ПІЛІСТЕРІН ОЙЫН-МАРЫҒЛАРДА КӦЗІТКЕННЕР
08.09.2021
Хабарлар
Гимназияда. Чыл сай ӱртӱн айының 4-ҷі кӱнінде республикада Хакас тілі кӱні таныхталча. Кибір хоостыра полған на ӱгредіг учреждениезі ол ӱлӱкӱнге азынада тимненіп пастапча
Национальнай гимназия методизі Эльвира Сагалакованың чооғынаң, гимназияның ӱгретчілері паза ӱгренҷілері Хакас тілі кӱніне, алындағы чыллардағыох чіли, азынада тимненіп пастааннар. Пӱӱл хакас тіліне чарыдылған мероприятиелер ӱгренҷілерге ікі кӱн ирткеннер.
3 сентябрьда оолағас-хызыҷахтар хакас писательлернің саблығ произведениелерінең танысханнар. Гимназия фойезінде кинделер кӧзідии азылған. Паза олғаннарға ӧнетін «пос микрофон» тоғынған. Андар пастырып, ӱгренҷілер пос кӧңнінең хакас кибелістерін кӧрбин хығырғаннар. Ідӧк олған-узах «Мағаа хакас тілі - ол...» темаҷа сағыстарынаң удур-тӧдір ӱлескен.
Танығлығ кӱн чағдап килгенде, хакас тілі ӱгретчілері 6-ҷы класстарның ӱгренҷілеріне «Гимназияның хулғалары» квест иртіргеннер. Оолағас-хызыҷахтар, анда аралазып, тӧреен тілін хайди пілчеткеннерін кӧзіткеннер. Ойын хоостыра иркеҷектер алты станцияда тохтааннар: «Мирген атығҷы», «Хыйға сӧстер», «Чахайахтар», «Хайхастығ таптырғастар», «Тапчаң нымахтар» паза «Табырах чоохтаныс». Полғанында ла олар тирең пілістерін кӧзіткеннер.
Пизінҷі класстарның ӱгренҷілері «Кӧк порчо осхас хакас тілім» флешмобта араласханнар.
Улуғ класстарда ӱгренчеткен оол-хыстарға, тізең, Хак-НИИЯЛИ-ның учёнайлары чапсых лекциялар хығырғаннар. Оларның хай піреезін олғаннар zoom платформада искеннер. ХГУ-ның доценті, филология наукаларының кандидады Лариса Чебодаева 7 «Б» класстың ӱгренҷілерін хакас чонның кибірлерінең паза пай тілінең таныстырған. Филология наукаларның кандидады Наталья Таскаракова, 11-ҷі класста ӱгренчеткен оол-хыстарға «Вузтағы литература чӧрімі» темаҷа лекция хығырған.
Пӱӱл Ағбандағы школалар паза олған садтары даа республика синіндегі ӱлӱкӱнде ӧткін араласханнар. Хакас тілі кӱні алнында прай даа ӱгредіг учреждениелерінде Интернет пастыра тӧреен тілібіске чарыдылған челлендж ирткен. Хайда олғаннар пос тілін хайди пілчеткенін паза аарлапчатханын кӧзіткеннер. Пасха нациялығ ӱгренҷілер, тізең, хакас культуразынаң тирең танысханнар.
Н.Г.Булакиннің адынаң лицейнің ӱгренҷілері «Изеннер!» флешмоб иртіргеннер. Ол кӱн ӱгренҷілер хакас тілінең изеннескеннер. Паза олғаннарға «Хакас тілінең чоохтанарға ӱгренчебіс» видеоролик кӧзіділген. Аны кӧріп, олған-узах хакас тілінең чоохтазарға ӱгренген.
Ағбанның 7№ школазында «Хакас тілінең нымахтар хығырчабыс» челлендж паза «Минің чӱреемде - Хакасия» хоостар марии ирткен. 22 № школада, тізең, пасталығ класстарның ӱгренҷілеріне «Хакас тілін пілчеткеннер» викторина иртірілген. Ідӧк иркеҷектер хакас чонның нымахтарынаң танысханнар. 26 № школаның ӱгренҷілері «Минің тӧреен тілім» ойында араласханнар. Анда олғаннар таптырғастар тапханнар, хакас ойыннарын ойнааннар паза хакас чонның хоостарынаң пазллар чығаннар.
Автор :
Тимнеен Ольга ТОМОЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы