ПИС ХАЗНА АРАЛАСЧА
10.09.2021
Хабарлар
Конференция. Пу кӱннерде ХГУ-да археологтарның чоннар аразыңдағы наука конференциязы азылған. Анда 70-ға чағын учёнай Моол чирінің, Ӱстӱнзархы Сибирьнің, Алтынзархы Хыдаттың пурунғы культураларынаңар чоох апарар
Пӧзік синде иртчеткен чыылығда Россияның, Хыдаттың, Моол чирінің, Венгрияның паза Казахстанның учёнайлары араласчалар.
- Хакасия - археология саринаң хайхастығ регион. Ол Центральнай Азияның иң хайығ тартчатхан чирі полча. Мында хас-хаҷанда чуртаан чоннарның табылған культуралары Евразияның пасха регионнарындағы археологияа наа тыныс пирче, - теен конференцияны иртірген, РАН-ның материальнай культура тархыны институдының директор тоғызын толдырчатхан, тархын наукаларының докторы Андрей Поляков.
- Пӱӱнгі кӱнде Минсуғ ойымындағы чирлерні істезері иң пастағы пӧгін полча. Амғы туста Хакасия Россияңың иң чахсы істезілген регионы тіп саналча. Хай пірее сурығлар пар даа полза, тиксі алза, орындағы палеометалл, скифтер тузы чахсы паза тирең істезіл парғаннар. Аның сылтаанда хости регионнар Хакасиядагы пӧзік синде иртірілген істезіг тоғыстарына матап хайығ салчалар, - теен Андрей Поляков
Конференция пасталғанда, Хакасияның культура ис-пайын хайраллирынҷа хазна инспекциязының устағҷызы Дмитрий Левченко сӧс тутхан. Ол Хакасия пазы Валентин Коноваловтың айланызын чыылған чонға читір пирген. Анда килер чылда археология науказы тӧстелгенінең 300 чылы таныхталар паза пістің республикада 2022 чыл Археология чылы полар тіп чоохталған.
Ідӧк коңфереңцияның араласчыларынзар Хакас хазна университедінің ректоры, экономика наукаларының кандидады Татьяна Краснова айланған.
Хакас хазна университеді студенттернi ӱзiнҷi чылы «Тархын, профиль: археология» кӧстегҷе ӱгретче. Оол-хыстар «Азия хола чӱс чылларда», «Окунев паза Андронов культуралары» темаларҷа істезіглернi хынып апарчалар, - теен Татьяна Григорьевна.
Ученайлар чыылған чонны істезігліг тоғыстарынаң таныстырғаннар. Хазна Эрмитажының тоғынҷызы, профессор Константин Чугунов, Тывадағы Ханнар ойымының хумартхыларын істезіп, скифтер тузындағы кізілерні хайди чығҷаңнаңар чарыда чоохтап пирген. Андрей Поляков палеометалл тузында Минсуғ ойымында хайдағ чоннар чуртааннаңар паза аймах культуралар хайди тӧстелгеннеңер чоохтап пирген.
Ӱс кӱн аразына учёнайлар тӧрт кӧстегҷе конференцияда аралазарлар: историография паза методология, Центральнай, Іскер паза Алтынзархы Азия тас паза хола чӱс чыллардағы тустарда, ортын чӱс чыллар, скифтер паза хунно-сяньбийскай тустар. Пленарнай чардыхта учёнайлар істезігліг тоғыстарынаң прай араласчыларны таныстырарлар. Олар скифтер тузында кізілерні хайди чыып турҷаңнаңар, аймах чоннар аар-пеер кӧс чӧрҷеңнеңер паза Моол чиріндегі петроглифтердеңер поларлар.
Автор :
Валерия КАДАЧИГОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы