ЧААӋЫ ИМНЕГ КИРЕЕ КӰСТІГ
28.07.2021
Хабарлар
Имнег кирее. Пу наада хабарҷылар Харатастағы А.И.Лебедьтің адынаң хазых пиктеҷең кінде орныхчатхан чааҷы госпитальы тоғызынаң танысханнар
Чоохтирға кирек, чааҷы госпитальы Хакасиязар от айының 17-ҷі кӱнінде кӧскен. Оларға пістің республикада коронавирус ағырығнаң кӱрезерге полызығ читірердеңер чахығны Россияның арачыланыс министрі, армия генералы Сергей Шойгу Хакасия пазы Валентин Коноваловтың айланызынҷа пирген. Челябинск облазындағы Центральнай чааҷы округынаң 100 орыннығ кӧс чӧрҷең госпиталь пір кӱн аразына республиказар чиде тӱскен. Пӱӱнгі кӱнде чааҷы имҷілері республика чуртағҷыларына коронавирустаң озарға полысчалар.
Чааҷы госпитальында хабарҷыларға «хызыл» пӧлікте пол килерге оңдай пирілген, че прайзына нимес: пір хабарҷаа, сомҷаа паза телевидение операторларына, сынап олар СОУІD-19 ағырығдаң вакцинация иткен ползалар. Аннаңар прививка итірген не хабарҷыларға ізік азылған. Госпиталь имҷілері чіли, прайзы арачыланыс костюмын кискен. Ікі час тоғыс соонаң хабарҷылар имнег туразынаң ӧл ле сыхханнар. Имҷілер, тізең, андағ оңдайларда тӧрт час тоғынчалар, республиканың имнег тураларында 12 часха даа читіре.
Ағырчатханнарны хайди имнепчеткеннерін чарыт пирген госпитальның имҷі-терапевті Наталья Михно:
- Чааҷы госпитальында 70-ҷа кізі имненче, прайзы ниик алай ортын ағырығ. Оларға хазых хайраллаҷаң кирексіністерҷе имнег читірілче. Коронавирус, пасха чуғынҷах ағырығларнаң тиңнестірзе, сала аар иртче, аннаңар ағырчатханнарға андағох хатығ хайығ киректелче. Полған на кізінің ағырчатханы тиксі паалалып, имнег алынҷа кӧрілче.
Наталья Игоревна чуғьнҷах ағырыға аймах частығлар хаптырчатханын сизінче, че оларның аразында чииттер алай улуғлар кӧп полчатханын таныхтабинча. Улуғлар аар ағырчалар, аннаңар оларға сала ситкіп хайчалар. Иң пастағызын коронавирус ӧкпее хомай теелче, аңаң пасха органнарға: чӱрекке, пӱгӱректерге, паарға паза пасхазына. Ағырығның кізі хазиинҷа ағылған ӱрегні пір саңай паалирға уғаа сидік, аннаңар кӧбізіне чазылып алған соонаң тиксі сыныхтанарға паза хазыхты пиктирге чӧп пирчелер.
Чааҷы имҷілерінең пасха, госпитальда Ағбандағы имнег туразының имҷі-инфекционизі Юлия Дорофеева паза улуғ медсестра ла тоғынчалар. Олар имнер паза имнеге кирек ниме-ноо ӱчӱн нандырчалар.
- Чааҷы госпитальын тоғындырары ниик ле нимес кирек, - тіпче Юлия Ивановна. - Че сидіксіністер пар полза даа, ағырчатханнарға имнег толдыразынаң читірілче, госпитальдаң оларны, толдыразынаң имненіп алзалар ла, сығарчалар. Олар прайзы чааҷы имҷілері, пӧзік тимнегліглер, чалахайлар. Пілдістіг, чааҷы имнег кирее кӱстіг. Чоохтирға кирек, алында пу кінде Ағбандағы имнег туразы коронавирустаң имненҷең кінні асхан, че специалисттер чидіспинчеткен, чааҷы госпитальында аңдағ сидіксініс чоғыл.
Чааҷы госпитальы А.И.Лебедьтің адынаң хазых пиктеҷең кінде тоғынып пастааннаң, анда республиканың 15 чуртағҷызы коронавирустаң имненіп алған, 78 кізі коронавирустаң ам даа имненче. Орыннар ӱр пос турбинча, позып парғанох кӱн андар наа кізіні чатырчалар.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде