығ пічіктер читірілгенӧк. Ол санда Хакасияныц 41№ ӧрт ӱзірҷең частьтағы караул пастығы Георгий Тохтобин полған.
Автор :
Ольга ТОМОЧАКОВА
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
