ПИК ХУЙАХТЫҒЛАРНЫҢ СПОРТЫ
13.10.2021
Хабарлар
Триатлон. Хакасияда триатлонҷа спорт федерациязы тӧстелче
Кӧп оңдайлығ спорт кӧрімнері пурунғыдох аарласта полғаннар. Кӧзідімге, пурунғы гректер Олимп ойыннары тузында пентатлонда кӱстерін сынаӌаңнар. Андар чӱгӱріс, дискті паза чыданы тастиры, узунға сегірері, кӱрес кірӌең. Спортсменнер, марығларда аралазып, чаалазығларға тимненӌеңнер. Пӱӱнгі кӱнде кӧп оңдайлығ марығлар аймах спорт кӧрімнерінде пар. Спорт гимнастиказында ооллар устарын алты снарядта кӧзітчелер, хыстар - тӧрт. Биатлонисттер марығ тузында, саналығ чӱгӱріп, мылтыхтаң атчалар. Пис оңдайлығ спорт кӧрімін алынӌа таныхтирға кирек. Ол фехтование, конкур, суғӌа чӱзері, чӱгӱріс паза пистолеттең атары дисциплиналардаң пӱткен.
Триатлон ідӧк кӧп оңдайлығ спорт кӧрімі полча. Ол 1974 чылда США-да тӧстелген. Аннаң айғасчатханнар марығ тузында, пір дее тохтабин, пастап суғӌа чӱсчелер, анаң велосипедтіг ойлатчалар, халғанӌы кӧрім - чӱгӱріс. Пістің республикада триатлонда 15 кізі кӱзін сынапчаттыр. Оларның пірсі - В.И. Чарковтың адынаң олимп резерві спорт школазының методизі Олег Жданов. Хайди таныхтаан Олег Сергеевич, триатлон чиит спорт кӧрімі полза даа, тилекейде аннаң айғасчатханнарның саны илееде. Ол аймах дисциплиналарға чарылча. Чайғызын спортсменнер суғӌа чӱсчелер, велосипедтіг ойлатчалар паза чӱгӱрчелер. Хысхыдағы триатлонзар кросс, велосипедтіг ойладары паза саналығ чӱгӱрері кірче. Часхызын паза кӱскӱзін орындағы спортсменнер дуатлонда (чӱгӱріс + велосипедтіг ойладары + чӱгӱріс) кӱстерін сынапчалар. Аннаң пасха, акватлон, кросс-кантри триатлон, квадратлон пар.
Триатлонда тӧрт ӧӧн дистанция. Пастағызы «тимір» алай классика полча, аның тиксі узуны - 226 километр. «Тимір» дистанцияны иртіп, спортсменнер 3,8 километр суғӌа чӱсчелер, 180 километр велосипедтіг ойлатчалар паза 42,2 метр чӱгӱрчелер. 17 час аразына азах меетке сыххан три-атлет Ironman алай «Тимір кізі» атха турысча. Ікінӌі дистанция классикадаң ікі хати хысхаӌах: 1,9 км - 90 км
- 21 км. 2000 чылдаң триатлон Олимп ойыннарының программазына киріл парған. Тилекейнің иң улуғ марығлары тузында спортсменнерге 1,5 км чӱзерге, 40 км велосипедтіг ойладарға паза 10 км чӱгӱрерге киректелче. Иң хысхаӌах дистанция спринт адалча, аның тиксі узуны 25,75 километрге тиңнелче (0,75 км - 20 км - 5 км).
Триатлоннаң айғасчатханнарның сағынған сағызы - Ironman полары. Хакасиядағы спортсменнердең аймах чылларда ол атха алты кізі турыстыр: Александр Пцарев, Константин Овчарук, Сергей Еремчук, Александр Гетт, Андрей Балакирев паза Алексей Смокотнин. Олег Жданов чоохтапча:
- Пістiң арабыста профессионаллар чоғыл. Иң чиит спортсменге 30 час, иң улуғ араласчы 60 частығ. Алында прайзыбыс таа аймах спорт кӧрімнерінде кӱстерібіс сынаабыс. Константин Овчарук чиитте велосипедтіг ойладарынаң айғасхан, Александр Пцарев, мин паза Валерий Конгаров - саналығ чыларынаң. Конгаров тренер Валентина Зырянованьщ холында узын таптаан. Валентина Ивановна - саблығ Николай Сергеевич Швыдковтың ӱгренӌізі. Анаң велосипедтіг ойладарында кӱзін сынаан. Валерийнең часха тиң арахпыс, марығларға хада чӧрчебіс. 2019 чылда Сочиде ол, олимп дистанциязында аралазып, 55 - 60 частығларның аразында ӱзінҷі орынға сыххан.
Хакасиядағы триатлеттер аймах марығларда тӧреміл араласчаттырлар. Пӱӱл 4 сентябрьда Хызылчарда дуатлонӌа Россияның первенствозы ирткен. Анда пос кӧңнінең спортнаң айғасчатханнар кӱстерін сынааннар. Тиксі алза, 140 артиинаң кізі. Араласчылар пастап 5 километр чӱгӱргеннер, анаң 20 километр велосипедтіг ойлатханнар, халғанӌызын 2,5 километрге чӱгӱріс полған. Чир-суғӌыларыбыс постарын турыстыра кӧзіткеннер. Александр Пцаревнаң Константин Овчарук кӱмӱс медальлар холға киргеннер, Александр Гетт, Константин Скульский паза Валерий Конгаров ӱзінӌі орынға сыхханнар.
Хызылчар Сибирьдегі триатлонның кіні полча тиирге чарир. Тиктең нимес аның чуртағӌылары Дмитрий паза Игорь Полянскийлер тилекейнің иң чахсы триатлеттері санына кірчелер. Итсе-де, харындастарға Олимп ойыннарында пір дее оң полбинча. Пӱӱл Дмитрий Олимпиадада пизінӌі хати араласты, Игорь - тӧртінӌізін. Ағаа хоза Токиода марығлар тузында Игорь Полянскийнің допинг таап алғаннар. Амды ол ӱс чыл марығларда аралас полбас.
Олег Ждановтың чооғынаң, триатлоннаң айғазарға сағынчатханнарға чахсы велосипед, кроссовкалар, гидрокостюм аларға кирек. Триатлеттер бассейнде нимес, азых суғда марығласчалар. Марығ оңдайларынӌа суғ 22 градустаң соох полза, спортсменнер гидрокостюм кисчелер. Кирек спорт оборудованиезі аарлығ турчатса даа, аны садызып аларға чарир. 1990 чылларда триатлеттер аны таппин порастанӌаңнар одыр. Марығлар, тренировкалар тузында спортсменнер кӧп кӱс хоратчалар, аннаңар оларға ӧнетін чиис киректелче. Олег Сергеевич таныхтапча:
- Ахча саринаң хорадығлар илееде полза даа, триатлон кӧп ӧрініс ағылча. Спортсмен иң узун дистанцияны иртібіссе, позын сынап, «тимір кізее» санап сыхча. Аннаң пір дее ниме тиңнесполбас. Аннаңар тилекейде триатлоннаң айғасчатханнарның саны чылдаң чылға ӧсче.
Амды орындағы триатлеттер спорт федерациязын тӧстирінең айғасчалар. Оӧн пӧгін - республикада пу спорт кӧрімін тилідері. Тоғысты Александр Пцарев, Валерий Конгаров, Олег Жданов апарчалар. Оларға Константин Скульский полысча. Хакасияның спорт министерствозы хабазарға тимде. Федерация тоғынып пастаза, триатлонӌа секциялар азылар, марығлар тӧреміл ирт турар. Спортсменнер триатлон Хакасия чуртағӌыларының кӧңніне кірер тіп ікінӌілебинчелер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде