ОЛҒАННАРДАҢ ТОҒЫР САЙБАҒЛАР ПОЛБАЗЫН
14.07.2021
Хабарлар
Комиссия чыылии. Хакасия правительствозындағы чазы читкелектер киректерінҷе паза оларның праволарын арачылирынҷа комиссияның чыылии ирткен
Пӱӱл республикада олғаннардаң паза саарбахтардаң тоғыр, кӱснең тузаланып, 102 сайбағ иділген. Іди палаларның хазиин сайбааннар, сохханнар, ӧдірерге сағынғаннар, кӱл саларға кӱстенгеннер. Сайбағҷылар холынаң 112 пала хыйалға кірген - андағ искіріг Хакасияҷа МВД чыылығда читірген. Олғаннарға паза саарбахтарға кӱл салчатхан сайбағлар саны ӧсчеткені сағыссыратча. Пу чылның пастағы чардығында ла андағ 64 сайбағ таныхталған, 36 сайбағны таныстары иткен, 19 - сӧбіредегі кізілері, 3 сайбағ соцсетьтер пастыра иділген.
- Удаа андағ сайбағлардаң хыйалға кірчелер 11 -14 частығ саарбахтар. Аның ӧӧн сылтағлары: чазы читкелектерні кӧрчеткен кізілер паланы чахсы ӧскірер тоғызын толдырбинчатханы, олғаннар хайда полчатхаңың сыңыхтағда тутпинчатхаңы, профилактика органнарының хомай тоғызы, иң пастап ӱгредіг учреждениелерінің, социальнай педагогтарның, психологтарның тӧбін профессионализмі паза даа пасхазы, - таныхтаан Хызылчар крайынҷа паза Хакасияҷа Ӧӧн істезіг управление устағҷызының орынҷызы Дмитрий Позовский.
Олғаннарға паза саарбахтарға амды Интернет улуғ хорғыс ағылча. Тайма аккаунттарда чазынып, оларнаң пір частығ кізі полып, сайбағҷылар паланы оой киртіндіріп алчалар, анаң кӱл салчалар. Ідӧк олған порнографиязын, тимнеп, таратчалар. Оларға тоғырланарға сидік полча.
- Сайбағҷылар паланы хорғыдар аймах оңдайларнаң тузаланчалар, - чоохтаан Дмитрий Позовский.
Че кӱснең тузаланып иділчеткен сайбағлардаң пасха даа сурығларға хайығ тың киректелче.
- Ниме дее полза, республиканың пу чылның пастағы чардығында кӱснең тузаланып иділчеткен сайбағлар саны хызырылчатхаңы таныхталча. Хомзынысха, сайбағларда чуртастарын пир салғаннар саны ӧс парған - ол 13 кізі, - чоохтаан Хакасияңа МВД-ның чазы читкелектер киректерінҷе пӧлиинің пастығы Евгения Антипина.
Саарбахтар постарына хол салыныбысчатханы ағырсымнығ сурыға айланча. Пӱӱл 6 айға посха хол салынғаны 30 хати таныхталған, че олар читіре иділбееннер. Піреезі, ӧнетін кӧзідіп, хол салынчатхан полча. 5 кізі, позына хол салынып, ӱреен.
Хайди специалисттер таныхтапчалар, хорғыста 15 - 17 частығ саарбахтар полча. Хол салынарға кӱстепчеткен ӧӧн сылтағлар: психология саринаң сидіксініске кір парғаны, туғаннарынаң паза нанҷыларынаң киліс полбинчатханы, чағыннары паланың сурығларына хайығ салбинчатханы. Ідӧк полған на паланың чазы хоостыра психологияҷа позының алынҷа сидіксіністері сығысча.
Хакасияда олғаннардаң паза саарбахтардаң тоғыр сайбағлар полдыртпас пӧгіннең профилактика тоғызы тӧреміл апарылча. Ӱгренҷілерні имҷілер сыныхтапчалар. Наркология паза психиатрия службаларының тоғынҷылары психотропнай имнерге тартылчатхан паза психиказы сайбалчатхан саарбахтарны сыбыра сыныхтағда тутчалар.
Чазы читкелектердең тоғыр, кӱснең тузаланып, сайбағлар итчеткеннерні ілезіне сығарар пӧгіннең, профилактика мероприятиелері иртірілче, сыныхтағлар апарылча. Олғаннарға киртініс телефоны тоғынча. Ӱгренҷілернең паза оларның паба-іҷелерінең хорғыс чох тудынар сурығларҷа, ол санда Интернетте профилактика чоохтазығлары апарылча.
Прай искіріглерні санға алып, комиссия кирек чарадығлар алған, профилактика органнарына чахығлар пирген.
Автор :
Виктория ТИТОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы