ПОЛҒАН НА ПАЛАА - ПӦЗІК СИННІГ ПІЛІС
17.09.2021
Хабарлар
«Ӱгредіг» нацпроект. Ӱртӱн айының 15-ӌі кӱнінде «Ӱгредіг» нацпроектке кірчеткен «Полған на олғанның чидии» федеральнай проектче Ағбанда республиканың хоза ӱгредіг кінінде регионның модельліг кіні (РМЦ) азылған
МЫНДАҒ ТАНЫҒЛЫҒ КӰНДЕ ХОЗА ӰГРЕДӀГ КІНІНЗЕР УЛУҒ ААЛҶЫЛАР ХАКАСИЯ ПАЗЫ ВАЛЕНТИН КОНОВАЛОВ, РЕСПУБЛИКАНЫҢ УГРЕДІГ МИНИСТРІ ЛАРИСА ГИМАЗУТИНА, ӦӦРКІ ЧӦПТІҢ КУЛЬТУРАҶА, ӰГРЕДІГЧЕ ПАЗА НАУКАҶА КОМИТЕДІНІҢ КНЕЗІ ОКСАНА РАЗВАРИНА, РЕГИОННАРДАҒЫ ХОЗА ӰГРЕДІГ СИСТЕМАЛАРЫНДА КӦСТЕГЛІГ МОДЕЛЬЛЕРНІ ТИЛІДЕРІНЧЕ ФЕДЕРАЛЬНАЙ ЭКСПЕРТ ГРУППАЗЫНЫҢ УСТАҒҶЫЗЫНЫҢ ОРЫНҶЫЗЫ АНАТОЛИЙ БАРСУКОВ КИЛГЕННЕР.
Хоза ӱгредіг кінінің директоры Галина Жукова аалҷыларға учреждениеҷе экскурсия иртірген. Хакасия пазы пос хараанаң иркеҷектерге хайдағ чапсых кружоктар апарылчатханын кӧріп алған. Иң пастап Валентин Олегович «ХоббиХит» кружокка чӧрчеткен оолағас-хызыҷахтар керамикадаң хайдағ хайхастығ ниме-ноо чайапчатханынаң танысхан. Занятиелерні оларға Анастасия Боргоякова апарчаттыр. Олғаннар, аалҷылардаң чалтанмин, пос киреенең айғасханнар. Ӱгретчі Анастасия Анатольевна олар занятиелерде нименең айғасчатханнаңар хысхачахти искір пирген. Аның кружоктарына чайаачы кӧрістіг паза ус холлығ палалар чӧрчелер нооза. Ол ӱгренҷчілерге полған на нимені пос кӧрізінең чайирға оңдай пирчеттір.
Анаң улуғ аалҷылар «Лаборатория безопасности» кружок араласчыларынаң танысханнар. Занятие иртчеткен кабинетсер кіргенде, хызыҷахтар хыйалға кір парған кізее пастағы полызығ пирерге ӱгренчеткеннер: кем-де арғызының холын бинтнең палғапчатхан. Задание хоостыра, хыйалға кір парған кізінің ханын тохтадыбызар ӱчӱн, аның холын орта палғабызарға кирек полтыр. Хызыҷах ағаа пирілген чахығны чахсы толдырыбысхан. Олох арада ікі пала манекенде чӱрекке кӧні нимес массаж итчеткен. Галина Жукова, Валентин Олеговичсер айланып, пістің «Лаборатория безопасности» кружок хазнабыста иң чахсыларның санына кірче паза аның араласчылары тиксі Россия синіндегі марығларда чиңіс тутчалар тіп поғдархаснаң искірген.
Экскурсия соонаң регионның модельліг кіні (РМЦ) пайрамни азылған. Пастап сӧс Хакасия пазы Валентин Коноваловха пирілген.
- Хоза ӱгредіг кіннері палаа постың талантын азарға полысчалар. Наа азыл парған модельліг кін ідӧк олғаннарға постың нимее чайалғанын піліп аларға полызар. Мин пу кін азыл парар ӱчӱн улуғ тоғыс апарған кізілерге алғызым читірчем. Мында олған-узахха хынығ паза чапсых занятиелер иртіріл турзын. Алған пілістер оларға наа чидіглерге чидерге паза таланттарын наа синге кӧдірерге полыссыннар, - теен Валентин Олегович, чыылған чонзар айланып.
Наа учреждение азылчатса, аның устағҷызына кибір хоостыра клӱс читірілче. Пайрамнығ кӱнде, ол кибірні сайбабин, наа кіннің устағҷызы Евгения Комратоваа ідӧк клӱс читірілген. Аның соонаң Хакасия пазы республиканың полған на муниципалитедіндегі хоза ӱгредіг кіннеріне наа оборудованиее паза техникаа сертификаттар читірген.
Таныхтирға кирек, пӱӱл ӱртӱн айының 1-ғы кӱнінең сығара пістің республикада хоза ӱгредіг наа синге сыхча. Амды «Ӱгредіг» нацпроектке кірчеткен «Полған на олғанның чидии» федеральнай проектче Хакасияда олғаннарның хоза ӱгредиинде персонифицированнай тӧлег (ПФДО) кирілче. Аны хоостыра р19.навигатор.дети сайтта палаларын пічікке кир салған іҷе-пабаларға сертификаттар пирілче. Полған на муниципалитетте аның ахча сині пасхалалча. Ол сертификатнаң тузаланып, іҷе-пабаа палазын пірее кружокка ахча тӧлебин ал чӧрерге оңдай пирілче.
Ол алызығлар республикадағы тиксі хоза ӱгредіге наа тыныс пирче. Амды полған на организация, олғаннарны позынзар тартып алар ӱчӱн, чиит тӧлге пӧзік качестволығ ӱгредіг пирерге кирек. Аннаңар республикада модельліг кін азыбызарға чарадығ алылған. Хайди таныхтапча регионның модельліг кінінің устағҷызы Евгения Комратова, мындағ кін тиктең нимес азылча, ол тиксі Хакасиядағы хоза ӱгредіг кіннерін піріктірер паза оларға туснаң тиңе хаалирға полызар.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде