ЧЫЛЫҒ ПИРӋЕҢ ТУС ЧАҒДАПЧА
03.09.2021
Хабарлар
Чыылығ. Киӌее Хакасия правительствозында город-аймахтар пастарынаң видео палғалысча чыылығ ирткен
Чыылығ ӱс сурыға чарыдылған: республиканың чурт-коммунальнай объекттері чылығ пирҷең тусха хайди тимнен салғанына; «Арығ суғ» регион проектінҷе ісчең суғ объекттерін тыхтирына паза пӱдіреріне; «Городта истіг оңдайлар тӧстирі» регион проекті чуртасха хайди кирілчеткеніне.
Хакасияның пӱдіріг паза ЖКХ министрі Валерий Келиннің чооғынаң, 1 сентябрьға республиканың чурт фонды 90 % хысхы тусха тимде. 26 августтаң 1 сентябрьға теере Копьёв, Приисковай аалларның паза Тойым посёлоктың кӧп квартиралығ туралары сыныхталған. 24 турада инженер коммуникациязында, суғ ағысчаң системазында 45 сайбағ сығысхан. Сайбағлардаңар искіріг прокуратура органнарынзар ызылған.
Амды Ағбан городтың чурт сыныхтаанҷа департамент кӧп квартиралығ 45 туранаң устапчатхан читі организациязында пландағы нимес сыныхтағларны иртірче. 30 августха Харатастың устағ-пастаа Пригорсктағы кӧп квартиралығ ікі тураны тиксі тыхтирына субсидия аларына сурыныс пічиин пирген. Пригорсктағы 4 паза 13 №№ тураларны тиксі тыхтирына пічіктер тимнелче. 1 паза 2 №№ тураларның ээлері, тізең, тураларны тиксі тыхтирынаң тоғыр полчалар.
Тӧӧ пазы посёлокта кӧп квартиралығ 34 тура сыныхталған. Оларда чылығ пирҷең система арығлалған. Пу туралар «Комфорт» устапчатхан компанияның холында полғаннар. Че предприятие банкротха кір парғанда, кӧп квартиралығ 12 тура «Вершина» ООО-ның устанызына кірібіскен. Кӧп квартиралығ 22 тура устапчатхан компания тапхалах.
Республиканың 144 котельнайы (86 %) чылығ пирҷең тусха тимде. Чурт-коммунальнай объекттернің 90 % хысхызына тимнен салған. Пӱӱл коммунальнай инфраструктураны чылығ пирҷең тусха тимниріне Хакасия бюджедінең аал-городтар устағ-пастағларына 125,6 млн салковай субсидия пирілген. Ол ахчаның 79,7 миллионы хорадылған. Сорығда 8,4 млн салковайға тыхтағ тоғыстарына чӧптезіг иділбеен. Ідӧк Асхыс аал чӧбінде 3 № котельнайның трубадағы оборудованиезін тыхтирына 9,5 млн салковайға, Кирбі аал чӧбінде котельнай оборудованиезін садызарына 2,6 млн салковайға чӧптезіглер иділбеен.
Хубачар аалдағы котельнайлар 75 % хысхы тусха тимде. 5 № котельнайына сеть насозын аларынҷа сурығ пӧгіл парған. Че аны 1 октябрьда ла ағыларлар. Валерий Келиннің таниинаң, октябрьда насосты турғызарға киліспинче. Аны турғысса, котельнайның тоғызын тохтадарға кирек. Аннаңар пу тыхтағны чылығ пирҷең тус пасталғалахха тоос саларға кирек. Хубачарда ідӧк Кировтың орамазында чылығ пирҷең сетьті тыхтирынҷа тоғыс апарылча.
Пӱӱнгі кӱнге республикада хара тастың синминчеткен чыындызы 61,5 муң тоннаа алай 305 %-ке тиңнелче. Наа чир, Коммунар, Асхыс, Таштып аалларда хара тас чыындызын тӧстирінҷе сидіксіністер пар.
«Арығ суғ» проект хоостыра Пригорскта суғ пирҷең система пӱдірілерге, Жемчужнайда насос станциязы нааҷылаларға паза Наа чир аалда суғ алҷаң станция пӱдірілерге, суғ сетьтері тыхталарға кирек.
Пригорсктағы пӱдіріге подрядчикнең чӧптезіг иділген, че ол тоғыстарны пастабаан. Ӧӧн сылтағ - пӱдіріг материаллары паазы ӧс парғаны. Подрядчикнең чӧптезіг чох иділген. Пӱӱнгі кӱнге проект-смета пічии тӱзеділген паза хазна сыныхтаана пиріл парған. Сыныхтағ ирт парза, подрядчик тілирінҷе аукцион чарлалар.
Жемчужнай аалда насос станциязының туразын нааҷылирынҷа тоғыс апарылча паза оборудование садызарына, аны ағыларына чӧптезіг иділ парған.
Наа чир аалда «Арығ суғ» проектче тоғыстар апарылбинча. Подрядчик тоғысха кірбеен. Аймахтың устағ-пастаа аннаң чӧптезігні чох идерге тимненче.
«Городта истіг оңдайлар тӧстирі» регион проектінҷе республикада 22 тура ибіркізі (59 %) паза кӧп чон чӧрчеткен 27 орын (51 %) иптел парған. Копьёв, Хубачар, Тойым, Таштып, Боград, Шира аалларда, Асхыс посёлокта прай объекттерде тоғыстар толдырылған.
Пӱӱнгі кӱнге Ағбан городта 14 тура ибіркізі (70 %) паза кӧп чон чӧрчеткен 3 орын (27 %) нааҷылалған. 4 орын июльда иптел парарға кирек полған. Че амды тоғыстар тузында толдырылбазынаң хорғыс пар. Харатаста кӧп чон чӧрчеткен тӧрт орынны иптирі кӧрілче, че амғы тусха пір ле орын иптелген.
Хакасия пазы Валентин Коновалов город-аймахтар пастарына хысхы тусха тимненісті паза проекттер хоостыра апарылчатхан тоғыстарны сыбыра сыныхтағда тударға чахаан.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы