ИМНЕГ УЧРЕЖДЕНИЕЛЕРІНЕ - НАА АВТОМОБИЛЬЛЕР
28.07.2021
Хабарлар
Хазна программазы. Киҷее Хакасияның правительство туразы алнындағы ачыхта республиканың 14 имнег учреждениезіне наа автомобильлер клӱстері пайрамни читірілген
ХАКАСИЯНЫҢ ХАЗЫХ ХАЙРАЛЛАҶАҢ МИНИСТЕРСТВОЗЫ «ПАСТАҒЫ ИМНЕГ-САНИТАР ПОЛЫЗИИН НААҶЫЛИРЫ» ФЕДЕРАЛЬНАЙ ПРОГРАММАҶА 39 НАА АВТОМОБИЛЬ АЛҒАН. МЫНДАҒ ТАНЫҒЛЫҒ КИРЕК ХАКАСИЯ ПРАВИТЕЛЬСТВОЗЫ ПАЗА РЕСПУБЛИКАНЫҢ ХАЗЫХ ХАЙРАЛЛАҶАҢ МИНИСТЕРСТВОЗЫ ХАДА-ПІРГЕ ТОҒЫНҒАН СЫЛТААНДА ПОЛҒАН.
Хакасия пазы Валентин Коновалов паза республиканың хазых хайраллаҷаң министрі Олег Ананьевский имнег учреждениелерінің устағҷыларына клӱстерні пайрамни читірерінде араласханнар.
- Имнег учреждениелерінің автопаркы федеральнай программаҷа нааҷылалча. Автомобильлерге тиксі 27,3 миллион салковай хорадылған, ол санда федеральнай бюджеттең - 26,7 миллион салковай, республика бюджедінең - 600 муң салковай.
Чуртағҷыларға имнег полызии тузында паза чахсы пирілер ӱчӱн улуғ хайығ салылча. Пӱӱнгі автопарк анзына полызар тіп сағынчам. Автомобильлер ӱр паза сайбалбин тоғынзын. Имнег полызии хаҷан даа тузында читірілзін - чоохтаан Хакасия пазы Валентин Коновалов.
Наа транспорт ағырчатхан кізілерні имнег учреждениелерінзер ағыларына, имнег істезиине алылған анализтерні тарт чӧреріне паза ыраххы ааллар чуртағҷыларына имнер читіреріне кӧрілче.
Наа автомобильлер республиканың аймах-городтарның имнег учреждениелерінҷе киректелчеткені хоостыра тарадылған: 15 «Лада Гранта», 13 «Лада Ларгус» паза 11 «Лада Веста».
«Лада Ларгус» алғаннарның санында Таштып аймаандағы ӧӧн имнег туразының ӧӧн имчізі Юрий Мохов наа транспорт хайди тузаланылардаңар паза нинҷе машина парынаңар чарытхан:
- Пістің имнег туразында ниикке чӧрчең паза табырах имнег полызиин пирчең тӧртер автомобиль. Чайғызын 2020 чылда табырах полызығ пирчең транспорт пирілген, пӱӱл январьда «Лада Гранта» алғабыс, амды - «Лада Ларгус». Мындағ ӧріндірчеткен киректер тоғысха кӱс хосча. Наа автомобильнең аймах істінде участковай служба тузаланар.
Наа машина соонча Юрий Моховнаң хада улуғ опыттығ водитель Игорь Чебодаев килген. Ол аймахтағы имнег туразында 8 чыл істен парир. Наа транспорт читірілчеткеніне водитель ӧрінче. Аның таниинаң, амды чӧрчеткен машиназар кӧп ниме сал полбас. Кӧзідімге, имнер соонҷа парза, кӧп ал полбас. Наа автомобильге илееде ниме сыыр.
Имнег учреждениелеріне наа транспорт «Пастағы имнег-санитар полызиин нааҷылиры» федеральнай программаҷа алылча. Республиканың имнег учреждениелеріндегі автотранспорттың паза оборудованиенің нааҷылазы улуғ нимес хаалағларнаң мыннаң мындар узарадылар.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы