СІЛІГ ЧИРІБІСТІ УҢДУТПАЗЫННАР
02.07.2021
Хабарлар
Ус холлығлар марии. 24-25 июньда республикадағы Л.Р.Кызласовтың адынаң чир-суғ ӱгренҷең музейде туристтерге оох-теек сыйыхтар тимнепчеткен устарның марии ирткен. Амды аның салтарларын искірчебіс
Пістің республикада чуртапчатхан ус холлығлар туристтер сыйыхха алар 134 оох-теек тоғыстарын кӧзідіг-марыға сығарғаннар. Пу тиксі Россия синіндегі марығның региондағы чардығына саналча. Алай ба аны таллағ марии тиирге чарир.
Марығны асхан паза анда чоох тутхан Хакасия пазының - Хакасия Правительствозының кнес орынҷызы Ирина Войнова. Ирина Ивановна, марығ араласчыларын мындағ танығлығ кӱннең алғыстап, арға-мӧрійде маңат чидіглерге чидерге, Хакасияны махтаға сығарарға алғаан. Аның сӧстерінең, пӱӱнгі кӱнде туризмні тилідерінеңер тилекейдегі прай даа хазналар сағыссырапчалар. Мында ӧӧн пӧгін - туристтерні пос чирінзер кӧбдин тартып ал турары. Аны толдырарында чорых чӧрчеткеннерге оох-теек чахсы сыйыхтар тимнирі хомай нимес хозым итчеткенін таныхтаан пастых кізі.
Ирина Войнованың сағызын узаратхан чіли, тиксі Россия синіндегі «Туристтер сувенирі» марығның тӧстегҷізі Геннадий Шаталов хазнабыста пу чӧрімге хайдағ улуғ хайығ салылчатханын таныхтаан, аймах-пасха регионнарның чидіглерінең таныстырған. Тиксі хазнабыста пу марығ 2015 чылда пасталтыр. Хакасия анда 2020 чылдаң сығара ла араласча, че пастағы сынағда тӧрт номинацияда сыйыхтығ орынға турысхан.
Ус холлығларның марыға сығарған тоғыстарын сыыхтирға ӧнетін ӧмелер тӧс-телгеннер. Оларның тоғызынаң устааннар Хакасияның аалҷызы Геннадий Шаталов, республиканың культура министрі Светлана Окольникова паза Л.Р.Кызласовтың адынаң чир-суғ ӱгренҷең музейнің директоры Андрей Готлиб. Чайаачы тоғыстарға баллар хоостыра паалағлар пиріл турғаннар. Іди марыға сығарылған 134 тоғыстың 28-і сыйыхтығ орынға сыхханы таныхталған. Олар тиксі Россия синіндегі марығда аралазарлар. Ол марығ пӱӱл сентябрь айда Саранск городта иртердеңер искірілген. Чиңісчілер санында Татьяна Корневаның, Максим Норканың, Елена Минчактың, Надежда Премининаның паза даа пасхаларының чайаачы ӧмелері адалғаннар. Оларға сыйыхтар пирілген - 40 муң салковайға сертификаттар. Улуғ хомзынысха, чиңісчілер санында хакас ус холлығларның аттары истілбин парған.
Олох арада Геннадий Шаталов позының чазыттығ чарадиин прайзына искірген: хай пірее ус холлығлар постарының тоғыстарын садыға килістіре тимнеп салзалар, оларға Саранскта иртер марығда аралазарға оңдай полар. Андағларның саны кӧп нимес, че олар матап сіренербіс теен осхастар.
Таллағны чахсы ирт парыбысхан хай пірее чайаачы тоғыстар тиксі Россия синіндегі марығда Хакасияның презентациязында аралазары чарлалған. Ол сылтағнаң тимнегліг тоғыстарға Хакасияның правительствозы 200 муң салковай позыдар пол салған. Иң чахсы тоғыстар ээлеріне хырығ озаринда даа иртчеткен марығларда аралазарға чӧп пиргедег осхастар.
СІЛІГ ЧИРІБІСТІ УНДУТПАЗЫННАР
Мына хайдағ ырах чол азылча ус холлығларға. Анзы, тізең, Хакасияда сығарылчатхан оох-теек сыйыхтар продукциязын пасха хан чирлерінзер дее садар оңдай пирче.
- Мин хакас омалығ кӧклӧчектернең хачаннаң сығара айғасчам. Пу марығда хыныға ла аралас кӧрерге чарадыбысхам. Пістің чонның алнын аларға кирек нооза, - чалахай кӱлімзірепче Асхыс аймаандағы Калинин аалның ортымах школазында ус холлығларның кружогын апарчатхан Валентина Терентьевна Ултургашева. - Мында кӧп тузалығ чӧп истіп алғам.
Тиксі Россия синіндегі «Туристтер сувенирі» марығның пастағҷызы Геннадий Шаталов чайаачы тоғыснаң айғасчатхан ус холлығларнаң пу сыныхтағ тузында хайдағ сағыстар тӧреенінең ӱлескен. Оларның ӧӧні - туристтерге садарға тимнелген чайаачы тоғыстарның таңдағызы харахха тасталбинча. Пірее маңат кӧзідімнер парлар, че олар уғаа асхынах саннығлар. Чорыхха сыхчатхан кізілер постарының хайиин тартчатхан кӧклӧ онҷааҷахтарны таныстарына даа алып аларға тимделер, че ээзі паза тимнебиндір. Туристтер, тізең, пір орында ӱр тудылбас чон нооза, оларға наа чирлер кӧріп аларға, хакастарның чуртас оңдайын, кибірлерін, татхыннығ чиистерін піліп аларға кирек. Аннаңар, хайдағ даа ус холлығ кізі ползаң, сіліг кӧрімніг наа кӧклӧҷектерні тимге сығарарын олар сағыбастар, хыйа пастыра халарлар.
- Мында иң артығы мына ниме - Хакасияда чуртапчагханнарыңны хаҷан даа ундутпаңар. Туристтер сірернің сіліг чиріңерні Бурятиянаң алай Дагестаннаң алчаастабасха киректер. Уламох пасха хан чирлерінең килген кізілерге анзы аарлығ пілдірче полар, - сала даа ікінҷілебинче Геннадий Васильевич, час чазап таа салған полза, айтыс пілбес кізі.
Мағаа, тізең, ікі кӱн ирткен марығ тузында чапсых полған піліп аларға: Хакасияда ус холлығлар саны 904 кізее читче. Оларның піреезі ле пасха хан чирлерінең садығ апарча. Итсе, Хакасияда туристтерні чапсытчаң орыннар толдыра. Олар тохтапчатхан орыннарда оох-теек сыйығастарны садыға сығарарға чарир. Хайдағ даа кізі, узах чорыхха сыхчатса, пірее ниме сыйыхха алып аларға кӧмезек ахчаҷах хайди даа ізебіне сух саладыр. Ол ахчаны мында, Хакасияда, артыс халарға кӱстенерге кирек. Иб-чурттарынзар нандыра айланзалар, сіліг сомнарына, сыйыхтарына махтанарлар, таныстарын чахайах осхас Хакасияда хайди даа полып аларға чӧптирлер. Пеер килген туристтер сыйых чох мыннаң сыхпасха киректер - мына чапсых марығның ӧӧн пӧгіні.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде