ГОРОД КӰНІНДЕ ТӦРЕЕН ЫҢААӋАХТАРНЫҢ ӰЛӰКӰНІ
10.09.2021
Хабарлар
Сыйыхтас. 7 сентябрьда Ағбанда «Город кӱнінде тӧрееннер» чӧрім тузында пис сӧбіре чеестелген, хайзында пӱӱл Город кӱнінде, 21 августта, ыңааҷахтар тӧрееннер
Ағбанның чахсы кибірі хоостыра, Город кӱнінде тӧреен ыңааҷахтарның паба-іҷелерін сыйлапчалар. Андағ чӧрім «Город кӱнінде тӧрееннер» адалча. Пӱӱл ол Черногорскай паркта орныхчатхан «Вдохновение» паркта иртірілген.
2021 чылда Город кӱні - Ағбанның пайрамнығ 90 чылы - орғах айының 21 кӱнінде таныхталған. Мындағ танығлығ кӱнде, тізең, ах чарыхха городтың пис кічіг чуртағҷызы тӧреен: ӱс оолағас паза ікі хызыҷах.
Ағбандағы час палалығ пис сӧбірені алғыстаан город депутаттары чӧбінің кнезі Альберт Юрьевич Тупикин.
- Пу чыл пістің городыбысха олаңай тус нимес. Пӱӱл - аның пайрамнығ 90 чылы. Городыбыстың уставында Ағбанның ӱлӱкӱннеҷең кӱні кӧріл парған. Аны орғах айының ӱзінҷі чечіме кӱнінде таныхтапчабыс. Пӱӱл, тізең, пу танығлығ кӱн айның 21 числозына киліс парған. Кибір хоостыра, город устағ-пастаа, мындағ чалахай кӱнде тӧреен кічіг чуртағҷыларны чеестеп, оларның часкалығ паба-іӌелерін алғыстапча, - чоох тудып, теен ол.
Часкалығ сӧбірелерні чылығ сӧстернең алғыстап, Альберт Юрьевич таныхтаан, наа кізіҷек Ағбанның турыстыра чуртағҷызы полар, ол хыныста паза паарсаста ӧзер, сӧбіреде ағаа хаҷан даа пик чӧлег поларлар. Анаң А.Ю.Тупикин сӧбірелерге Ағбан город пазының «Алғыстастығ адрес» адалчатхан пічиин паза сыйыхтар, порчолар читірген. Ідӧк пала медальы пирілген, хайзында иркеҷектің ады-солазы, тӧреен тузы паза кӱні пазыл парған.
Чӧрім араласчылары иркеҷек паба-іҷезін ӧріндіріп ӧссін, чуртас часкалығ нымахтағы осхас салылзын тіп алғааннар. «Амды иб-чуртта кічіг кӱніҷек пар, ол чӱрее-паарыңарны чылыдар, иртен усхурып, чалахай кӱлімзірезінең ӧріндірер паза тоозылбас-парбас часка сыйлир», - чоохталған пу тоғазығда.
Пис сӧбірее сыйыхтарны чӧрімнін партнёрлары полып тимнееннер «Вдохновение» парк, «Малинники» кондитерскай, «Мишутка» олған садығ туразы.
21 августта иң пурун хызыҷағас тӧреен. Пу ах чарыхты ол 04.55 часта иртен кӧрген. Киселёвтар ирепчі аны Изабелла адап салғаннар. Паба-іҷее сыйыхтарнаң хада пала медальы читірілгенде, мындағ сӧстернең алғааннар:
- Пу медаль иркеҷектің пастағы сыйии ползын. Ол аның алнындағы чуртазының чидіглерінің паза чиңістерінің тании полар.
Иркеҷек Станислав Кара-Монгуш 21 августта Ағбанда ікінҷізі тӧріптір 05.40 час иртен, 3 кг 350 грамм кӧдірімніг. Іҷезі Даяна Станиславовна - тува хызы. Ол, Ағбанда чуртап, фармацевтке ӱгренче. Станислав - аның тун палазы. Аны пабазының адынаң адап салған.
- Мин пілбеем дее палам Город кӱнінде тӧріп парғанын. Ол ах чарыхты кӧргенде, мағаа город администрациязынаң сығдыратханнар, Сірерні пала медальы паза сыйығастар сағыпча тееннер. Мағаа таңнастығ полған. Пістің чонның, туваларның, кибірі хоостыра палама килістіре ат пирілген.
Лама мағаа чӧп пирген, аның ады кӧк тигірнең палғалыстығ поларға кирек. Піс ікі-ӱс кӱн оолағастар аттарын матап талластырғабыс, Интернетте дее кӧрглеебіс. Анаң лама Стас ат палама килістіре полар теен, календарьнаң тиңнестіріп, оолағас адын таллирға полысхан, - ӧрінізінең ӱлескен іҷе.
Ідӧк Город кӱнінде тӧрееннер Алишер Уксеков, Арина Шварцкопф, Илья Катцын. Алишер - сӧбіреде ікінҷі пала. Паба-іҷезі пала сыйиин аларға кил полбааннар, аннаңар аға-ууҷазына чӧрімде аралазарға ӱлӱс тӱскен. Ууҷа Маргарита Николаевна Исоммиддинова позы Султрековтар родының хызы полтыр. Хоныхты узбек чонның оолғынаң тӧстептір. Ол ӱс оол ӧскірген. Алишер - тун оолғының ікінҷі палазы. «Амды пістің ікі пархабыс пар. Улуғ пархабыс - оолағазох. Алишер иркеҷеебіс тузынаң кӧмес ирте тӧріп парған, че ол пісті Город кӱнінде ӧріндірер тіп пілбеебіс нооза. Аның ах чарыхха тӧрееніне тың ӧрінчебіс», - чоохтаан ууҷа. «Пӱӱнгі сыйыхтар ӱчӱн прайзына алғызым читірчем. Піди піске ӱлӱкӱн сыйлап пиргеннеріне тың ӧрінчем», - чалахай кӱлімзіреен Илья Катцынның іҷезі Кристина Михайловна. Оолағас - ікінҷі палазы. Улии - саарбах тузындағы хызыҷах, ол туңмаҷағына килістіре ат таллап пиртір.
Кристина Михайловнаа мындағ танығлығ кӱнде чӧлег пол пирер ӱчӱн, аннаң хада кил парғаннар аның іҷезі паза хада тӧреен пиҷезі. Ильяның тай ууҷазы, кӧңнібіске прай ниме кірді, прай ниме чахсы полды тіп, пу тоғазығдаң ибзер ӧрчіліг маңзыраан.
Полған на сӧбіренің часказы палалар полча. Полған на пала, хыныста, паарсаста ӧзіп, часкалығ поларға кирек тіп санапчам.
Автор :
Инора БОРГОЯКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы