ЧОН НИМЕДЕҢЕР САҒЫССЫРАПЧА
18.08.2021
Хабарлар
Кӧні эфир. Республика чуртағӌылары Хакасия пазына короновирустаң тоғыр прививкаа теелчеткен паза пасха даа сурығлар пиргеннер
Социальнай сетьтер пастыра Хакасия пазы Валентин Коноваловха аймах сурығлар кіргеннер. Оларның кӧбізі вакцинацияа теелген.
- Харатаста ікінҷі вакциназын турғыстырып алғам. Вакцинация ирткеннеңер сертификат Хазна полызығлары порталда чоғыл. Аны хайда алып аларға чарир?
- Искірігде постарыңнаңар пас пиріңер. Піс Хазна полызығлары сайттың устағ-пастаанаң палғалызарбыс. Ол федеральнай даа полза, сірер сертификат алып аларына прай ниме идербіс.
- Коронавирустаң вакцина турғыстырып алганнарға маска чох чӧрерге чарадылча ба?
- Аннаңар пір ле хати чоохтабаам. Вакцинаны турғыстырғаны коронавируснаң пасхазын чухтыр салбазынаң паза постарың ағырыбыспазынан арачылабинча. Ол ағырығнаң тың ағырыбызарынаң хорғысты 10 хати хызырыбысча. Вакцинаны турғыстырған кізілернің 85 % пілдіріглер чох алай ниик оңдайнаң ағырча. Че вакцинация ирткен дее кізі вирусты тарадарынаң хорғыс пар.
Имӌілернің паза эпидемиологтарның кирексіністеріне тудынарға кирек, ол санда маска кис чӧрерінӌе. Анзы ағырығ тарапчатханын синдірерге полысча.
- Коронавирустаң тоғыр прививканы турғыстырар алнында ноға антителаларға анализ албинчалар?
- Вакцинаның инструкциязында кізі ханында антителалар пары тоғырланысха кірбинче. Ханда антителалар полза даа, прививка турғыстырарға чарир. Ревакцинация даа чарадылча. Амғы туста Спутник Лайт (пір хати турғысчаң) вакцина читкіӌе. Аны коронавируснаң ағырғаннарға паза хатап вакцинация иртерге сағынчатханнарға турғыстырарға чарир.
- «Кӧк хайа» дача пірігізінде чыылығны хаҷан иртірерге чарадылар?
- Мында чарадығ киректелбинче. Сад пірігістерінде чыылығлар устав хоостыра иртче, ол санда андар кірчеткен кізілер кӱстенізінең. Сірерге уставты кӧрібізерге кирек. Пірігістің кізілері пос кӧңнінең чыылығ иртірібізер праволығлар.
- Саяногорск - Нымырттығ чолда аал-город пасталчатханын, тоозылчатханын таныхтапчатхан ікі тілнең пазыл парған танығлар турғызылғаннар. Ымай паза Нымырттығ поселоктарның ады ідӧк хакас тілінең пазылых. Чоохтап пиріңер, закон хоостыра ба ол?
- Пістің республикада ікі хазна тілі - орыс паза хакас, аннаңар чол танығларында аал-городтарның адында ікі тіл тузаланылча. Олар ікізі тузаланылчатханы орта тіп санапчам.
- Харатас городта септиктер изеріне пааларны кӧрібізіңер.
- Я, паалар ікі хати ӧс парғаннар. Піс аннаңар искіріглер алғабыс. Хакасияның пӱдіріг паза ЖКХ министерствозына мин чахығлар пиргем. Муниципалитетнең хада пу сурығ ӱзӱрілче. «Хакрезводоканал» предприятие банкротта, марығ управляющайының пос кӧрізі пар. Піс аннаң, палғалызып, ӱзӱрчебіс. Иргі пааларны айландырып алар ӱчӱн, Харатас устағ-пастаанаң хада прай кӱзібіс саларбыс.
- Новокурск аалдағы олған сады хоостыра хайдағ чарадығ алғазар?
- Ӱр ниместе анда полғам. Олған сады пӱдіриинің заказчигі Пии аймааның устағ-пастаа полча. Пу чағында наа подрядчик табыларға кирек. Анда тоғынған подрядчик нандырығлығ нимес полчатханын кӧзіт пирген, пӱдірігні тооспин артыс салған. Устағ-пастағ пірее сурығларны сыныхтағда тутпаан. Пӱдірігні тоос салар чахсы подрядчик табыларына ізенчем. Ол прай кӱзін салза, чыл тоозылғанӌа олған сады тимде поларына ізеніс пар.
Автор :
Оксана ТАНАЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде