ӦӦНІ - ОЛҒАННАРНЫ ОРТА ЧОЛҒА КӦСТИРІ
06.10.2021
Хабарлар
Ӱгретчі кӱні. 2020 чылдаң пасти Россияда «Земский учитель» программа тоғынча. Пӱӱл аны хоостыра Хакасияда ікі ӱгретчі Боград аймааның школаларынзар тоғынарға парды. Оларның пірсі математика ӱгретчізі Наталья Саражакова
Наталья Васильевна Знаменка аалдағы школада пір ай істен парир. Тӧреен-ӧскен чирі - Асхыс аал. Калининдегі ортымах школаны тоозып, ол Ағбандағы Н.Ф.Катановтың адының Хакас хазна университедінің математика паза информатика факультедінзер ӱгренерге кірген. Диплом холға алғанда, тӧреен чирінзер айланған. Асхыста паза аннаң ырах нимес ааллардағы школаларда специальнозы хоостыра тоғыс тілеп пастаан. Че ағаа оң полбаан. Анаң ол Асхыс аймаандағы ӱгредіг управлениезінзер айланған.
- Ӱгредіг управлениезі мині Писхамҷы поселоксар тоғынарға ысхан. Анда математика ӱгретчізі киректелчеткен. Тайғалығ аалда мин пастағызын на полғам, уғаа тирең хар чатхан. Таныстар, туған-чағыннар чоғыл, сала изі чох пілдірген. Чал ахчазы даа тӧбін полған, ағаа хоза чурт ӱчӱн тӧлирге кирек. Аалға паза тоғысха ӱр кӧнігерге киліскен, чазырбаспын - сах андох тизібізер сағыс полған. Че мағаа тоғыс кирек полған, аннаңар тыстанғам, тоғысха прай кӱзім салғам, - сағысха кирче ол.
Пір чыл пазынаң аның ӱгренген Калининдегі школазында математика ӱгретчізінің вакансиязы позып парған. Наталья Саражакова сах андох Писхамҷыдаң Калининзер килібіскен. Позының ӱгредіг организациязында ол 10 чыл істен салған.
Тӧреен-ӧскен аалы, школазы! Ноға ол тоғызын, чуртапчатхан орнын алыстырыбысхан полҷаң?
- «Земский учитель» программада араласхан ӱгретчілерге пір миллион салковай пирілче. Піс, тізең, Асхыста позыбысха тура пӱдірчебіс. Хорадығлар улуғ. Килкім кредит алай ба ипотека аларға чаратпаабыс. Аннаңар мин «Земский учитель» программада аралазарға сағыныбысхам, хонғаным мағаа хабасхан, - чооғын узаратча чиит ӱгретчі.
Таныхтирға кирек, Наталья Саражакованың хонғаны Виктор Куломаев ідӧк ӱгретчі полча. Знаменкада ирепчее оң полған, математика ӱгретчізінең пасха, анда ідӧк тархын паза обществознание ӱгретчізі киректелчеткен. Аннаңар Виктор Николаевичке школада ідӧк тоғыс табылған! Вакансия полғанда, ирепчі, ікінҷілебин, Знаменказар кӧскен. Оларның хызыҷаа пуох школада ӱзінҷі класста ӱгренче, кічии, тізең, аалдағы олған садынзар чӧрче.
- Минің кӧрізімнең, піске Знаменказар кӧзер прай чолыбыс азых полған. Пір дее андағ-мындағ тудығ чох полған, - кӧңнін чазырбинча ӱгретчі. - Аалзар пастағызын на килгенде, піске ӱс тура кӧзіткеннер. Піс иң иптігін таллап алғабыс. Чурт ээзі анда тикке чуртирға чаратхан. Ӧӧні -тураны арығ паза иптіг тудары.
Ирепчі Знаменкадағы школада 1 сентябрьдаң істен парир. Амды олар школанаң, ӱгретчілернең, ӱгренҷілернең чағын танысчалар.
- Школа ӧмезі пісті уғаа чылығ удурлаан. Олар школанаң, ӱгредіг программазынаң таныстырғаннар. Олох туста мағаа 5-ҷі класснаң устирға пиргеннер, хонғаныма - 6-ҷы классты. Ідӧк олар піске паза палаларыбысха чапсых сыйыхтар читіргеннер. Уғаа хайхастығ паза чӱрексіністіг, - тіпче Наталья Васильевна.
Чиит тоғынҷының клазында 24 пала. Полғанының на позының хылии, чидіглері паза сидіксіністері. Кем-де чахсы ӱгренче, кемге-де хоза полызығ киректелче. Наталья Васильевна полғанына ла хайығ айландырарға кӱстенче. Олар даа школазар наа ла килген ӱгретчее паарсапчалар.
- Ӱгренҷілер минзер киртініснең хайчалар, ӱгредіге теелбинчеткен сурығлар полза, айланчалар, чалтанминчалар. Мағаа оларның киртінізі уғаа аарлығ. Аннаңар мин полған на палаа хабас пирерге, аны истіп аларға харасчам, - тіпче ол.
Тӧреен чирімнеңер сағынарға, ирігерге тус чоғыл. Тоғыс уғаа кӧп! Иртен школаның иркінін алтабыссаңох, прай нимені чӱгӱрікнең идерге килісче - уроктар иртірері, класс журналларын толдырары, уроктағы нимес тоғыс апарары, сан пирістер идері, тетрадьтар сыныхтиры паза даа пасхазы. Ӧріндірче, школада олғаннар пис ле кӱн ӱгренчелер. Ікі кӱн ибде хайынар паза палаларға хайығ салар тус пар, - чооғын узаратча ол.
Прайзы пілче полар, ӱгретчінің тоғызы школада тоозылбинча. Оларға тоғысты удаа ибзер апарарға килісче, аннаңар пос палаларына тус асхынах полча. Сӧбіре тынағ кӱнінде тоғыснаң айғаспасха чӧптес салған. Олар удаа Асхыссар чӧрчелер, иб аразында ідӧк тоғыс табыл ла парча. Улам кічии 3 частығ Влада іҷе-пабазының хайиин кӱннің сай кирексіпче.
Знаменкадағы школада пис чыл тоғыныбысса, сӧбіре Асхыс чирінзер айланарға пӧгін тутча. Ол тусха программа хоостыра пирілген ахчаа тураны читіре пӱдірібізерге киректер.
- Чӧптезіг тоозылза, піс тӧреен чирібіссер айланарға сағынчабыс, че чуртаста хайдағ ла нимелер пол парбинча. Кем аны пілче? Итсе, пістің аалыбыста, Асхыста, килчеткен чылларда наа школа пӱдірілер. Айланзабыс, арса, анда піске тоғыс табыл парар, - хатхырча Наталья Саражакова.
Наа тоғыс орнында Наталья Васильевна паза Виктор Николаевич посты турыстыра кӧзідерге, пӧзік чидіглерге чидерге пӧгін тутчалар. Ідӧк ӱгретчілер олғаннарны аймах марығларда, мероприятиелерде аралазарға кӧӧктірер сағыс тутчалар.
Россияда «Земский учитель» программа ирткен чылда тоғынып пастаан. Пӱӱл программада пис ӱгретчі араласхан, ікізіне оң полған. Хайди чоохтапча Знаменкадағы ортымах школаның директоры Татьяна Спивак, школада математика ӱгретчізі хаҷанох киректелген.
- Амға теере уроктарны пістің ветеран ӱгретчілерібіс иртірҷеңнер. Пӱӱл піске оң полған тіп сағынчам. Амды пістің математика, тархын паза обществознание предметтерінең дее вакансиялар чабыл парған, - ӧрінче школа директоры.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы