ӰГРЕНҶІЛЕРНІҢ АЛҒЫСТАЗЫ - ИҢ ААРЛЫҒ СЫЙЫХ
08.10.2021
Хабарлар
Сыйыхтас. 5 октябрьда, Ӱгретчі кӱнінде, Хакасия пазы Валентин Коновалов тоғыста пӧзік чидіглерге читкен 29 ӱгретчее Аарластығ паза алғыстас пічіктерін читірген
КИБІР ХООСТЫРА ЧЫЛ САЙ ӰГРЕТЧІ КӰНІНДЕ ОЛҒАННАРҒА ПІЛІССЕР ЧОЛ АСЧАТХАН УЛУСТЫ ХАКАСИЯ ПРАВИТЕЛЬСТВОЗЫ ТУРАЗЫНДА СЫЙЫХТАПЧАЛАР. АНДА ТӰЗІМНІГ ТОҒЫНЧАТХАН ПАЗА КӦП ЧЫЛ ЧИИТ ТӦЛГЕ ТИРЕҢ ПІЛІСТЕР ПИРЧЕТКЕН ӰГРЕТЧІЛЕРНІ ЧЕЕСТЕПЧЕЛЕР. ПӰӰЛ ДЕЕ ПРАВИТЕЛЬСТВО ТУРАЗЫНДА ИҢ АРТЫХТАРНЫҢ АРТЫХТАРЫНА ПӦЗІК АТТАР ПАЗА ААРЛАСТЫҒ СЫЙЫХТАР ЧИТІРІЛГЕН.
Танығлығ кӱнде республика пазы Валентин Коновалов, ӱгретчілерзер айланып, оларға алғызын читірген:
- Аарлығ ӱгретчілер, ӱлӱкӱннең сірерні! Ӱгретчінің тоғызы республикаа, хазнаа улуғ тиліс пирче. Чуртас алызып одырча, ӱгретчілерге ідӧк аннаң хада алызарға килісче. Сірер, чуртас ағынындағы прай алызығларны сизініп, чиит тӧлні чахсыны паза хомайны кӧрерге ӱгрвтчвзвр.
Пӱӱн піс тоғыста пӧзік чидіглерге читкен ӱгретчілерге сыйыхтар читірчебіс. Ол сыйыхтар сірернің пӧзік тоғыстарыңның салтары полча. Хазых, часкалығ полыңар! Мыннаң мындар устарың уламох тиліп одырзын.
Пӱӱл ӱгредігде кӧп чыл тӱзімніг тоғын салған ӱчӱн «Хакасияның істеніс сабланызы» медальнаң Ағбандағы 22 № школаның кӧп чыл директоры полған Любовь Шишлянникова паза Хакасиядағы политехническай колледжтің директоры Николай Шелуха таныхтатханнар. Пӱӱнгі кӱнде 22 № школада национальнай класстар пар, хайда чиит тӧл, хакас тілін ӱгреніп, ідӧк пос чонының культуразынаң тирең танысча.
Николай Васильевич, политехническай колледжте директор полып, чииттерні тоғысчы профессиязар аарласнаң хайарға ӱгретче.
Ідӧк ол кӱн алты ӱгретчі «Хакасияның саблығ ӱгретчізі» атха турысхан: Асхыстағы лицей-интернаттың биология ӱгретчізі Наталья Сагатаева, Саяногорсктағы 7 № лицейнің пасха хан тіллері ӱгретчізі Тамара Артамонова, Ағбандағы Н.Г.Булакиннің адынаң лицейнің физика ӱгретчізі Александр Балакин, Таштыптағы 1 № школаның директоры Надежда Карпова, Ағбандағы гимназияның англия тілі ӱгретчізі Людмила Кондратенко, Харатастағы 19 № школаның орыс тілі паза литература ӱгретчізі Лариса Кульбашина.
Наталья Сагатаева Асхыстағы лицей-интернатта 1999 чылдаң сығара істен парча. Ол 22 чыл мының алнында ӱгретчі чолын пастаан. Наталья Кирилловнаның олғаннарнаң тоғынары кӧңніне кірче. Ол, полған на урокка чахсы тимненіп, ӱгренҷілерге тирең пілістер пирче.
- Школада 20 чыл азыра тоғын салған даа ползам, мағаа мындағ аарластығ ат пирілерін сағыбаан полғабын. Андағ атха школада миннеңӧк кӧп істен салған кізілер турысчалар тіп сағынғам. Пӱӱн мині таныхтааны - ол тоғызымны пӧзік паалааны. Минің илееде ӱгренҷім, биология предмедінең хазна сыныхтағларын тудып, имҷі профессиязын таллап алған. Пір туста Томсктағы имнег университедінде 1-ғы курстаң 6-ҷы курсха теере 50 ӱгренҷім пӧзік ӱгредіг алған. Ол минің тоғызымның иң чахсы кӧзідімі полча.
Паза, чазырбин чоохтаза, мындағ танығлығ кӱнде полған на ӱгретчее иң аарлығ сыйых - ӱгренҷілерінің алғыстазы. Олар пістің тоғызыбысты пӧзік паалааны піске «ханаттар» пирче тиирге чарир, - теен Наталья Кирилловна.
Асхыс аймаандағы Калининдегі школаның орыс тілі паза литература ӱгретчізі Галина Боргоякова кӧп чыл тӱзімніг тоғын салған ӱчӱн Аарластығ пічікнең таныхтатхан. Чоохтирға кирек, Калининдегі школада 39 чыл істен салған ӱгретчі он чыл мының алнында ідӧк «Хакасияның саблығ ӱгретчізі» атха турысхан. Илееде чыл чиит тӧлге піліссер чол азып, ӱгретчі кӧп паланы улуғ чуртассар ӱдескен. Амды олар ағаа чахсы пілістер пирген ӱчӱн алғыс читірчелер.
- Ирткен чылда минің 9-ҷы клазымдағы ӱгренҷілерім, хазна сыныхтағларын тудыбызып, андар-мындар тарасхлап парыбысханнар. Халған ӱгренҷілерні пасха класснаң піріктірібіскеннер. Амды класс устағҷызы пасха ӱгретчі полча. Че, ӧріністіг, олар мині ундутпинчалар. Киҷее минің палаларым минзер сыйыхтығ ааллап килгеннер. Оларның чылығ сӧстері мағаа хаҷан даа иң аарлығ сыйых полар, - чӱрексініп чоохтаан Галина Васильевна.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде