ТІРІГ СӦС - ТӦРЕЕН СӦС
08.09.2021
Хабарлар
Хакас тілі кӱні. Ӱртӱн айының 4-ҷі кӱнінде республикада Хакас тілі кӱні таныхталча. Таштыптағы «Рябинушка» олған садында пу пайрам чыл сай иртірілче
Хакас тілі кӱні хакастарның пічии тӧстелгенінең палғалыстығ. Пайрам полған на кізее танығлығ, аарлығ паза чӱрексіністіг. Піс тӧреен тілібісті паза пос кибірлерібісті чиит тӧлге читірерге кирекпіс. Ӱгредіг киреенде пу кӧстеге алынӌа хайығ салылча. Піс «Рябинушка» олған садынзар чӧрчеткен палаларны хакас чонның тархынына, кибірлеріне кӧніктірчебіс.
Тӧреен тілге чарыдылған кӱнде піс учреждениеде улуғ пайрам иртіргебіс, хайда тілні пілчеткен паза пілбинчеткен кічіг паза улуғ группалардағы олғаннар араласханнар.
Мероприятие «Тіріг сӧс - тӧреен сӧс» тіп адалған. Аны воспитатель Юлия Васильевна Сазанакова олған садының пасха воспитательлерінең хада тимнеен паза иртірген. Ол, хакас кип-азаан, чазанӌыхтарын кизіп, олғаннарны хакас тілінең изеннезіп удурлаан. Кічіг палаӌахтар сала алаң ас парғанға тӧӧй полғаннар. Олар, чалтанып, «Изеннер» тіп ағырин нандырғаннар.
Пайрам Хакасияның флагынаң, гербінең паза гимнінең танызарынаң пасталған. Олғаннар андағы ӧңнер паза хоостар ниме таныхтапчатханын піліп алғаннар. Ӱлӱкӱннің ӧӧн пӧгіні олғаннарға хакас тілінің кирексінізін читір пирері полған. Ӱлӱкӱнде воспитатель Юлия Сазанакова хакас поэттер М.Е.Кильчичаковтың, Н.Е.Тиниковтың паза М.С.Коковтың кибелістерін хығырған. Аның таниинаң, хакас тіліне поэттер, писательлер, ученайлар ла нимес, ідӧк хайдағ даа нациялығ кізее ӱгреніп аларға чарир.
Ойын пастыра палаӌахтарны хакас тіліне кӧніктіріп аларға ниик. Олар, тізең, кӧп. Юлия Васильевна олғаннарға «Мелейні тастиры» паза «Хол тартызары» ойыннар иртірген. Ол туста иркеӌектернің суулазы, хатхырызы залға тол парған. Олғаннар хакас ойыннарын хынып ойнап алғаннар.
Ідӧк олған садының улуғ группалардағы олғаннары теелбек кӧзіткеннер. Анаң палаӌахтар хакас чонның кибірлерінең танызып пастааннар. Теербен ибіре одырчатхан олғаннарға воспитатель Юлия Сазанакова тахпах толдырған.
Хакас тіліне чарыдылған мероприятие тузалығ, хынығ ирткен. «Рябинушкада» ӱгредіг чылы тоозылғанӌа хакас тіліне чарыдылған мероприятиелер иртірілер, хайда палалар наа пілістер аларлар паза оларны тыыдарлар.
Автор :
Ирина БОРГОЯКОВА, «Рябинушка» олған садының воспитательi
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде