ПІЛІС СООНӋА - ИҢ ЧАХСЫ ЛИЦЕЙЗЕР
03.09.2021
Хабарлар
Пастағы саң. Асхыстағы лицей-интернатта пӱӱл пастағы классха 134 олған парған. 1 сентябрьда оларға пастағы саң сыңыраан
Школа иркінін наа ла алтаан ӱгренӌілер, чахайахтар тудынып, пайрамға ачых-чарых кӧңніліг килгеннер. Олғаннарны пастағы ӱгредіг кӱнінең лицейнің директоры Евгений Араштаев алғыстаан.
- Пӱӱн піс пастағы класстар ӱгренҷілерін не удурлапчабыс. Прайзыңарны наа ӱгредіг чылынаң алғыстапчам. Сірер кӧп піліс аларзар паза аймах чайаачы тоғыснаң айғазарзар. Ізенчем, прай киректерің килізер, чахсы чидіглерге чидерзер. Пастағы Піліс кӱні сағызыңарда саңайға халзын, - алғаан Евгений Александрович.
Анаң чоох тутхан Асхыс аймаа пазы Абрек Челтыгмашев.
- Ӱгредіг чылы пасталғаннаң ӱгретчілерні паза лицейнің тоғынҷыларын алғыстапчам. Сірер, школаны наа ӱгредіг чылына тимнебізіп, тоғысха наа кӱснең сыхтаңар. Паба-іҷелер палаларын Асхыстағы лицейге 11 чылға пир салғаннар. Ол тусха палалар наа арғыстар таап аларлар, - таныхтаан Абрек Васильевич.
Асхыс аймаа пазы, лицейде ӱр чыллар тоғынып, улуғласнаң тузаланчатхан Эльвира Саломатинаны алғыстаан. Абрек Челтыгмашевтің таниинаң, полған на кізінің, тоғызынаң анымӌохтазып, тынаға парар тузы чит килче. Эльвира Карловна Асхыстағы лицейде 48 чыл тоғын салған. Істеніс киндезінде аның пір ле танығ турча.
- Чиитте пӧзік ӱгредіг заведениезін тоозып, Эльвира Карловна Асхыстағы школазар килген, прай чуртазын ӱгретчі тоғызына пир салған. Ол тустаң сығара ол кӧп палаа улуғ чуртассар чол асхан. Пӱӱнгі кӱнде лицейібіс Россияның 100 иң чахсы лицейлер санына кірче, анзы ідӧк Эльвира Карловнаның турыстыра тоғызының салтарлары. Ол Россияның паза Хакасияның аарластығ ӱгретчізі полча. Улуғ алғыс Сірерге, Эльвира Карловна.
Хазииңар пик ползын, - ӱгретчіні алғыстап, Абрек Васильевич «Пістің хынған алтын ӱгретчібіс» танығны, Асхыс аймаа администрациязының Аарластығ пічиин паза ӱгредіг управлениезінің алғыстас пічиин читірген.
Пастағы саң ӱлӱкӱнінде прай алғыстастар кічіг ӱгренӌілерге читірілче. Оларның чуртазында улуғ чол азыл парды, олғаннар аны 11 чыл иртерлер. Пастағы класс ӱгренӌілері, ӱгретчілерінзер, паба-іӌелерінзер айланып, кибелістер пастыра чахсы ӱгренерге, удур-тӧдір полызарға сӧс пиргеннер.
Мына пастағы саң сыңырабысты. Аны 11 класс ӱгренӌізі Марк Канзычаков паза пастағы класс ӱгренӌізі Мария Торбостаева толдырғаннар. Пастағы саң ӱгренӌілерні парталар кистіне одырарға хығырған.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде