«СПУТНИК V» ВАКЦИНАНЫҢ ТУЗАЗЫ
14.07.2021
Хабарлар
Имнег кирее. Ӱр ниместе Британияда сыхчатхан «Nature» наука журналында, «Спутник V» препараттың тузазынаңар паза кізі хазиина хорғыс ағылбинчатханынаңар статья сыххан
«Спутник V» («Гам-КОВИД-Вак») вакцина Н.Ф.Гамалеяның адынаң эпидемиология паза микробиология чоннар аразындағы істезігліг кінде тимнелген.
Хайди чарытхан статьяның авторы Бьянка Ногради, «Спутник V» - тилекейде пічікке кирілген коронавирустаң тоғыр пастағы вакцина. Полған ол 2020 чылның август айында. Істезігнің салтарларын сығарар алнында, Россияның хазых хайраллаҷаң министерствозы вакцинаны турғыстырарға чаратхан. Статьяның авторы таниинаң, аннаңар имнег тоғынҷылары - паза чон вакцинадаң тоғырлан сыхханнар. Хайди кӧзіткен істезіглернің III чардығы, препараттың тузазы 91,6 %-ке тиңнелген, халғанҷы істезіглерҷе - 97,6%-а ке теере ӧс парған, «Дельта»-штаммны кӧрзе - 90 %. Россия вакциназының кӧзідімнері, Astra Zeneca паза Johnson&Johnson вакциналарнаң тиңнестірзе, хай-хай пӧзік.
Россияның препарады 70 азыра хазнада турғызылча тіп таныхталған «Nature» журналда. Аргентинада, Венесуэлада паза Турцияда аның сығарызын ӧскірчелер. Иранда паза Венгрияда чонға иммунизация иртірерінде улуғ туза ағылған.
Хайди искірген Хакасияның хазых хайраллаҷаң министрі Олег Ананьевский, республика чуртағҷыларының кӧбізі «Спутник V» вакцинаны турғыстырча:
- Хакасиязар ӧӧнінде «Спутник V» вакцина килче, хайзы кізее хорғыс ағылбинчатханың паза тузазын кӧзіткен, - таныхтааң республиканың хазых хайраллаҷаң министерствозының устағҷызы. - Сағам пістің региоңда ағырчатханнарның аразында чииттер кӧп. 40 час ас парған пациенттер аар ағырчалар. COVID--19-таң арачыланҷаң оңдайлар - ол вакцинация иртері паза эпидемиядаң тоғыр кӱрезері: маска паза перчатка кизері, удур-тӧдір оортах тудынары, уламох кӧп чон полчатхан паза садығ тураларында. Вакцинацияа пазыныңар. Вакцина республиканың имнег тураларында читкіҷе. Посты паза чағыннарыңны хайраллаңар.
Автор :
Елена КУМИНОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы