РОССИЯ СПОРТСМЕННЕРІ ӰЧӰН «АҒЫРАРБЫС»
23.07.2021
Хабарлар
Олимп ойыннары-2020. Пӱӱн Токиода тилекейнің иң улуғ марығлары пасталча. Анда 200 хазнаның спортсменнері кӱстерін сынир. Тиксі алза, 11 муң кізі
Пу Олимпиада, ирткелек полза даа, спорт тархынына кір парған. Анзы тиктең нимес. Амғы Ойыннар 1896 чылдаң Пьер де Кубертеннің пастаанынаң иртчелер. Че пастағызын на оларны чылдырарға киліскен. Пӱӱл дее тилекейнің иң улуғ марығлары чуғынҷах ағырығ тохтабинчатханнаңар полбас тіп чочыныс полған.
Че пандемия тузында даа сағынған сағыстар толча. Пӱӱн Токиода XXXII Олимп ойыннары пайрамни азылар. Таныхтирға кирек, Японияда Олимпиада тӧртінҷі хати иртче. Пастағызын спортсменнер анда 1964 чылда марығласханнар. 1972 паза 1998 чылларда іскеркі хазнада хысхы Олимп ойыннары ирткен. Амды чапчаңнарны паза кӱстіглерні пазох Токио удурлапча. Марығлар пӱӱл иртчеткенде, «Олимп ойыннары-2021» поларға кирек, че Чоннар аразындағы спорт комитеді (МОК) 2020 чылны артыс саларға чаратхан. Итсе-де, СМИ-лар-да «Олимпиада-2020» дее, «Олимпиа-да-2021» дее пазылғанын кӧрерге чарир.
Марығлар 23 июльдаң 8 августха теере парар. 19 кӱн аразына спортсменнер, 33 спорт кӧрімінҷе кӱстерін сынап, 339 медаль чыындызы ӱчӱн марығлазарлар. Ол син кӧп медаль алыңдағы Ойыннарда полбаан. Пӱӱл программаа наа спорт кӧрімнері киріл парған. Чапчаңнар паза кӱстіглер каратэде, хайаҷа сығарында, сёрфингте паза скейтбордта устарын кӧзідерлер. Ідӧк япон чонның пастаанынаң программазар бейсболнаң софтболны пазох кир салғаннар. Пу спорт кӧрімнеріне іскеркі хазнада най тың хынчаттырлар. Каратэде пістің спортсменнердең Анна Чернышева аралазар. Абахай хыс 55 килограммда харбазар. Хайаҷа сығарында пістің хазнадаң Алексей Рубцов, Юлия Каплина паза Виктория Мешкова кӱстерін сынирлар.
Россияның піріктірілген командазынаңар чоохтаза, Олимп ойыннарында 335 кізі араласча: 150 ирен паза 185 ипчі. Россияның олимп комитедінің (ОКР) чаламазын Софья Великаянаң Максим Михайлов апарарлар. Олимп чемпионы Софья Александровна фехтованиенең айғасча. Волейболист Максим Михайлович 2012 чылда алтын медальны холға кирген. Хатығластар ӱчӱн спортсменнерге Россия чаламазын апарарға чаратпааннар. Ағаа хоза, чир-суғҷыларыбыс чиңіс тутса, хазнабыстың гимні орнына композитор П.И.Чайковскийнің музыказы толдырылар. Хатығластар допингнең палғалыстығ тіпчелер, сынында аңдағ оңдайнаң политика сурығлары пӧгілче. Таныхтирға кирек, 2018 чылдағы Олимпиадада пістің спортсменнерге хатығластар аннаңох тың полған.
Медальлардаңар чоохтаза, «Спорт-Экспресс» порталның таниинаң, Россияның піріктірілген командазы 58 - 73 медаль холға кирер оңдайлығ. Порталның хабарҷылары иң кӧп медаль суғда чӱзеріңде (12), кӱресте (9) полар тіп сағынчалар. Боксерлар постарын турыстыра кӧзідерлер тіп ізеніс пар. Пу спорт кӧрімінде Россияның ӱчӱн тилекейнің тӧрт чемпионы турызар. Прайзының алнында США-ның командазы полар, ікінҷі орынға хыдаттар сығарлар. Россия Олимп ойыннарында ӱзінҷізі полыбысса, чахсы поларҷых, че сынында кирек хайдағ оңдайнаң парыбызары пілдізі чоғыл. Таныхтирға кирек, амғы Олимп ойыннарында медальлар тузаланған смартфоннардаң паза компьютерлердең чайалғаннар. Техниканы Японияның чуртағҷылары чығаннар. Медальларда алтын, кӱмӱс паза хола хайди даа полар.
Коронавирустың ӱчӱн пӱӱл Олимпиада хырығ озариндағы кӧрігҷілер чох иртер. Орындағы чуртағҷыларны пірее марығларға кирерлер. Спортсменнер СОУГО-19 ағырыға тӧреміл сыныхтағ иртерлер. Оларға Олимп аалдаң сығарға чарадылбас. Іди дее полза, пӱӱн ӱр сағаан Ойыннар пасталча, олар тилекейнің прай чуртағҷыларына кӧп ӧрініс ағыларлар. Аарлығ хығырығҷылар, Олимп ойыннарын кӧріңер, пістің спортсменнернің ӱчӱн «ағырыңар».
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы