РЕСПУБЛИКА КӰНӀНЕ ЧАРЫДЫЛҒАН
01.09.2021
Хабарлар
Опера искусствозының театр фестивальы-2021. Пӱӱл ол Хакасияда июнь айда ирткен, гала-концерт, тізең, 29 августта ла. Анзы пандемия кирексіністерінең палғалыстығ полған
Пу фестивальны, Россияның паза Хакасияның культура министерстволары хабазиинаң республикадағы театр искусствозын тилітчең чыынды паза В.Г.Чаптыковтың адынаң Хакас филармониязы чуртасха киргеннер. Тоғызынҷы хати ирткен пайрамның ӧӧн чардығы «Искусство устары - Хакасияа» проект полған. Аны хоостыра В.Г.Чаптыковтың адынаң Хакас филармониязының опера ырҷылары Хакасияҷа гастрольларнаң чӧргеннер. Іди пір ай аразына Россияның паза Пӱрӱт чирінің саблығ артизі, Хакасияның чон артизі Екатерина Кыштымова, Россияның паза Хакасияның саблығ артизі Зинаида Аршанова, Хакасияның саблығ артизі Даниил Тарасов, филармония солисттері Ольга Акулова паза Константин Сеслер Харатас, Саяногорск, Абаза, Сорығ городтарда паза Асхыс, Алтай, Боград, Пии, Таштып, Ағбан пилтірі, Шира паза Орджоникидзе аймахтар кіннерінде 14 концерт турғысханнар. Таныхтирға кирек, чайаачы устарны прай чирде уғаа чахсы удурлааннар. Мындағ артисттер аал-городтарҷа тилем чӧрбинчелер нооза.
Опера искусствозының театр фестивальының халғанҷы чардығы - гала-концерт - 3 июльда, Хакас Республиканың 30 чылына чарыдылып, Ағбанда Пастағы май ачығында иртерге кирек полған. Че пандемия тузында кирілген хатығластар ӱчӱн Россияның саблығ ырҷыларын хакас сценазар сала орай сығарарға киліскен - 29 августта ла.
Пайрамнығ концертте Мариинскай, Россияның Большой театрының, Хызылчардағы опера паза балет театрының паза Хакас филармониязының солисттері араласханнар. Программаның ӧӧн рольларын Мариинскай театрның опера сценазының чылтыстары Россияның саблығ артизі Татьяна Павловская (сопрано), Россияның саблығ артизі, Татарстанның чон артизі Ахмед Агади (тенор) паза Юлия Маточкина (сопрано) толдырғаннар. Опера ырларын кӧглернең В.Г.Чаптыковтың адынаң Хакас филармониязының симфоническай оркестрі чазаан. Аннаң Хакасия искусствозының саблығ деятельі Вячеслав Инкижеков устапча.
- Хакас Республиканың 30 чылына чарыдылған гала-концертте ідӧк чиит артисттер араласханы тың ӧріндірче. Олар Хакасиядаң сыхханнары уламох поғдархастығ пілдірче. Пӱӱнгі кӱнде Александра Черпакова Хызылчардағы опера паза балет театрының солизі полча, Александр Шахов - Санкт-Петербургтағы Михайловскай театрның, Светлана Лачина Большой театрның опера труппазының, - ӱлескен поғдархазынаң Хакасияның культура министрі Светлана Окольникова.
Хакасияда ирткен опера искусствозының гала-концертінің ӧӧн партнеры РУСАЛ компания полча, официальнай партнеры - «Русский уголь» компания.
- Улуғ алғыс читірерге сағынчам Россия Федерациязының культура министерствозына, Мариинскай театрға паза спонсорларға піске мындағ сыйых иткен ӱчӱн. Мариинскай театрнаң Хакасия хаҷаннаң ынағласча. Аннаңар республиканың чуртағҷылары аның солисттерін полған на сай чидікпин сағыпчалар, - теен Хакасия пазы Валентин Коновалов.
Автор :
Тимнеен Александра КАРАМЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы