ЧАЙААЧЫ КӦҢНІЛІГ ИМҶӀ !
08.09.2021
Хабарлар
Наа аттар. Хакас тілінең пазылған хоос произведениелернің республика синіндегі II марығның чиңісчізі адалды. Ол - олған имҷізі Лилия Тюмирекова
Пу марығ хакас литературазын тилідер, национальнай кибірлерні хайраллир, пос тілінең хоос произведениелер чайирға паза оларны хығырарға кӧӧктірер пӧгіннең паза Хакасияның культура министерствозы хабазиинаң чуртасха пылтыр кирілген. Андада чиңісчі Хакас радиозының хабарҷызы Инна Тодинова полыбысхан. Аның «Кізі чуртазы - пір хараа» чооғы Илбек Чиңістің 75 чылына чарыдылып чайалған. Ол хоос произведениенің ӱзігі «Таң Солбаны» литература страницазында сыххан. Толдыразынаң, тізең, аны «Инесайның» 21-ҷі сығарызында хығырып аларға чарир.
Пӱӱл, тізең, пу марығ олғаннарға чарыдылып иртірілген. Прай араласчылар - тиксі тоғыс кізі - кічіг частығ палаҷахтарға хоос произведениелер чайааннар. Салтарында, 50 муң салковайға тиңнелчеткен ахчалығ сыйыхха республиканың олған имнег туразының невролог имҷізі Лилия Тюмирекова турысхан! Ағаа сертификатты Хакасияның культура министрі Светлана Окольникова читірген.
- Піс Лилия Архиповнаны алғыстапчабыс чайаачы марығда чиңіс тутхан ӱчӱн. Хоос литературанаң айғасчатханнарның аразында наа аттар адалчатса, тың ӧріністіг. Сағынчабыс, мыннаң мындар аның пу пастаан тоғызы тиліп ле одырар, - теен Светлана Анатольевна.
Лилия Тюмирекованың чиңіс тутхан нымағы «Кӧӧлбек чӱрек» адалча. Ол аны аға-ууҷазы чоохтаан кип-чоохтар хоостыра пасхан. Лилия Архиповнаның позының фамилиязы - Балахчина. Тӧреен-ӧскен чирі Орджоникидзе аймаандағы Хоғайлар аалы полча. Че тоосхан ол национальнай школаны. Хакасияның олған имнег туразында 1997 чылдаң істен парча.
- Минің хаҷанох сағыс полған - ӧбекелерім чоохтаан нимелерні ӧсчеткен тӧлібіске артыс саларға. Аның ӱчӱн алынҷа тетрадь-блокноттарда танығлар ит сал турҷаңмын. Анаң Чайаачылар туразы марығ чарлабысханын піліп алғам. Аралас кӧрерге чаратхам. Пастап чоох пазарға иткем, че, чахсы сағынып, нымах пазарға пастабысхам. Мағаа пу чайаачы тоғыста Александр Чапрай полысхан, - чарыт пирген наа автор Лилия Тюмирекова.
Хайди тееннер сыйыхтас тузында, хакас тілінең пазылған хоос произведениелернің республика синіндегі 2-ҷі марығның чиңісчізінің нымағы «Инесай» журналның теестегі сығарызында чарых кӧрер.
Марығ кирексіністері хоостыра, чарғыҷылар чайаачы тоғыстарнаң, оларның авторларының ады-солаларын пілбин, танысчалар. Чиңісчіні дее таңмалалған сан хоостыра таллапчалар. Анаң аны Хакас тілі кӱні алнында алғыстапчалар. Лилия Архиповна Тюмирековаа чиңісчее кӧріл парған сыйыхты ідӧк пу пайрам алнында читіргеннер.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде