Радиология корпузы тимге сых парир
05.10.2021
Хабарлар
Хакасия пазы Валентин Коновалов онкология диспансерiнiң радиология корпузының пӱдiриин сыныхтаан. Наа объект Ағбандағы Цукановтың орамазының 173 Б туразында орныхчатхан онкология диспансерi хыринда пӱт тее парды, аның улии 4300 квадрат метр. 1 миллиард азыра салковайға пӱдiрiлген корпус "Хазых хайраллиры" национальнай проектке кiрче.
- Пӱӱнгi кӱнде корпустың ибiркiзi иптелче, - чарытча регион пазы Валентин Олегович. - Октябрь айда имнег оборудованиелерi турғызылар: рентген аппарат, компьютернай томограф, МРТ паза пасхазы. Мебель кирiлер. Анаң корпус пастағы кiзiлернi имнирге тимде полар. Радиология - республикаа уғаа кирек объект. Хакасияның чуртағӌылары аның пӱдiриин чылларнаң сахтааннар. Амды пöзiк технологиялығ имнег полызии пiстiң республикада пирiл турар. Аннаң iдöк Тува Республиканың паза Хызылчар крайының чуртағӌылары тузаланарлар.
Подрядчик пӱдiрiг тоғызын тузында толдырча. Амды радиология корпузы 80%-ке тимде. Прай кирек чахсы парза, объект пӱӱл халғанӌы айларда iзиин азар. Чағдапчатхан 2022 чылның пастағы кӱннерiнде ол, кiзiлернi имнеп, толдыразынаң тоғынар.
Наа радиология корпузынзар хоза специалисттер алылар, ööнiнде физиктер. Олар ядернай радиологияны öтiре пiлерге киректер. Таныхтирға кирек, специалисттер тоғынарға тимделер, öнетiн ӱгредiглер ирткеннер. Iдöк радиология корпузында наа имӌiлер тоғынарлар. Специалисттерге чурт алылар. Аннаңар наа орында iстенӌең имӌiлер пар.
Наа объекттi кöрген соонаң Хакасия пазы Валентин Коновалов паза хазых хайраллаӌаң министр Олег Ананьевский корпус тастында клен ағастың хорбыларын одыртханнар.
Автор :
Татьяна Тютюбеева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы