ПӦЗІК АТТАР ПАЗА ААРЛЫҒ СЫЙЫХТАР
28.07.2021
Хабарлар
Сыйыхтар. От айының 26-ҷы кӱнінде Хакасия пазы Валентин Коновалов республиканың сигіс чуртағҷызына хазна сыйыхтарын читірді
Пу улуғ нимес пайрамнығ чыылығда кӧп кізі араласпаан: регион устағҷызы Валентин Коновалов, аның орынҷызы Ольга Пономарева паза республика чонының чуртазын, экономиказын чахсыландырарына пос хозымын итчеткен сигіс чуртағҷы. Пӱӱл Хакас Республиканың 30 чылын алғым пайрамнаҷаң оңдайлар чох полғаннаңар, правительство турыстыра чуртағҷыларына хазна сыйыхтарын чардыхти читірче.
Валентин Коновалов чыылығ араласчыларына кӧп чыл тіспен тоғыстары ӱчӱн алғызын читірген паза полғанына ла хазых, часка, чахсы чуртас алғаан. Пастап республика пазы Россияның аарлығ сыйыхтарын читірген, анаң - Хакасияның сыйыхтарын.
I степеньніг «За заслуги перед Отечеством» орден медальын П.С. Непорожнийнің адынаң Сойан-Сус ГЭС-тың оперативнай служба станциязының смена пастығы Михаил Нефедев паза II степеньніг «За заслуги перед Отечеством» орден медальын Харатастағы тыхтағ механика заводының токарьы Игорь Рябчиков істеністегі чидіглері ӱчӱн паза кӧп чыл тіспен тоғынған ӱчӱн алғаннар. Хакасияның ӱгредіг паза наука министрінің орынҷызы Татьяна Карташова Россияда коронавирус чуғынҷах ағырығ тымозы тузында чуртағҷыларға хабасчаң мероприятиелерні тимниріне паза иртіреріне хозымы ӱчӱн Россия президентінің алғыстазын алған.
Хакасиядағы протез-ортопед предприятиенің механигі Сергей Вшивков «Трудовая доблесть Хакасии» медальға турысхан.
ХТИ-ның улуғ ӱгретчізі Валентина Кокова «Хакасияның пӧзік школазының саблығ тоғынҷызы» ат алған. Аның ӱгредіг паза наука киреене, пӧзік квалификациялығ специалисттерні тимнепчеткен киреене хозымын турыстыра паалааннар. Асхыс аалда тӧреен-ӧскен Валентина Кокова национальнай школаны тоосхан соонаң Москвадағы тимір чол транспортының инженерлері институдында «ЭВМ» специальностьты алған. 1977 чылда чиит специалистті ХТИ-зар тоғынарға ысханнар.
- Пастап математика кафедразынзар килгем, анда наука кіні тоғынған, - сағысха кирген Валентина Иосифовна. - 1990 чылдаң сығара ӱгретчі полып пастаам, ол туста алынӌа компьютерлер чуртасха кирілген. Іди мин 44 чыл пу институтта істен парим.
Пӱӱнгі кӱнде улуғ ӱгретчі «Прикладная информатика, математика и естественно-научные дисциплины» кафедрада тоғынча паза компьютер технологияларынаң палғалыстығ нинҷе-де дисциплина апарча. Хакас техническай институт Сибирьдегі федеральнай университетсер кірчеткенде, ӱгредіг учреждениезінің позының нап-наа технологиялары пар. Оларға тӧстене, вузта тымо тузында ӱгредіг апарылған. Ӱгредіг киреенең пасха институтта социальнай программалар пар, кӧзідімге, ӧкіс студенттерге алынҷа куратор турғызылча. Валентина Иосифовна іҷе-паба чох халған пір пала ӱчӱн нандырча. Институт тоосханҷа аның ӧӧн полысчызы полар.
Ідӧк Хакасияның саннығ тиліс паза палғалыс комитедінің кнес орынҷызы паза пӧлік пастығы Павел Шаламов паза Боград аймаандағы Улуғ Чорба аал чӧбінің специализі Светлана Доброхотова Хакас Республиканың Аарластығ пічиинең сыйыхтатханнар. Хакасия пазының алғыстазы хазнаның істеніс инспекциязының устағҷызы -Хакасиядағы ӧӧн хазна істеніс инспекторы Ольга Токманға читірілген.
Регион пазының орынҷызы Ольга Пономарева сыйыхха турысхан чур-тағҷылар алнында пайрамнығ мероприятие алғым иртірілбинчеткен ӱчӱн пыросынған паза Хакасияның тиксі чуртазына улуғ хозым ағылчатханнары ӱчӱн алғыс сӧстерін чоохтаан. Мероприятие республика пазынаң хада пірге сомнаң тоозылған.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы