ЧОНҒА СОЦИАЛЬНАЙ ХАБАЗЫҒ
23.07.2021
Хабарлар
Кӧні эфир. Хакасияның істеніс паза социальнай тиліс министрінің пастағы орынҷызы Владимир Чебодаев, чонға кӧрілген хазна хабазығларын чарыдар ӱчӱн, кӧні эфир иртірген
Хазнада чуртас синін чахсыландырар ӱчӱн, аймах социальнай хабазығлар кирілчелер. Олар уйан чуртапчатхан кізілерге пирілчелер. Тиксі хазна хабазығларын чонға читірер ӱчӱн, министерство позының сайтында паза социальнай сетьтерде хабарлар, искіріглер сығарча.
Ӱр ниместе Инстаграм соцсетьте істеніс паза социальнай тиліс министрінің пастағы орынҷызы Владимир Чебодаев кӧні эфирде чуртағҷыларның социальнай контрактха теелчеткен сурығларына наңдырған.
- Нимедеңер ол социальнай контракт?
- Социальнай контракт - ол чуға чуртапчатхан чуртағҷыларға хазна хабазығларының пірсі, хайзы сидік чуртас оңдайынаң сығарға полысча. Россия президентінің чахиинаң 2021 чылдаң сығара национальнай пӧгін хоостыра тӧбін парыстығ кізілерге чуртас синін чахсыландырарына национальнай контракт тоғынып пастаан.
- Мындағ хазна хабазиинац кем тузалан полар?
- Ол чуға чуртапчатхан сӧбірелерге, уйан чуртапчатхан чалғыс кізілерге кӧрілче, хайзыларының парыстары республикада пір кізее кӧрілген чуртап парыбызар синнең асхынах. Амғы туста Хакасияда ол 11784 салковайға тиңнелче. Ідӧк социальнай контрактты тоғыс кӱзіндегі чуртағҷылар ла ит поларлар. Ол 18 частығдаң 67 часха теере иреннер паза 18 частығдаң 59 часха теере ипчілер, хайзылары I паза II группа кинектері санына кірбинчелер.
- Социальнай контракттың сині хайдағ паза аны нимее хорадарға чарадылча?
- Иң пастағызын чарыт пирербін, социальнай контрактха ахча федеральнай паза регион бюджеттерінең кірче.
Республикада сӧбірелерге хабазыға 17 миллион салковай пирілгең, ол хорадыл парған. Федеральнай бюджеттең 175 миллион салковай позыдылған. Аны хорадарға чарир:
1) тоғыс тілиріне (50 муң салковайға теере);
2) пос киреенең айғазарына (250 муң салковайға теере);
3) мал-хус тударына (інек, хой, ибдегі хустар, аарлар аларына алай хазаалар пӱдіреріне, тыхтирына паза аал хонии техниказын садызарына) 100 муң салковайға теере;
4) профессиональнай ӱгредіг паза хоза профессиональнай ӱгредіг аларына (30 муң салковайға теере пирілче).
- Социальнай контракттаңар толдыразынаң хайда піліп аларға чарир?
- Хакасияның істеніс паза социальнай тиліс министерствозының сайтында «Социальнай хабазығ оңдайлары», «Социальнай контракт» пӧліктерде піліп аларға чарир. Ідӧк чуртапчатхан орнындағы чонға социальнай хабазығ пирчеткен управлениеде толдыразынаң чарыт пирерлер. Пу неделяда министерствоның Инстаграмдағы официальнай сайтында специалисттернің телефоннарын сығарарбыс.
Ідӧк пістің специалисттерібіс, аймах-городтарзар чӧріп, орындағы устағ-пастағнаң паза социальнай контракт идерге сағынчатханнарнаң тоғазып, толдыразынаң чарыдарлар. Хайдағ кӱннерде паза нинҷе часта тоғазығлар иртірілерін Инстаграмдағы сайтта піліп аларға чарир.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы