ПІЛІС КӰНІНЕ ПРАЙ ШКОЛАЛАР ТИМДЕ ПОЛЗЫН
30.07.2021
Хабарлар
Пу неделяда Хакасия пазы Валентин Коноваловтың устаанынаң Харатас городта ӱгредіг чылына тимненеріне чарыдылған улуғ чыылығ ирткен. Анда республиканың ӱгредіг паза наука министрінің орынӌызы Анатолий Бутенко, город-аймах пастары паза ӱгредіг управлениелерінің пастыхтары араласханнар. Хайзылары сан пиріс онлайн иткеннер.
Чыылығ. Хакасияның прай ӱгредіг организациялары наа ӱгредіг чылына тимде поларға киректер. Андағ пӧгін турғысхан Хакасия пазы Валентин Коновалов республиканың муниципалитет пастарына паза ӱгредіг управлениелерінің пастыхтарына.
Чыылығда «Ӱгредіг» паза «Демография» национальнай проекттер хоостыра 7 объекттің пӱдірии ӱзӱрілген. Алынӌа хайығ айландырылған ӱгредіг организацияларының хорғыс чох поларына, ол санда коронавирус чуғынӌах ағырығдаң.
Чыылығ алнында Хакасия пазы Валентин Коновалов Харатастағы гимназияда пол килген. Пӱӱл пу школада пірге хазна сыныхтағларын 100 баллға тудыбысхан ӱгренӌілер илееде полған. Анда 1400-че олған ӱгренче. Школа ікі корпустаң пӱтче. Пастағызында пасталығ класстар ӱгренчелер, ікінӌізінде - ортын паза улуғ класстағылар. Че хаӌаннаң ала городта палалар саны ӧсчеткенде, 1 - 4 класстағы олғаннар пастағы корпусха сыыспин сыхханнар. Аннаңар кічіглернің чардығы ідӧк улуғларнаң хада пір корпуста піліс алча.
- Пӱӱл піс ӱс пастағы класс азарға пӧгін тутхан полғабыс, че палалар кӧп пис пастағы класс азарбыс. Ӱгретчілерні гимназиязар тартып аларынӌа кӧп тоғыс апарғабыс, ол санда Хакас хазна университедінең, - чоохтапча директор Светлана Шевченко.
Пис чыл мының алнында гимназия грант утып алған. Аны хоостыра 1-ғы классха чӧрчеткен ӱгренӌілерге алынӌа группа азылған. Хайда олғаннар, уроктар соонаң тынанып, азыранчалар, ойнапчалар паза узупчалар. Анда уроктар итчең паза узуӌаң алынӌа орыннар кӧріл парған. Хайди чоохтапча директор, пу группа іӌе-пабаларның хайиин матап тартча. Олар палаларын андар хынып пирчелер. Грантнаң СУЭК хабасхан. Аның сині - 180 миллион салковай.
Тиксі гимназияда, тізең, ирткен чылда килкім тыхтағ тоғыстары апарылған. Столовайда поллар, стенелер иптелген, чарытхы системазы нааӌылалған, наа вентиляция турғызылған. Школаның пастағы паза ікінӌі корпустарында тыхтағ тоғыстары иділчетсе дее, анда кухня оборудованиезі, парталар, одырчыхтар иргі. Пу сурығнаң гимназияа город администрациязы полыс пирер. Хайди искірген муниципалитет пазы Василий Белоногов, пӱӱл город бюджедінең наа оборудованиее ахча позыдылар. 20 августха теере прай тыхтағ тоғыстары тоозыл парарға паза наа оборудование турғызыларға кирек.
Амды тиксі чыылығдаңар. Хайди тимненче Хакасияның ӱгредіг организациялары наа ӱгредіг чылына? Аннаңар чоохтап пирген ӱгредіг паза наука министрінің орынӌызы Анатолий Бутенко.
Анатолий Алексеевичтің искіриинең, ааллардағы школаларны ӱгредіг чылына тимниріне пӱӱл 27 миллион салковай позыдылған. Ол спортзалларны тыхтиры, чылығ пирӌең системаларны нааӌылиры паза даа пасхазы. Ідӧк пу чылда республика федеральнай кіннең 18 наа школа автобузын алар. Пии аймаандағы Новотроицкай паза Ширадағы 18 № школаларда тыхтағ тоғыстары тоозыларға кирек. «Точка роста» паза «Цифровая образовательная среда» кабинеттерні тӧстирінде улуғ тоғыс апарылча. Анда спонсорлар чахсы полысчалар. Іди РУСАЛ 10 миллион салковай позытча. Спонсорлар паза республика бюджеді позытхан ахчаа кабинеттерде тыхтағ тоғыстары апарылар, мебель алылар. Федеральнай кін оборудование аларына 20 миллион салковай позыдар. Пӱӱл тиксі 13 компьютер кабинеді азыларға кирек.
- Тиксі алза, республиканың школаларында 8 августта сыныхтағлар пасталар. Амды прай школалар ағаа тимненчелер паза сығысчатхан читпестерні тӱзетчелер, - таныхтаан Анатолий Бутенко.
Тимнегліг тоғыстарнаң пілдістіг полза, республикада национальнай проекттер хоостыра пӱдірілчеткен объекттер 1 сентябрьға теере тимге сых полбазынаң чочыныс пар.
- Пір сентябрьға Шира аймаандағы Наа чир, Ағбан пилтіріндегі Чапаев ааллардағы паза Ағбандағы школалар ӱгренӌілерге ізіктерін хайди даа азарлар. Чочыныс ағылча олған садтарының тузында тимге сыхпазы. Ол Асхыс поселоктағы, Шира аймаандағы Ит кӧлдегі паза Пии аймаандағы Новокурсктағы школа алнындағы учреждениелер, - хосхан министр орынӌызы.
Шахтерлар городында 24 олған сады паза 12 школа. Наа ӱгредіг чылына удур ӱгредіг организацияларында столовайлар, спортзаллар тыхталча, чарытхы паза чылығ пирӌең системалар нааӌылалча. Ағаа хоза кӧзенектер, хырлар алыстырылча, мебель, оборудование турғызылча.
Чыылығда Пригорсктағы олған садын паза школаны тыхтирына алынӌа хайығ айландырылған. Хайди піс пілчебіс, ирткен хысхыда анда котельнайда саай пол парған, палалар соохха тоңаннар. Аның сылтаанда чуртағӌылардаң Хакасия пазы адына кӧп хоп кірген. Пу сидіксіністі тӱзедеріне республика правительствозы Харатасха 16 миллион салковай позытхан, че орындағы ӱлгӱ ӱгредіг организацияларын тыхтирға маңзырабинча осхас.
- Василий Васильевич, Пригорсктағы олған садын паза школаны хысхаа тимнебезеңер, мин позым пір сентябрьда андар килербін, - хатығ чоохтанған Валентин Олегович. - Чуртағӌыларның алнында постарың сӧс тударзар, піс пирген ахчаны хайдар иткенің паза ноға олған садында паза школада соох полчатханын чоохтирзар.
Асхыс аймаанда 58 ӱгредіг организациязы. Амды школаларда паза олған садтарында тыхтағ тоғыстары парча. 2 - 12 августта приемнай комиссиялар тоғынып пастирлар. Аймахтың ӱс школазының спорт залы тыхталча: Асхыстағы лицей-интернатта, Ӱс чулдағы паза Пилтірдегі 2 № школаларда. Пу кирекке 7 миллион азыра салковай кӧріл парған. Прайзында тыхтағ тоғыстары 1 сентябрьға тоозыл парарға кирек.
Че прай ла ниме чахсы нимес. Олардаңар чыылығда Асхыс аймаа пазының орынӌызы Евгений Костяков искірген:
- Пилтірде пӱдірілчеткен олған садының сидіксіністері чох полза, Асхыс поселокта пӱдірілчеткен олған сады пір сеңтябрьға пӱдіріл полбазынаң чочыныс пар. Че піс аны тузында тимге сығарарға прай кӱзібіс салчабыс.
Хакасия пазы Валентин Коновалов Асхыс аймаана паза даа пасха муниципалитеттер устағ-пастаана Россияның просвещение министерствозының специалисттері августтың халғанӌы кӱннерінде республиказар сыныхтағнаң килерінеңер искірген. Аннаңар нацпроект хоостыра пӱдірілчеткен объекттерні кӧріл парған тусха хайди даа тимге сығарарға кирек.
Харатас городтаң паза Асхыс аймаа устағ-пастаанаң пасха, ідӧк Хакасия пазы алнында чоох тутханнар Ағбан пилтірі, Шира аймахтарының, Саяногорск, Ағбан городтарның пастары паза ӱгредіг управлениелерінің пастыхтары. Олар прайзы наа ӱгредіг чылына тимненістеңер сан пиріс иткеннер. Полған на муниципалитетте тимненіс пасха-пасха синде парча. Че пар пір сидіксініс, хайзын полған на муниципалитет пазы таныхтаан - ол ӱгредіг организацияларын хадарары. Амғы чахығ хоостыра, полған на школа паза олған сады хадарыларға кирек. Оларны Росгвардия алай ба хазнани нимес предприятие хадағӌылары хадарарға киректер. Че ӱгредіг огранизацияларында паза муниципалитеттерде пу кӧстеге ахча кӧрілбеен, аннаңар пу чахығны олар толдыр полбинчалар. Хакасия пазы Валентин Коновалов пу сурығны пӧгер оңдай табарына хабас пирерге молӌаан.
Халғанӌызында Валентин Олегович нацпроекттер хоостыра тыхталчатхан паза пӱдірілчеткен ӱгредіг учреждениелерін Піліс кӱніне тоос саларға чахығ пирген.
- Алынӌа хайығ айландырарға хығырчам пӱдіріглерні санға турғызарына паза лиңензиялар аларына. Пу сурығларны муниципалитет пастары постарының хайиинда тударға паза, сыңыхтағ чағын палғалызып, сығысчатхан сурығларны сӧӧ тартпин, табырах пӧгерге кирек. Республиканың школалары приемнай кампанияны иптіг иртіп алзын. Піліс кӱнінде пістің палалар сіліг, чарых паза арығ школазар кірзіннер - салтар иткен Хакасия пазы Валентин Коновалов.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы