ЧУРТАСТЫ ЧАХСЫЛАҢДЫРАРҒА КӰСТЕНЧЕЛЕР
28.05.2021
Хабарлар
Марығ салтары. 26 майда Хакасияның тиліс фондында «Иң чахсы социальнай проект» марығның чиңісчілерін таныхтааннар
Пӱӱл пу марығның региондағы чардығында 30 азыра кізі араласхан, оларның 12-зі чиңісчі полыбысхан. «Иң чахсы социальнай проект» марығ 2015 чылдаң сығара иртірілче, чылдаң чылға араласчыларның саны ӧсче. Марығда ӱгредіг, имнег, туризм киреене, аал-город ӧңненізіне теелчеткен проекттер араласчалар.
Хакасияның экономика тилізі министерствозының пос кирее паза садығ тилізі департаментінің устағӌызы Анастасия Ходько марығ чиңісчілерін паза араласчыларын алғыстаан.
- Минің кӧрізімнең, «Иң чахсы социальнай проект» - уғаа чахсы марығ. Пістің республикада пу сурығ уғаа кирек паза «тіріг» полча. Хакасияда социальнай сурығларнаң айғасчатхан хазнани нимес организация илееде. Оларның кӧбізінің ідӧк ӧӧн бизнезі пар. Че, іди дее полза, идінӌектер чахсы кирекке пос тузын айабинчалар, пірееде ахчанаң даа хорадынчалар, чонға тузалығ проекттерні чуртасха кирерге кӱстенчелер. Тоғызыңар ӱчӱн улуғ алғыс! Хазых полыңар, сағынған сағызыңар толзын, ӧзіс оңдайларын таап алыңар! - алғыс сӧстерін читірген идінӌектерге Анастасия Ходько.
Марығ чиңісчілеріне дипломнар паза сыйыхтар читірілгеннер. Оларның санында Анна Фролова, Юрий Казаклиу, Вячеслав Осипов, Наталья Беловитина, Сергей Овчинников, Наталья Трапезникова, Светлана Кузьмина, Наталья Зубарева, Александра Булгакова, Анатолий Туганашев полғаннар.
Нымырттығ поселоктың чуртағӌызы, идінӌек Анатолий Туганашев кинек кізілерге оборудование сығарарынаң айғасча. Ол оборудование ӧӧнінде инсульт, инфаркт ағырығдаң ирееленчеткен кізілерге, ДЦП-лығ палаларға реабилитация иртерге полысча. Идінӌек ДЦП-лығ палаларға велосипедтер, «ходункилер» сығарча. Ирткен чылда Анатолий Туганашев, 1,5 миллион салковай грант алып, «ходункилерге» хазна регистрациязының удостоверениезін алып алған.
- Хазна удостоверениезін аларына кӧп ахча кирек. Хакасия правительствозы хабазиинаң піске аны алып аларға ӱлӱс тӱскен. Амды тендрлерде аралазар правобыс пар. Аймах тендрлерде аралазып, марығларда утып алғабыс. Амды Крымзар, Калининградсар, Оренбургсар, Екатеринбургсар «ходункилер» садарбыс. Піс сығарчатхан осхас «ходункилерні» Хыдат чирінең не ағылҷаңнар, че пістің «ходункилерібіс» хыдаттағызынаң ӱс хати ниикке турча, аннаңар оларны чахсы алчалар. Оларнаң ӧӧнінде ДЦП-наң ағырчатхан олғаннар тузаланчалар. «Ходункилердең», велосипедтердең пасха, піс чӱгӱрҷең чолыҷахтар, вертикализаторлар паза реабилитация комплексін тимге сығарчабыс. Реабилитация комплексі полызиинаң чӧр полбинчатхан кізілер пас чӧрерге ӱгренчелер.
Піс Саяногорсктағы реабилитация кініне оборудование тимнеп пиргебіс. Хакасияның чуртағӌылары даа удаа айланчалар. Пістің регионның чуртағӌыларына ниме-нооны 10 % ниик паанаң сатчабыс. Кӱскӱзер «чӧріс имитаторы» тренажерға регистрация удостоверениезін алып аларға сағынчабыс. Ол тренажер ідӧк пас чӧр полбинчатхан кізілерге кӧрілген, - теен Анатолий Туганашев.
Пӱӱл октябрь айда Хакасияның экономика тилізі министерствозы социальнай кирекнең айғасчатхан идінӌектерге грант мариин иртірерге пӧгінче. Гранттар сині - 500 муң салковай. Анатолий Туганашев пу марығда аралазарға пӧгінче.
Автор :
Оксана ЧЕЛТЫГМАШЕВА
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде
