СПОРТХА ХЫНЧАТХАННАРНЫҢ ӰЛӰКӰНІ
13.08.2021
Хабарлар
Сыйыхтас. Хакасия правительствозында Физкультурник кӱніне удур спорт киреенде тоғынчатханнарны чеестееннер
Пістің хазнада Физкультурник кӱні 1939 чылдаң таныхталча. Ол - профессиональнай спортсменнернің не нимес, хазых чуртасты апарчатханнарның пайрамы. Хакасияда спорт сферазында 1,5 муң кізі істенче. Пеер тренерлер, физкультура инструкторлары, методисттер паза пасхазы кірчелер. Пічіктер хоостыра пістің республикада, хазыхты пиктеп, спортнаң айғасчатханнарның саны 241 муң кізее читче.
Киҷее Хакасия правительствозында артыхтарның артығын чеестееннер. Сыйыхтар читірер алнында, республика пазы Валентин Коновалов чыылған чонны ӱлӱкӱннең алғыстаан. Ол теен:
- Спорт Хакасияда танығлығ сфераларның пірсі полча. Пістің оол-хыстарыбыс, аймах-пасха синде иртчеткен марығларда кӱстерін сынап, сыйыхтығ орыннарға тӧреміл сыхчалар. Республикада пауэрлифтинг, спорт кӱрезі, ниик атлетика чахсы тиліпче. Волейбол ойнапчатхан хызыҷахтарны алынӌа таныхтирға кирек. Олар чидіглерінең тӧреен чирібісті сабландырчалар. Спорт ветераннарына улуғ алғызым читірерге сағынчам. Хакасияның спорт министерствозы тоғызын тӱзімніг апарча. Халғанӌы туста город-аймахтарда спорт объекттерінің саны ӧсче. Ізенчем, анзы кізілерге хазыхтарын пиктирге, пос тусты тузалығ иртірерге оңдай пирер. Прайзын ӱлӱкӱннең алғыстапчам, ӱгренӌілеріне пӧзік чидіглерге чидерге, рекордтар турғызарға алғапчам.
Валентин Олеговичтің чылығ сӧстеріне Хакасия пазының орынҷызы Ольга Пономарёва хозылған. Ольга Юрьевна республикада спорт инфраструктуразын чахсыландырар тоғыс аннаң андар апарылар тіп молҷаан. Республиканын спорт министрі Сергей Кочанны истерге чапсых полған. Хайди таныхтаан Сергей Владимирович, Хакасияда национальнай спорт кӧрімнерінңе федерация тӧстелген. 11 августта аның пастағы чыылии ирткен. Сентябрьға прай пічіктер тимде поларлар. Федерация кӱресті, тобитті, охчаадаң атарын, ат чарызын паза пасхазын тилідерге пӧгінче. Ідӧк пу чағында республиканың шахмат клубы азылар. Ведомство аалдағы спортты
хайығда тутча. Ӧӧн пӧгін - ӧсчеткен тӧлні хазых чуртасха кӧніктірері.
Мероприятие тузында 20 кізі сыйыхтатхан. Тренер Михаил Хоботов «Хакасияның физическай культураның паза спорттың саблығ тоғынҷызы» аарластығ атха турысхан. «ЦСКА-Хакасия» спорт школазының директоры Оксана Топоеваа Хакасияның Аарластығ пічии читірілген. 11 кізі Хакасия пазының алғыстазына турысхан. Оларның санында тренерлер Юрий Кусургашев, Владимир Толмачев, спорт министерствозының ӧӧн эксперті Валерия Тамбовцева. Станислав Майнагашев, Андрей Челтыгмашев, Пётр Толмашов паза пасхазы Россияның спорт министрінің алғыстазынаң сыйыхтатханнар. Чыылған чон Хакасия пазы Валентин Коноваловнаң сомға суурынып алған соонда, чир-суғҷыларыбыснаң чоохтазып алғабыс.
«ЦСКА-Хакасия» спорт школазынын директоры Оксана Топоева спорт киреене 28 артиинаң чыл пир салған. Ол аймах спорт школаларында методист полып илееде чыл істентір. Тоғызын ӧтіре пілчеткен специалистті «ЦСКА-Хакасиязар» хығырғаннар. Анда ол директор орынҷызы полған. Пӱӱл мартта Оксана Юрьевнаны устағҷаа турғысханнар. Чир-суғҷыбыстың таниинаң, школада пис спорт кӧрімі: олаңай паза грек-рим кӱрезі, волейбол, дзюдо паза кикбоксинг. Тоғысты 13 тренер апарча.
Станислав Майнагашев - олаңай кӱресче тренер. Ол Асхыс аймаандағы Хойза пилтірі аалдаң. Ӱгредии хоостыра мал имҷізі полтыр. Станислав Фадеевичтін чооғынаң, специальностьча совхозта тоғынарға маңнантыр. Анаң аны тренер тоғызына хығырғаннар. С.Ф.Майнагашев секцияны Хойза пилтірінде паза Кызласта апарча. Ӱгренҷілер саны 60-наң асча. Секциязар оолағастар паза хызыҷахтар чӧрчелер. Станислав Майнагашевтің пис ӱгренҷізі Россияның спорт узы нормативін толдырыбысхан.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы