ӰГРЕНӋІЛЕР ХАЗИИН ХАЙРАЛЛИРЫ - ӦӦН КӦСТЕГЛЕРНІҢ ПІРСІ
01.09.2021
Хабарлар
Чыылығ. Піліс кӱні алнында Хакасия правительствозында республиканың ӱгредіг министрінең, аның орынӌыларынаң паза тиксі ӱгредігліг пірігістер устағӌыларынаң хада чыылығ ирткен
Чӱс артиинаң кізі араласхан Zoom конференцияны Хакасия пазы Валентин Коновалов иртірген. Ӧӧн чоох республикадағы школаларның наа ӱгредіг чылына тимненізі хоостыра полған.
- Піс пӱӱлгі ӱгредіг чылын, пылтырғы чіли, пандемия кирексіністеріне тудынып, пастапчабыс. Аннаңар ӱгренҷілернің паза ӱгретчілернің хазиин хайраллиры пістің ӧӧн пӧгінібіс полча. Паза піске, наа ӱгредіг чылы план хоостыра ирт парыбыссын тіп, хайди даа чахсы оңдайлар тӧстирге кирек, - чооғын пастаан Валентин Олегович.
Хакасияның ӱгредіг паза наука министрі Лариса Гимазутинаның искіриинең, республикадағы школалар ӱгренҷілерні удурлирға прайзы тимде.
- Пӱӱл, азынада сананыстар хоостыра, школалар иркінін 74 муң азыра ӱгренҷі алтапча. Ирткен чылдағызынаң тиңнестірзе, 1,5 муң азыра палаа кӧп! Парта кистінзер пастағызын на одырчатхан оолағас-хызыҷахтарның саны ідӧк ӧс парған Пу чыл Хакасияда 8400 пала пастағы классха парча, пылтырғызынаң 156 олғанға кӧп. Школаларға ідӧк 27миллионҷа салковайға 64 муң наа учебник алыл парған, - искірген Лариса Николаевна.
Ӱр ниместең сығара Россия президентi чахиинҷа класс устағҷыларына хоза ахча кӧрілче. Хакасияда 2021-2022 ӱгредіг чылында ол тӧлегні тиксі ӱгретчілер санынаң 67,5% кізі алар. Пу чылдаң сығара мындағ тӧлег ідӧк колледж-училищелер студенттері группаларының устағҷыларына пирілер.
Хайди министр аннаң андар искірген, Хакасия пӱӱл «Земскай учитель» программаны толдырыбысхан алты регионның пірсі пол парған. Амды чиңіс тутхан ікі ӱгретчі Боград аймаанда істеніс чолын пастабысты. Олар ікӧлең математика ӱгретчілері.
Че Хакасияда школалардағы кадрлар сурии мыннаң пӧгілбеен. «Амғы туста республикада англия, орыс тіллері, математика, пасталығ класстар ӱгретчілері чидіспинчелер», - теен Лариса Гимазутина.
Чоохтирға кирек, олғаннарға піліс пирчеткен специалисттердең пасха, ӱгредіг заведениелеріндегі столовай тоғынҷылары читкіҷе нимес. Кӧзідімге, андағ сидіксіністеңер чыылығ араласчыларына Саяногорсктағы 7№ лицей устағҷызы Даниил Даньшин искірген. «Пищеблок тоғынҷыларының ставкалар саны хызырыл парған. Аннаң пасха, оларның чал ахчазын хызырыбысханнар. Тоғыс, тізең, ідӧк ле 8.00 частаң 16.00 часха читіре узарадылча. Аның ӱчӱн кӧбізі вахта оңдайынаң пасха чирзер тоғынарға парыбысхан», - чарытхан Даниил Александрович.
- Муниципалитеттернің школаларға кӧстегліг программа хоостыра специалисттер тимнир праволары пар нооза. Аннаңар олар постары ӱгредіг заведениелерінең ӧткін тоғынарға киректер, - хайығ айландырған Хакасия пазы Валентин Коновалов.
Правительствода ирткен чыылығда ідӧк «Саннығ ӱгредіг орны» паза «Полған на паланың чидии» («Точка роста») федеральнай проекттер чуртасха хайди кирілчеткеннеңер, пасталығ класстардағы ӱгренҷілерні ізіг чииснең хайди азырапчатханнарынаңар паза Хакасиядағы ӱгредіг учреждениелеріндегі спорт тилізінеңер чоох апарылған.
Конференцияны тоосчадып, Хакасия пазы Валентин Коновалов прайзын наа ӱгредіг чылы пасталчатханынаң алғыстаан, ӱгренҷілерге паза ӱгретчілерге чахсы чидіглерге чидерге алғаан.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы