ХЫНҒАН КИРЕЕ - ПОС КИРЕЕНІҢ ӦЗЕНІ
25.08.2021
Хабарлар
ПОС КИРЕЕ: асчабыс, тилітчебіс, парыстанчабыс
ЧИТІ ЧЫЛ АЛНЫНДА
Вера Алагашева - пӧзік ӱгредігліг чиит ипчі. Социальнай педагогка ӱгренген дее полза, пу тоғыста пір кӱн дее істенмеен. Кӧңні чатпаан. Ирге парып, ікінҷі палазынаң ибде одырчатхан. Палаа 1 час полғанда, Вера кинетін сас хырыхчаң усха ӱгреніп аларға чаратхан. Пірдең, иреннер састарын хырыхчатхан усха ӱгренерге сағынған. Хада хонғанынаң чӧптескен соонаң, Ағбан городта килістіре ӱгредіг кінін таап, чиит ипчі сағызын чуртасха кирген.
- Сынны чоохтаза, мин кічігдең ала саснаң айғазарға хынӌаңмын. Хызыӌахтарға састарын ӱр пирчеңмің постаң полыбысханда, сидік тее прическалар ит пирчеңмің - таныхтапча Вера Геннадьевна.
Алагашевтер ол туста Асхыс аалда чуртааннар. Парикмахерге ӱгренчеткендӧк, Вера састарнаң тоғынарынҷа хоза кӧзідіглерні Интернетте кӧр сыххан. Аалда узын тыыдып пастаан. Наа ла ӱгренген ус килген не кізінең тоғынҷаң. Пола-пола сас сырлирына хыныбысхан.
- Инстаграмда паза yоutube каналларында сас ӧңнерінің устары састарнаң хайди тоғынчатханнарын кӧзітчеңнер: сырлир алнында сас хайдағ ӧңніг полғанын, сырлабысханда - хайдағ ӧңніг пол парғанын. Аны кӧрің мин пу кирекке хыныбысхам, - чоохтапча Вера. - Че Асхыста мағаа кізі читпинібіскен. Кӧбізі кӧрімнерін тың алыстырарға хынмачаң пос сазының ӧңіне чағын ӧңнерні таллап алҷаң. Паза ол чылларда ах састарға мода кіргелек полған.
Хайди поларға? Ағбанзар кӧзерге чаратхан узын таптапчатхан ипчі. Хада хонғаны улуғ оолағы тӧртінҷі классты тоозарын сахтап аларға чӧптеен. Іди Вера, ах састығларны тілеп, сӧбірезінең хада Ағбанзар кӧскен. Парикмахерскайда орын таап алған, анда ікі чыл тоғынған.
ӰГРЕНГЕНІ ПАЙЫТЧА
Вера, узын нааҷылап, наа пілістер алып, кӧп мастер-класстарға чӧрче. Тиксі Россияҷа учух чӧр салған.
- Сочизер тынанарға парчатханда даа, позыма килістіре устың мастер-клазына удур парғам, - хатхырча ол. - Прай ла ӱгредіг курстары наа піліс пирбинче, че полған на ус позының тоғынчатхан оңдайын читірче. Іди мин пілізімні алғыдып одырчам. Хайдағ даа киректе пос узын тыыдарға кирек тіп санапчам.
Ӱгредіг соонаң ӱрге халған «істернің» пірсі Dark-ice техника. Кӧні тілбестегдең «хара пус» теені полча. Ол техникадаңар Вера Казахстанда ӱгренгенде піліп алған. Ол пістің чонға уғаа чағын.
- Пус - ол соох алай аппағас блонд, че пістің кӧбізінің хара састар нооза, - чарытча сас узы. - Хара тӧстіг ах састар киліс парча. Азия чоннарының састарынаң тоғынарға Dark-ice техника най килісче. Аннаңар ол мағаа уламох чағын пілдірген. Пос салонын азып, аны хайди адирдаңар сурығ турыбысханда, мин сах андох пу атты сағысха киргем. Ол минің тоғынчатхан ӧӧн кӧстеглерімні чахсы чарытча.
ПОС САЛОНЫ, ПОС ӰГРЕНӋІЛЕРІ
Вера, Ағбанзар киліп, ікіҷе чыл таныстарынаң хада салонда тоғынған. Анаң пос салонын азып алған. Салонда сас ӧңінің ӱс узы, ипчілерге паза иреннерге сас хырыхчатхан пірер ус, визаж паза маникюр устары тоғынча. Полған на ус полызығларына кізілерні позы пасча.
Вераның позының кабинеді пар. Ол чалғызан тоғынминча, аның ікі полысчы пар. Олар теестезіп тоғынчалар. Полысчылар ипчінің сазын паза сырлирға киректелчеткен ниме-нооны прай тимнеп пирчелер, ол сырлапчатхан туста кирек нимелерні идіп одырчалар. Пос салонын азып алғандох, Вера пасхазын пу кирекке ӱгредіп пастаан. Ол ӱгренҷілерге састарның кӧрімнерінеңер паза оларны сырлаҷаң техникалардаңар чарытча.
- Пӱӱнгі кӱнде пістің опыдыбыс, кӧзітчең тоғыстарыбыс пар. Наа ла пастапчатханда, ипчілерні хайдағ салтар полары сағыссыратхаң хайдағ ӧң сағыпчатханын азынада кӧзітчең оңдай чох полған. Ам пар, - тіпче ус ипчі. - Ағаа хоза, амғы ипчілер састарына мааннап хайчалар, олар пілчелер, хайди хара састың ӧңін алыстырарға кирек, орта ниме-нооларнаң тузаланчалар.
Чоохтирға кирек, Веразар ӧӧнін-де 18 - 35 частығ ипчілер чӧрче. Сала улуғлары састарынаң эксперимент идерге хынминчалар.
Вера, хайда даа маңнаныстығ тоғынар ӱчӱн, хайди даа ӱгренерге кирек тіп санапча. Чарым чылда пір хати - хайди даа. Ідӧк пос тоғызына, итчеткен кирекке хынарға кирек. Ол чох пір дее ниме полбасчых тиирге чарир. Пастағы туста, сас ӧңін алыстырып алған ипчінің часказын кӧріп, Вераның харах чазы даа сыхчаң. Ам андағ ӧріністер олаңай ла кирекке тӧӧй. Кӧнік парған. Узын пілче нооза.
Вера наа кирілген налог тӧлеҷең оңдайнаң, «профессия» налогынаң, тузаланча. Ол устарға килістіре. Олар полызығны киректепчеткеннерні постары таапчалар, олох туста парыстары тың улуғ нимес, аннаңар пу налог кӧрімі иң килістіре саналча. Социальнай страхование, пенсия чыындызынзар хайди даа кӧрілген тӧлеглер мында чоғыл. Олох туста кізі пос киреенең айғасчатханға саналча.
Автор :
Тимнеен Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде