НАЦПРОЕКТТЕР ПАЗА ЧАЙҒЫДАҒЫ ТЫНАҒ
21.07.2021
Хабарлар
Ӱлгӱ. Киҷее Валентин Коновалов Хакасия правительствозының теестегі чыылиин иртірген
Чыылығның тоғызы Хакасия правительствозының чарадығлар проекттерін ӱзӱрерінең пасталған. Пастағы чарадығ проекті - «Хакас Республиканың экономика тилізі паза инвестициялар тартарын ӧскірері» хазна программазына алызығлар кирердеңер.
- Кирілчеткен алызығлар субсидияларға теелчелер, хайзылары пістің муниципалитеттерге инфраструктура объекттерін пӱдіреріне, нааӌылирына хорадығларның чардығын чабарына позыдылчалар, - искірген Хакасияның пазы Валентин Коновалов.
Чарадығ проектінең Хакасияның экономика тилізі министрінің пастағы орынҷызы Роман Ковтун таныстырған. Хайди ол искірген, 2021 чылдаң пасти республикада инвестиция тоғызына хабасчаң наа оңдай тоғынча - ол моногородтарның бюджеттеріне, инвестициялығ проекттерін чуртасха кирер кӧстегнең, инфраструктура объекттерін пӱдіреріне, нааҷылирына хорадығларның чардығын чабарына субсидиялар пирері.
Хакасияда амғы туста 6 моногород: Харатас, Саяногорск, Абаза, Сорығ, Тӧӧ пазы паза Тойым. Хазна программазына кирілчеткен алызығлар хоостыра Шира аймаандағы Тойымға, «Тойымдағы ойымзар» парчатхан чолны нааҷылирына проект-смета пічіктерін тимниріне, 5 миллион салковай пирілер тіп искірген Роман Ковтун. Ол чолны нааҷылааны туристтер санын ӧскірер тіп кӧрілче.
Ікінҷі чарадығ проекті республика правительствозының пічіктернең алызарын электроннай оңдайға кирҷең регламентті чарадыға алардаңар полған. Пу сурығҷа Хакасияның саннығ тиліс паза палғалыс хазна комитеді кнезінің орынҷызы Павел Шаламов чоох тутхан. Аның таниинаң, саннығ технологиялар кирерінің пӧгіні - хазна устаа тоғызының тӱзімін кӧдірері. Ол кӧстегҷе чаҷыннығ пічіктер орнына электроннай пічіктернең тузаланарына кірері кӧрілче.
- Пілдістіг, пу кӧстег орта - піс электроннай пічіктернең тузаланарын чуртасха ӧткін кирерге кирекпіс, - таныхтаан Валентин Коновалов. - Ол чуртағӌыларнаң палғалыс тударын нииктепче, ӱлгӱні чонға чағын итче. Че, хомзынысха, пістің хай пірее аалларда Интернетнең сидіксіністер ам даа пар. Ол сурығларны пӧгерге кирек. Полған на аалны Интернеттіг ит салбаанда, электроннай пічіктерге саңай кірердеңер чоох апарарға ирте.
Республика пазы хазна комитедіне ол пӧгінні ундубасха чахығ пирген.
Чыылығның ікінҷі чардығы пістің республикада национальнай проекттер чуртасха хайди кирілчеткеніне чарыдылған. «Демография», «Ӱгредіг», «Хазых хайраллиры», «Культура» нацпроекттерңе сан пиріснең Хакасия пазының орынҷызы Ольга Пономарева чоох тутхан.
- Пӱӱл Хакасияда пу тӧрт национальнай проектті чуртасха киреріне 2 миллиардча салковай позыдылған, - искірген ол. - Ол ахчаның 1,7 миллиард салковайы - федеральнай ахча, 300 миллион салковайы - республика бюджедінің ахчазы паза 17 миллион салковайы - муниципальнай бюджеттер ахчазы.
Пӱӱл нацпроекттер хоостыра республикада онкология диспансерінің радиология корпузы, Асхыс аймаандағы Пирікчул аалда паза Ағбан пилтіріндегі Чапаев аалда 250 орыннығ наа школалар, Харатаста 300 орыннығ, Ағбанда 120 орыннығ паза Пии аймаандағы Новокурск аалда 80 орыннығ олған садтары пӱдірілчелер, ідӧк Тойымдағы психоневрология интернадында - 200 орыннығ чуртаҷаң корпус.
Ирткен неделяда Шира аймаандағы Наа чир аалдағы школа тимге сыхханнаңар акт алылтыр. Пӱӱл Ағбан пилтірі аймаандағы Тазоба пилтірі аалда наа олған сады азылған, ідӧк амғы туста Асхыс аймаандағы Пилтір аалда наа олған садын тузаланысха кирҷең пічіктер тимнелчеттір.
Пӱӱл нацпроекттер полызиинаң 15 аалның Культура туразында, 2 искусство школазында (Ағбанда паза Асхыста) тыхтағ тоғыстары толдырылар, республиканың имнег туразының пір корпузы нааҷылалар. Аннаң пасха, пір хазна школазында паза 10 муниципальнай школада спортзаллар тыхталча, оларға амғы тусха килістіре спорт оборудованиезі алылча тіп искірген Ольга Пономарева.
«Культура» нацпроект хоостыра республикада ікі модельнай библиотека тӧстелер, Культура туралары чох аалларҷа чӧреріне тӧрт автоклуб алылар. Пастағы имнег полызиин пирерін тыыдарына прай аймахтарға кӧс чӧрҷең имнег комплекстері алылчаттыр: флюорографтар, маммографтар паза диагностика итчең комплекстер. Пірее аалларда модульлығ ФАП-тар пӱдірілче осхас.
Хакасия пазы Валентин Коновалов графиктең халчатхан пӱдіріглерге алынңа хайығ саларға чахығ пирген.
- Кізілер олған садтарын, амбулаторияларны, ФАП-тарны, школаларны сағыпчалар, - таныхтаан ол. - Прай объекттер тузында тузаланысха кирілерге кирек.
«Хорғыс чох паза чахсы чоллар» паза «Экология» нацпроекттерче сан пиріснең Хакасия пазының орынҷызы Юрий Курлаев чоох тутхан.
- «Хорғыс чох паза чахсы чоллар» национальнай проект хоостыра республикада региональнай проекттер чуртасха кирілче. - искірген ол. - 2021 чылда чолларны нааӌылирына паза тыхтирына 1 миллиард 256 миллион салковай кӧріл парған, оларның 533 миллион салковайы - федеральнай ахча, 707,4 миллион салковайы - республика бюджедінің ахчазы, 15,8 миллион салковайы - орындағы бюджеттер ахчазы.
Нацпроект хоостыра тиксі 52,2 километр чолларны иптирі кӧрілче, оларның 34 километрі - регион чоллары, 18,2 километрі - орындағы чоллар. Подрядчиктер прай 25 объектче тоғыстарны пастабыстырлар. Кӧк хайа, Шира, Хубачар паза Тазоба пилтірі аалларда тоғыстар толдырыл партыр, 162 миллионңа салковай тузаланылтыр.
Республика пазы чолларны иптир сурығны тӧреміл хайығда тударға паза неделя сай искірерге чахығ пирген. Халғанҷы сурығ олғаннарның чайғы тынаа пӱӱл хайди иртчеткеніне чарыдылған. Пу сурығҷа Хакасияның істеніс паза социальнай тиліс министрі Ирина Ахметова чоох тутхан.
Аның искіриинең, палаларның чайғы тынаа пӱӱнгі кӱнде узарадылча. Республика олғаннары 12 олған лагерьінде тынанчалар, оларның чарымы - 6 олған лагерьі - Хызылчар крайында орныхча. Амғы туста олған лагерьлерінде 1654 пала хазиин пиктепче. Чайғы пасталғаннаң 20747 палаа хазыхтанар паза тынанар аймах оңдайлар пирілтір.
Хомзынысха, палалар паза лагерь тоғынҷылары аразында СОVID-19 чуғынҷах ағырығ тарааны учураптыр, Таштып аймаандағы «Серебряный ключ» паза Минсуғ аймаандағы «Дружба» лагерьлерде.
- Таштып аймаандағы лагерьде 6 тоғынӌы ағырыбысханы ілезіне сығарылған, - чарытхан Ирина Ахметова. - Палаларны сыныхтаанда, ағырығ табылбаан.
Лагерь тоғынҷылары обсерваторзар, палалар иблерінзер ызылтыр, прай лагерьде дезинфекция иртірілтір. 8 июльдаң ікінҷі смена тоғынча, пӱӱнгі кӱнде анда 150 пала тынанча тіп искірген министр.
Минсуғ аймаандағы «Дружба» лагерьде пір воспитательнің паза 20 паланың ковид ағырығ ілезіне сығарылтыр. 5 пала Ағбандағы чуғынҷах ағырығлар имнег туразынзар ызылтыр, пасхазы - иблерінзер.
Ікінҷі сменаа парчатхан олғаннарны прайзын ковидке сыныхтаптырлар. Тесттер иртіргенде, 44 паланың чуғынҷах ағырығ пары ілезіне сығарылтыр.
- Ол палаларны ілезіне сығарғаны чуғынӌах ағырығ тарапчатхан орыннар сығызарын тохтадарға оңдай пирген, - таныхтаан Ирина Ахметова. - Ол тоғыс амды узарадылар.
Ӱзінҷі смена 30 июльдаң тоғын сығар тіп кӧрілче, прай 12 лагерь тоғызын узарадар.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы