Ағбанда тынарға ниик полар
16.09.2021
Хабарлар
Хакасияның ӧӧн городын киизi иң кiрлiг городтар санынаң суурыбысханнар. Россияның чир-чайаан министерствозы сан пирiзiндегi танығнаң, сылтағ – най чылығ хысхы. Киизер хомай ниме асхынах сығарылған. Мыннаң мындар чир-чайааннаң палғалыстығ полбас ӱчӱн, Хакасияда пес одынарынаң кӧместең хыйа парарынҷа план чуртасха кирiлче.
Хакасияның ӧӧн кӧстее – 2024 чылға киизер хомай ниме-ноо сығарызын 20 % синдiрерге. Минсуғ ойымының оңдайларын санға алза, Ағбанға паза аның тастына хысхыда тӱдӱн тӧремiл поладыр. Ағаа теелчелер: котельнайлар, машиналар саны, хара таснаң одынчатхан алынҷа туралар.
Чарытхынаң чылығ пирерi сидiк сурығны чардыхти пӧгерге полызар.Че амғы пааларнаң пу оңдайнаң прай ла чуртағҷылар тузаланарға ынабас. 2022 чылдаң пасти хорадығларның чардығын республика позына аларға тимде. Хакасия бюджедiнiң проектiне пестi одынарынаң хыйа полыбысхан чуртағҷыларға компенсация тӧлирi кӧрiлче. Хакасияның Ӧӧркi Чӧбiнiң кӧстеглiг комитедi пу пастағнаң толдыразынаң чарасхан. Экологияҷа паза чир-чайааннаң тузаланарынҷа комитет кнезi Валерий Старостин тiпче:
- Ӧӧнiнде, пес одынып, чылығ алчатханы киинi кiрлепчеткенiн чахсы пiлчебiс. Ниик паалар полза, пiстiң чуртағҷылар чарытхы чылиина кiрерлер, чир-чайаанға теелiс пiлдiрте синер. Минiң сағызымнаң, ол пастағы кирек хаалағ, хайзын толдырығлығ паза закон сығарҷаң ӱлгӱлер итчелер. Ӏзенчем, пазағы чыл алызығлар чылы полар, чуртағӌылар хара тастаң хыйа поларлар
Хакасияның бюджедi толдыразынаң чарадыл парза, компенсация синi паза аны пирер оңдайлар пiлдiстiг полар. Киинiң кiрленчеткенiн синдiрерiнҷе пасха тоғыстарға теелзе, олар ӱр тусха кӧрiлчелер. Оларның санында бизнес предприятиелерiнде амғы технологияларны киргенi, транспорттың хомай ниме-ноо сығарызын синдiрерге, ағас-чахайахтар одыртханы iдӧк кииге теелче.
Автор :
РТС-тың хабарҷызы Эдуард Иванов
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде