ХЫСХЫ ТУСХА ТИМНЕНІС ПАРЧА
30.07.2021
Хабарлар
Тоғыс чорығы. Пу кӱннерде Хакасия пазы Валентин Коновалов Хубачардағы 5 № котельнайда пол килген
Ирткен хысхыда Хубачар аалдағы 5 № котельнайының ікінҷі хазаны оодыл парғаннаңар, чылығ пирерінде сидіксіністер полған. Котельнайның ээзі хазан тыхтағ кирексіпчеткеніне хайығ салбаҷаң. Хакасия правительствозы котельнайны Хубачар аал чӧбіне пирердеңер чарадығ алған. Пу пӧгінге республика ӱлгӱлері 6,5 млн салковай пиргеннер. Майда аал чӧбі котельнайны садызып алған.
27 июльда Валентин Коновалов котельнайны кӧріп алған. Хубачар аал чӧбінің пазы Александр Мин Те Хо ікінңі хазанны тыхтирына хайдағ тоғыс толдырыл парғаннаңар чоохтаан:
- Таңда-пірсікӱн Бийсктең паза Барнаулдаң хоза частьтар ағыларлар. Понедельник-вторникте олар пеер чидерге киректер. Ікінӌі хазанны сайабысхабыс. Ізіг суғ пирерін тохтат салғабыс, 15 августха пир сығарбыс. Ікінӌі паза ӱзінӌі котельнайларны тыхтабысхабыс. Олар хысхы тусха тимделер.
Алтай аймаа устағ-пастааның туразында аймах чылығ пирңең тусха хайди тимнен салғанына чарыдылған чыылығ ирткен. Анда Хакасия пазы Валентин Коновалов, орынҷызы Ирина Войнова, республиканың пӱдіріг паза ЖКХ министрінің орынҷызы Анатолий Безлепкин, Алтай аймааның пазы Татьяна Раменская, Хубачар аал чӧбінің пазы Александр Мин Те Хо, аал чӧптерінің пастары араласханнар.
- Пӱӱл Хубачарға 20 миллион салковай позытхабыс. Ирткен чылығ пирчең туста аймах кініндегі котельнайда сидіксіністер полған. Ол кӧп чыл тоғынча, кирексіністерге нандырбинча. Чылығ пирҷең системаны нааҷылир сағыс пар. Че пӱӱл піске котельнайны тыхтабызарға кирек. Хыстап алар ӱчӱн, тыхтаға ла 16 миллион азыра салковай позытхабыс. Анаң аалны «Ызыхтағы» разрезтің котельнайына піріктірібізерге пӧгінчебіс -таныхтаан Валентин Коновалов.
Татьяна Раменская Алтай аймаа хысхы тусха хайди тимнен салғаннаңар чоохтаан. Аймахтағы ӱс аалның (Хубачар, Хойбал, Кӧк хайа) чуртағҷыларына чылығ котельнайлардаң пирілче. Аршаннар, Очыр аалларның котельнайлары чылығ пирчең тусха толдыразынаң тимделер, Ызых посёлоктың, Новороссийскай, Чынай, Хойбал аалларның котельнайлары - 80 процентке, Хубачар аалның котельнайы - 20 процентке. Тиксі аймахта чылығ пирҷең сетьтернің тимненізі 80-ча процентке тиңнелче. Очырда паза Аршаннар аалларда суғ пирҷең сетьтер хысхы тусха тимнел парғаннар, Чынай, Новороссийскай аалларда, Ызых поселокта - 70 процентке. Очыр, Чынай, Новороссийскай, Аршаннар аалларда чылығ пирчең сетьтерні тимнебіскеннер.
Алтай аймаанда кӧп квартиралығ 36 тураа чылығ котельнайлардаң пирілче. Оларның 67 проценті алай 24 туразы хысхы тусха тимде, ол санда Хубачар аалның кӧп квартиралығ 31 туразының 21-і, Кӧк хайа аалның пис туразының ӱзі.
Пӱӱнгі кӱнге аймахтағы котельнайларда 1000 тонна хара тас пар. Ол ирткен чылығ пирчең тустаң халған. Александр Мин Те Хо Хубачардағы 5 № котельнайны тыхтирынҷа тоғыс хайди парчатханнаңар искірген. 2021 чылның майында Хубачар аал чӧбі «Базис-Транс» ООО-даң котельнайны садызып алған. 3 июньда ол аал чӧбіне пазыл парған паза «Полигон» муниципальнай унитарнай предприятие устанызына пирілген. Александр Мин Те Хоның чооғынаң, октябрь айға теере ікінҷі хазан тыхтал парар. Аны иң соох туста тоғындырарға пӧгінчелер. Амды хазанны тыхтирына аукцион ирт парған.
Чыылығда ідӧк Хубачар аалны «Ызыхтағы» разрезтің котельнайынаң піріктірерінеңер чоох парған. Арса, пӱӱл хысхызын 5 № котельнай халғанҷы даа чыл тоғынар. Хакасия пазы Валентин Коноваловтың таниинаң, пу котельнай Хубачар аал ортызында орныхчатханнаңар, кізілер ыс турчатханына хоптанчалар.
- Хакасия правительствозының Хубачардағы котельнайны «Ызыхтағы» разрезтің котельнайынаң піріктірер план пар. Анзы экология сидіксінізін паза аймах кініне чылығ пирер сурығны пӧгібізер, - теен Валентин Коновалов.
Чыылығ соонда Хакасия пазы «Ызыхтағы» разрезте пол килген. Предприятиенің котельнайы чахсы тоғынча, че Хубачар аалға чылығ пирерге аның кӱзі читпес, аннаңар аны нааҷылирына паза Хубачарға теере чылығ пирчең труба салыбызарға кирек.
- Проект хазна паза бизнес хада-пірге тоғынчатхан оңдайнаң чуртасха кирілер. Инвестор 200 миллион азыра салковай хорадарға тимде. Республика инфраструктура кредидінең тузаланар. Пӱӱл проект тимнелер, 2022-2023 чылларда пӱдіріг пасталар, - таныхтаан Валентин Олегович.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы