СЫН ПАЗА ИПТІГ ИРТЕРІН КӦРЕРЛЕР
16.07.2021
Хабарлар
Табығлар-2021. Хакасия правительствозы, регионның Табығ комиссиязы паза республиканың Халыхтар палатазы аразында Хазна Думазы депутаттарына табығларға халых штабын тӧстирдеңер чӧптезіг иткеннер
Хакасияның пазы Валентин Коновалов, республиканың Табығ комиссиязының кнезі Александр Чуманин паза Халыхтар палатазының кнезі Ольга Левченко халых штабы тӧстелердеңер пічікте 13 июльда хол салыбысханнар.
- Халых штабы табығлар сын ирт парзын тіп тӧстелче. Пісті пір пӧгін піріктірче - чуртағӌыларыбыстың табығ праволарын арачылиры паза табығлар азых, сын иртері, - таныхтаан Валентин Олегович.
Александр Чуманин табығлар хайди иртерін сыныхтағда тутчатхан штабты тӧстеен ӱчӱн Хакасияның Халыхтар палатазына алғызын читірген паза штаб тоғызына хабас пирерге молҷаан.
- Табығ кампаниязын иртірерінде пістің опыдыбыс пар. Табығлар иптіг ирт парарына ізенчем. Халыхтар палатазы табығларда полар киректерні сын читірерге молӌапча, - теен Ольга Левченко.
Халых штабы республиканың культура-музей кінінде орнығар. Анда ӧнетін ӱгредігліг эксперттер тоғынарлар, хайзылары табығлар тузында сығыс килген киректерҷе чонға консультация пирерлер. Штабта ідӧк «ізіг линия» тоғынар. Табығлар хайди иртчеткенін сыныхтапчатхан кізілер, кӧрігҷілер поларлар. Хакасияда андағ пір муңҷа кізі тоғынар. Олар табығ орыннарындағы сайбағлардаңар штабсар искірерлер. Кӧрігҷі поларға сағынчатхан кізее ӧнетін ӱгредіг иртерге кирек. Аның ӱчӱн Халыхтар палатазынзар айланарға киректелче.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде