"Чир чайаан" 11-ӌi хатап iзиин асча
03.07.2021
Хабарлар
Пӱӱн, республиканың тöреен кӱнiнде "Нымах" кöклöлер театрында 11-ӌi хатап Чоннар аразындағы эколого-этническай фестиваль пайрамни азылды. Пӱӱлгi 11-ӌi хатап иртiрiлчеткен фестивальға Израильдең Руслан Вольфсон килген. Пандемия тузында пiстiң чир-суғӌыларыбыстың иң хынған фестивальына кöп хазнадаң аалӌылар кил полбааннар. Че, андағ даа полза, хай пiреезiнең палғалыс Интернет пастыра тудылар. Андағларның санында Франциядағы, Финляндиядағы паза Италиядағы чайаачы устар. Олар, фестивальның араласчыларынаң конференцияларда, "тегiлек" столларда палғалызып, постарының сағыстарынаң ӱлезерлер. Чоохтирға кирек, пӱӱлгi эколого-этническай фестиваль хазнабыстағы аймах театрларны пiрiктiрче. Олар, пiстiң Хакасиязар ааллап килiп, чир-суғӌыларыбысты постың репертуарларынаң таныстырчалар. Алтынзарых Осетия, Татарстан, Алтай республикалардаң, Санкт-Петербург, Москва, Железногорск, Мариинск, Иркутск, Новосибирск городтардаң килген артисттер республиканың чуртағӌыларына аймах ойыннар кöзiдiлер. Че оларны кöрiп аларға прайзына оңдай полбас. Театрлардағы заллар 50%-ке пос орыннығ поларлар. Аннаңар чуртағӌыларға кöп спектакльларны онлайн кöрiп аларға чарир полар.
Улуғ аалӌыларыбыстың чапсых ойыннарын Вконтакте социальнай сетьте мындағ ссылкаӌа парып https://vk.com/chir_chayan "фестиваль онлайн" чардыхта кöрерге чарир.
Танығлығ кӱнде iдöк улуғ аалӌыларға сöс пирiлген. Хакасия пазы Валентин Коновалов аймах театр öмелерiн, чир-суғӌыларыбысты фестиваль азылғанынаң паза Республика кӱнiнең алғыстаан. Ол "Чир чайаан" фестиваль хазнабыста уғаа пöзiк паалалчатханын таныхтаан.
Автор :
Ольга Томочакова
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде