МАРЫҒ ТООЗЫЛАР АЛНЫНДА
03.09.2021
Хабарлар
Паралимпиада-2020. Хаҷан алнында парчатхан командалар аразында Россия адалчатса, чӱрекке истіг пілдірче. Олох арада чидікпин сағыпчазың, хаҷан чир-суғҷыларыбыс ӱзінҷі орыннаң ікінҷі орынға сығып аларлар
Позырах кӱн, 5 сентябрьда, теестегі XVI Паралимпиада пайрам кибірли чабылар. Аның араласчылары, тилекей хазналарынаң чыылысхан кинек спортсменнер, ниик тыныбызарлар: соонда халдылар уйғу чох хараалар, ӧрініс алай хомзыныс хоостыра сыххан харах частары хуруп пардылар. Чиңіске турысханнары иблерінзер алтын, кӱмӱс, хола медальлығ айланарлар, теестегі марығларға тимненіп пастирлар. Спорттың хайдағ даа кӧрімінең айғасчатханнарның амыр чуртас чоғыл нооза, пір марығ соонаң пасхазы пасталча.
Сағам, тізең, Паралимпиаданың чӧрімі хыызына кірібісті. Марығ тоозылар алнында командалар аразында полған на медаль санға алылча. Чиңіс тутханнары махтаға сыхчалар, соона халғаннары хомзыныс чӧрчелер, теестегі арға-мӧрій тузында хайди даа утып аларбын тіп, ізеніснең чуртапчалар. Хазналарның піріктірілген командаларының устағҷылары, тренерлер спортсменнернің чидіглерін санға алчалар, кӧзідімнерні уламох чахсыландырып алардаңар сағыссырапчалар, алныларында аймах-пасха пӧгіннер турғысчалар.
Сала даа ікінҷілес чоғыл, полғаныбыс ла андағох сағыс-сананыснаң теестегі марығ кӱні хайди иртерін сағыпча. Талазығ чоғыл, чиңіс саннары хоостыра Хыдат пастағы орында ізестіг хаалапча. Ағаа пір дее команда чит полбас. Че ікінҷі орын ӱчӱн харбазығ хазыр парғадағ. Великобританияның паза Россияның командалары сала ла тиңнең тиңе хаалабинчалар. Паза кӧрзең, пістің улуғ ӧрінізібіске, Чир-суубыстың командазы ікінҷі орынға сығып алған полча. Че Великобританияның спортсменнері дее маңат тимненіс кӧзітчелер, алтын-кӱмӱс-хола медальлар хоостыра алнына сых чӧрібісчелер. Итсе, саннарны санапчатса, хаҷан даа иң пастап алтын медальларға хайығ айландырылча.
Хаҷан чир-суғҷыбыс Валерия Шабалина суғҷа чӱзерінҷе ӱзінҷі алтын медаль утып алғанда, андағ пик сындырлығ спортсмен ӱчӱн поғдархас тӧріпче. Ол туста, кӧңні-чӱреең пазын полбин, кӧр халыңар пістіңнерні тіп хысхырыбысчазың, позың на чалтырама чиңіс тутхан чіли, аар-пеер пас чӧрчезің. Нинҷе-де тус пазынаң велосипедтіг чарысчаң спорт кӧрімінең айғасчатхан Михаил Асташов, Токиозар киліп, ікінҷі алтын медаль утып алғаннаңар искірілзе, ӧрініс уламох тыыпча, командабыс амды хайдағ орында парчатханын табырах арах піліп аларға харасчазың. Арса... арса... Хыдаттың командазының махтағлығ кӧзідімнеріне сала даа чағдап алдыбыс? Чох-а, аар ла тын саларға килісче. Хыдаттың спортсменнері уламох кӧп алтын медаль утып алтырлар, паза пірдеезі постарына чит полбас пӧзіксер кӧдіріл парыбыстырлар.
Че, мындағ килкім арға-мӧрійде аралазып, ікінҷі орын алғаны даа айдас кӧзідімге саналча. Аннаңар Великобританияның командазына чидіп аларға кирек. Чох, чидіп ле аларға нимес, ас парыбызарға. Пірдең, илееде алнынзар кіріп аларға. Андада ла тынарға ниик полыбызар. Алтын медальлар санынаң тың на кӧпке соона халбинчабыс - пір холның салаалары синінче ле. Оларның алтын 29 медаль, пістіңнернің алтын 24 медаль полған пір хати. Итсе, олар даа ікінҷі орынны холдаң позыдарға хынминчалар, алтын медальлар санын уламох хозып одырарға харасчалар. Марығ ол марығ нооза.
Паралимпиаданың читінҷі кӱні пістің командаа оңнығ полғанын прайзы даа таныхтапча. Чир-суғҷыларыбыс 13 медаль утып алғаннар. Оларның алтызы - алтын. Нӧӧс, нӧӧс, піс Великобританияны ас парыбыстыбыс? Ікінҷі орынға сығып алар ӱчӱн, Россияа алтын пис ле медаль кирек полған. Сынап таа, ікінҷі орынны холға киріп алтырбыс. Амды аны, холдаң позытпин, тут поларбыс ни? Матап кӱстенерге килізер...
Чир-суғҷыларыбыс санынаң ікілер-ӱзер кӱмӱс паза хола медаль утып алғаннарның саны илееде. Олар пістің командаа алнында парчатханнар санында поларға туза ағылчалар. Мындағ килкім марығда хайдағ даа медаль утханы улуғ чидіге саналча. Ағаа хоза, Россияның Паралимпийскай комитедінің чарадии хоостыра, пу арға-мӧрійде аралазып, 4 - 6 орыннар алған спортсменнерні 3-ҷі орын алғаннарнаң тиңни сыйыхтирлар.
Мында ядро ідерінде тилекей рекордын ікі хати нааҷылаан Владимир Свиридовтың сӧстерін искір пирерге чарир. Хайди таныхтаан полғабыс, спорттың пу кӧріміндегі Паралимпиада араласчылары, кинектер колясказында одырып алып, ядроны холнаң ырахха ітчелер. «Мағаа ӱзінҷі сынағ пирілгенде, прайзын ас парыбысхам, тилекейнің наа рекордын турғызыбысхам. Анаң піди сағынып алғам: чиңіс мини, алтын медаль ізепте, амды позым позымнаң марығлас кӧрим. Аннаңар тӧртінҷі сынағны тузалан халарға сурынғам. Чаратханнар. Ядроны айама ипти салып алып, пар-чох кӱснең ідібіскем. Хайдар-да учуға халған. Марығ чарғыҷылары тилекейнің наа рекорды турғызылды тіп чарлапчалар. Іди позым позымны утхам, тилекейнің рекордын ікі хати нааҷылаам», - чоохтапча В.Свиридов.
Тилекейдегі кинек спортсменнернің чайғыдағы XVI Паралимпиадазы Токиода пайрам кибірли азылчатханда, Россияның піріктірілген командазының знамязын апарған Андрей Вдовин, 1 сентябрьда 400 метрге чӱгӱрерінде аралазып, хаҷан-да позы турғысхан тилекей рекордын нааҷылабысхан. Амды ол рекорд 49,34 секундаа тиңнелче. Іди Андрей Вдовин алтын медаль утып алған.
1 сентябрьда Россияның піріктірілген командазы ікінҷі орынға сығып алған. Пістіңнернің 31 алтын, 19 кӱмӱс, 36 хола медаль. Ӱзінҷі орында парчатхан Великобританияның 30 алтын, 24 кӱмӱс, 30 хола медаль. Пастағы орында парчатхан Хыдаттың командазының 66 алтын, 42 кӱмӱс, 34 хола медаль.
Автор :
Тимнеен Анатолий СУЛТРЕКОВ
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
