Хакасия пазынаң кöнi эфир ирткен
03.09.2021
Хабарлар
2 сентябрьда РТС каналда Хакасия пазы Валентин Коноваловнаң кöнi эфир ирткен. Республика пазы чуртағӌыларның сурығларына нандырған. Пастап Валентин Олегович региондағы эпидемия киреенеңер искiрген. Аның таниинаң, халғанӌы туста эпидемия кирее чахсыланча. Анзын короновируснаң ағырыбысханнарның саны киречiлепче. Халғанӌы туста пiр сутка аразына чуғынӌах ағырығнаң 130-ча кiзi аырыбысчаң (180 кiзi ас парӌаң).
Кöнi эфирде Ағбан чуртағӌызы Ағбан аэропортха теелчеткен сурығ пирген:
- Сiрер "ЭРА Групп" компаниянаң Ағбан аэропортча чöптезiг идiбiскезер. Аэропорттың акциялары "ЭРА Групп" компанияа пирiлер бе?
Хакасия пазының чооғынаң, пу саба искiрiг, чöптезiг идiлбеен, сыныхтағ органнары, ол санда монополиядаң тоғыр служба сыныхтағ иртiрче. Аэропортты тилiдерiне инвесторны тилирiнеңер чарадығ алылған, че аны садарынаңар чоох парбаан.
Iдöк коронавирустаң тоғыр вакцинацияа чарыдылған сурығ полған. Ағбан чуртағӌызы Наталья чоннаң тоғынча, че коронавирустаң тоғыр прививканы турғыстырарға ынабинча. Прививка турғыстырбаан ӱчӱн, аны тоғындырбас право пар ба?
Валентин Коноваловтың чооғынаң, полған на киректi алынӌа кöрерге кирек. Республиканың ööн имӌiзiнiң чарадии пар. Ол чарадығда вакцинацияны хайди даа иртер тоғынӌылардаңар пазыл парған. Сурығны пирген чуртағӌы ол отрасльға кiрчетсе, вакцинадаң тоғырланыс чох полза, ағаа коронавирустаң тоғыр прививканы турғыстырарға кирек.
Пилтiр аал чуртағӌызы сентябрьдағы табығлар ноға ӱс кӱн иртерлер тiп сурығ пирген. Хакасия пазының чооғынаң, пу федеральнай кiннiң чарадии, аннаңар аны толдырарға кирек.
Кöнi эфирде пасха даа сурығлар кöдiрiлгеннер. Оларның пiрсi Хакасияның коммунальнай объекттерiнiң хысхы тусха тимненiзiнеңер, Пiлiс кӱнiне чарыдылған линейкалар ирткеннеңер паза пасха даа.
Автор :
Оксана Челтыгмашева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы