Хакас Республиканың пазы прокуратураның тоғызына чöпсiнминче
08.10.2021
Хабарлар
Хакасияның правительствозындағы коронавирустаң кӱрезерiнӌе штабтың теестегi чыылиинда регион пазы Валентин Коновалов республика прокуратуразына хазыр чоохтанған. Прокуратура республиканың юстиция министерствозына сизiндiрiг ыстыр, ол пу министерствода öнетiн тöстелген пöлiктең тоғыр полча. Андағ пöлiкке кiчiг паза ортын бизнестi наа эпидемиядаң тоғыр правилоларға хайди тудынчатханнарын сыныхтир полномочие пирiлтiр. Валентин Коновалов теен:
- Прокуратураның пiчиин алғабыс. Министрге сизiндiрiг ызылған, хайзында санитар-эпидемиология режимiн хайди сыныхтирынӌа законны сайбабасха тiп искiрiлче. Мағаа анзы пiлдiстiг нимес. Роспотребнадзор полған на сан пирiсте ағырчатханнарның саны öсчеткеннеңер, чуғынӌах тарапчатханнаңар, маска кис чöрер паза дезинфекция режимi сайбалчатханнаңар искiрче.
Олох туста Роспотребнадзорның пiчиин алғам. Ведомствоның устағӌызы пасча: маска паза дезинфекция режимiн, удур-тöдiр оортах тудынарын сыныхтағны регион, муниципальнай синде тыыдарға. Че прокуратура анзы сiрернiң полномочиелерiң нимес тiп искiрче. Пiлчем - аннаң Роспотребнадзор айғазарға кирек.
Прокуратураның кöрiзi пiр дее пiлдiстiг нимес. Алындағы кӱн федеральнай кiн штабында прай регионнарға пöгiн турғызылған: кирiлген хатығластарның толдырылчатханын сыныхтирға. Прокуратура пу нормаларны толдырӌаң хайдағ оңдайлар кöрче ни? Хаӌан пiс тоғынчатхан предприятие-организацияларны планда даа кöрiлбезе, сыныхтап полбинчабыс.
Хакасия пазы прокуратураның пiчiкте пазылған нандыриин штабтың пазағы чыылиинда сағыпчабыс теен. Iдöк прокуратура санитарнай имӌiлерге андағ сыныхтағларны иртiрерге чаратпинчаттыр . Пiлдстiг нимес, хайди муниципальнай органнар 102-ӌi чарадығны толдырарға киректер.
Хайди таныхтаан ол, имнег киреендегiлер прай кӱзiн салып тоғынчалар. Президенттiң паза федеральнай кiннiң чахығлары толдырылбаза, пiске ЧС режимiн, локдаун кирерге киректелер. Сағам пу сизiндiрiг чуғынӌахты тараттырбазынӌа сыныхтағны апарарға харығ полча.
Пiди ле полза, федеральнай штабсар Генпрокуратуразар айланарбыс, теен регион пазы. Пу сурығны хатап понедельникте ӱзӱрерлер.
Автор :
Инора Боргоякова
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы