СОМНАРДА ЧИРІБІСТІҢ СІЛИИ
06.10.2021
Хабарлар
Кӧзідіг. Пу кӱннерде Ағбанда Л.Р.Кызласовтың адынаң чир-суғ ӱгренҷең национальнай музейде «Ким суғ хазындағы Сибирь» сомнар кӧзідии азылған
Пу кӧзідігні тимнеен «Кимдегі Сибирь тилізінің корпорациязы» акционерлер пірігізі. Анда прай Сибирьдегі иң маңат сомҷыларнын 40 чайаачы тоғызы сығарыл парған. Ол ус сомчыларның аразында адирға чарир Сергей Филининні, Александр Куприяновты, Сергей Ноздринні, Александр Купцовты паза даа пасхазын.
Алып Ким суғ ӱс килкім регионны піріктірче: Хызылчар крайын, Хакас паза Тыва республикаларны. Чапсых полған кӧрерге Сергей Филининнің Ивановскай кӧллернің, Оңно тағларының Сундухтарының, Оғлах паза Типсей тағларның, Сойан-Сус ГЭС-тың сомнарын. Оларны пасха даа сомнарда паза хоостарда алында кӧр турған даа ползаң, че хатап-хатап кӧрерің килче.
Сомҷы Сергей Ноздрин, Тыва чирінҷе чӧріп, андағы сіліг чирлерні сомға суурып алтыр. Хайығ айландырчазың хомейҷінің омазына. Пӧзік хайада одыр салтыр тыва кип-азахтығ паза холында хомыс тудын салған улуғ частығ ирен. Амох ол, ибіркі сіліг чирлерні кӧріп, хомызынаң ойнап, тӧреен чирінеңер хайлап сығарға тӧӧй. Хости сомда тағлар аразында Тывада чуртапчатхан сарлыхтар алай ба яктар ӧӧрі оттап чӧрче.
Хызылчар крайының сіліг чирлерін піске кӧзіт пиргеннер сомҷылар Александр Куприянов, Александр Купцов паза пасхазы. Анда Ырғах тағларның чапсых орыннарын паза Порус тағның ах тигейлерін кӧріп аларға чарир.
Уғаа сіліг чирлер пістің! Тиктең нимес Ким суғзар паза Сойан тағларынзар сала чыл сай нимес тынанарға кил парчалар Россия президенті Владимир Путин паза Россияның арачыланыс министрі Сергей Шойгу. Хап-орта пу кӱннерде телевизорда кӧзіткеннер, хайди олар пазох Сойан-Сус заповедниктегі тайғаларда ӱс кӱнҷе тынан парыбысханнар. Пасха чирлердегі кізілер, телевизор кӧріп, пістің сіліг чирлерге чоо атаннаан поларлар. Соонаң пеер чир кӧрерге кил парарға кӱстенерлер.
Сомнар кӧзідиинде араласхан пістін республикадағы сомҷы ус Алексей Янгулов. Пу ирткен чайғызын мындох анын сомнарының улуғ кӧзідии полған. Ол ідӧк тӧреен чиріндегі чир-чайаанның сіліг орыннарын, андағы аң-хустарны сомға суурарға хынча.
Ам кӧзідіге сығарылған сомнар аразында аның хайиин тартхан аңнарны суурған сомнар. Кӧзідімге алза, пас париған абаны хайди чағыннаң сомға суурып алғанына чапсыпчатхан.
Пӱкӱлее алза, сомнар кӧзідии кізілерні, чир-чайаанның сілиин кӧріп, аны хайраллирға ӱгретче.
Пу чапсых кӧзідіг музейде пӱӱл 24 октябрьға теере тоғынар. Кірері тикке.
Автор :
Илья ТОПОЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы