«ПАБАМНАҢАР СӦЗІМ»
01.10.2021
Хабарлар
Хумартхылас. Пӱӱл 2 октябрьда минің пабам Георгий Сергеевич Кунучаковха 65 час толарҷых
Іди адалған пабамның 2012 чылда позының пабазынаңар, Сергей Николаевич Кунучаковтаңар, пасхан хабары.
Минің ағам Илбек Ада чаа араласчызы паза Слава орденінің толдыра кавалері полған.
Пылтыр ноябрь айда минің пабам, чабал ағырыға пастырып, чуртастаң парыбысхан. Аны амға теере чохсынчабыс, аар чобағ чӱреебістең ам даа сыхпаан. Сағынчазың, ноға ол чабал ағырығ пабама чух парған.
Ол ам даа чиит полған нооза. Іди ӧӧртін андағ ӱлӱс тӱскен полар чи?
Пабам, Георгий Сергеевич, 2 октябрьда 1956 чылда Таштып аймаандағы Пыдырах аалда тӧреен. Пабазы Сергей Николаевич паза іӌезі Аграфена Николаевна Кунучаковтар. Сӧбіреде пабам иң кічии полған. Аӌалары Семён, Михаил паза Олег кічіг харындастарын чахсы кӧрӌеңнер. Пабам оларға поғдархаӌаң. Олар, спортнаң айғазып, пӧзік чидіге читчеңнер. Харындастар ынағ ӧскеннер, баяннаң паза гитаранаң ойнирға хынӌаңнар. Соонаң прайзы, чыылызып, іӌелерінеңер сарын сарнаӌаңнар. Оларның паба-іӌезі чуртастаң иртӧк парыбысхан. Харындастар чахсы хоостаӌаңнар. Мин кічігде пабам пірее ӱлӱкӱннерге плакаттар тушь алай гуашь сырларнаң хоостапчатханын хынып кӧрӌең полғам. Ол чиит туста хоостар марығларында удаа араласчаң.
Чоохтапчалар нооза, таланттығ кізі пасха даа киректерде чайаачы хылыхтығ полча. Кунучаков харындастар ана андағ полғаннар. Паба-іӌезі, хазых полған полза, ӧс парған палаларына поғдархирӌых. Олар прайзы пӧзік ӱгредіг алғаннар. Минің пабам Хызылчардағы аал хонии институдын тоосхан. Ӱгредии соонаң ол тӧреен аалынзар айланған. Іӌемнең пабам пісті, ӱс паланы, часкалығ паза ынағ ӧскіргеннер. Соонаң олар пістің палаларыбысты ӧскірерге полысханнар. Чайғы тооза аалда чуртап, аға-ууӌазына иб аразында хайынарға полысчаңнар. Олар амға теере ағазынаң хада ниме-де пӱдіргенін сағысха чылығ кирчелер.
Пірсінде пабам, минің ағамны сағысха киріп, ол позының матыр чуртазынаң палаларына паза пархаларына чуртаста орта чолӌа хайди парарын кӧзіт салған тіп таныхтаан. Анаң піске прайзыбысха ол чолдаң хыйа парбасха кирек тіп хосхан. Пабам ағамның ол хыйға чооғынаң чуртаан, че, ачырғасха, хысха полған аның чуртас чолы. Ол ам даа піске паза чоныбысха кӧп тузалығ киректер ит саларӌых. Позынаң хада нинӌе пӧгінін, нинӌе сағызын ал чӧрібіскен...
Пілбинчем, нинӌе тус піс ол чобағны хада ал чӧрербіс, че пістің чӱреебісте пабабыстың чарых омазы хаӌанға даа халар!
Пабам ідӧк кибелістер пасчаң. Туған-чағыннарының тӧреен кӱннеріне алғыстас-кибелістер пасчаң. Мин, оларны хығырып, хайхаӌаңмын - хайдаң ол андағ килістіре паза сіліг сӧстер таап алча. Пабам, Таштып аймаандағы «Земля Таштыпская» газетада паза «Хакас чирі» республика газетазында тоғынып, хынығ хабарлар пасчаң. Кізілернің дее чоохтарынаң, аның статьялары оларның кӧңнілеріне кірӌен одыр. Кізілер, пабамзар киліп, постарының сағыссырастарынаң ӱлесчеңнер. Газетада ол хабарлар сых парза, киліп, алғыстаӌаңнар. Піс тее аның хабарларын газетада хығырып аларға чидікпин сағыҷаң полғабыс.
Мин часкалығбын, минің андағ паарсах чӱректіг паза чайаачы кӧңніліг пабам полғаннаңар. Ол піске чуртаста хаӌан даа хабас турған, часхарып, кирек сӧстер тапчаң. Анзы піске кӱс пирӌең паза чӱреебісті чылытчаң. Амды піс, аар даа полза, аарлығ пабабыс чох чуртирға кӧнікчебіс.
Халғанӌызында, мин килістіре кибеліс Интернетте таап, позым оңдайынӌа аны пас салғам.
Амды мин прай ниме оңнапчам,
Аар даа полза, чуртирға харасчам.
Пабама ідӧк ле тың хын парчам,
Матап-матап ағаа сағынчам.
Ол мағаа тіріг ле полча,
Чӱреем не тӧреміл ағырча.
Пабамны мин ис полбинчам,
Хаӌан килерін сахтап полбинчам.
Кӱннің сай мағаа аар полча,
Тустар даа аны имнебинче,
Чӱрек сорыбы пір дее иртпинче.
Мин позымнаң кӱресчем,
Піди ле пол турбас тіп сизінчем...
Прай нимее хол сабызарға,
Кӱлімзіреп, ибзер айланарға,
Прайзы часкалығлар анда,
Пабам тіріг! Оларнаң хада!
Автор :
Саяна БОРГОЯКОВА (КУНУЧАКОВА)
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде