КЕМГЕ НАЛОГ ӦС ПАРАР?
13.10.2021
Хабарлар
Кӱн сурии. Хакасияда дача ээлеріне налог сині кӧдірілбес. Аннаңар чоохтаан Росреестрнің Хакасияҷа управлениезінің кадастр паалаа пӧлиинің ӧӧн специализі Светлана Жицкая
Халғанҷы туста Хакасияда чылдырылбинчатхан ис-пай ӱчӱн налог сині ӧс парған тіп искіріглер сыххан. Кемге налог сині кӧдірілгенін чарытча Светлана Александровна.
- Амды республиканың налог законодательствозы федеральнай налог кодексі хоостыра иптелче. Аны хоостыра пӱӱл пістің 73-ҷі законға алызығлар кирілгеннер. 2017 чылдаң пасти республика чуртағҷылары полған на объект ӱчӱн аның кадастр паазы хоостыра налог тӧлепчелер. Налог сині, тізең, юридическай лицоларға ла кӧдірілче. Пос киреенең айғасчатханнарға налогты тӧлирге сидік полбас ӱчӱн ол чардыхти кӧдірілче. Иң пастап налог «коммерческай», «административнай» паза «садығ» кӧрімніг объекттерге ӧскірілген. Пӱӱл, тізең, пасха объекттерге налог сині кӧдірілче, хайзылары ідӧк юридическай лицоларни полча. Ол, кӧзідімге, складтарға, гаражтарға, - таныхтаан Росреестр управлениезінің специализі Светлана Жицкая.
Мында салтар идерге чарир, налог сині кӧдірілгені олаңай чуртағҷыларға пір дее теелбинче. Олар налогты аннаң андар ис-пайның кадастр паазы хоостыра тӧлирлер. Юридическай лицоларға, тізең, ис-пайы ӱчӱн сала пӧзік налог тӧлирге килізер. Пу алызығны орындағы ӱлгӱ нимес, федеральнай кінде нинңе-де чыл мының алнында киріп пастааннар. Амды Хакасияның Ӧӧркі Чӧп депутаттары аны иптепчелер. Региондағы законодательство федеральнай законодательствонаң пасхалалбасха кирек нооза.
- Республикада юридическай лицоларға налог синін кӧдірерін ам на иптепчетселер, пістің хонҷых регионнарыбыс пу тоғысты хаҷанох толдыр салғаннар, - тіпче Светлана Жицкая.
Таныхтирға кирек, чылдырылбинчатхан ис-пайға налог ікі чардыхтаң пӱтче. Ол аның кадастр паазы паза налог ставказы. Пастағызы тӧрт чыл аразында пір хати алысча. Ис-пайның алай ба чир участогының паазы рыноктағы пааға тиңнелерге кӱстенче. Налог ставказы, тізең, чыл сай алысча. Аны муниципалитеттер постары алчалар, аннаңар полған на муниципалитета позының налог ставказы.
- Полған на кізее позының налог синін «Федеральная налоговая служба РФ» сайтта пос «кабинедінде» алай ба Хазна полызығлары сайтта таап аларға чарир. Кадастр номерінҷе ис-пайның кадастр паазын піліп аларға оңдай пар. Сірер ис-пайыңарның паазынаң чараспинчатсаңар, Росреестрнің Хакасияҷа управлениезінзер айланыңар. Піс полған на сурығ хоостыра істезіг апарчабыс. Мында даа сурығның узы-пазына сых полбазаңар, сірернің чарғызар алай ба комиссиязар айланар праволарың пар. Комиссия пар Хакасияның ис-пай паза чир хайызығлары министерствозында паза Росреестрнің Хакасияңа управлениезінде, - чооғын тоосхан специалист.
Пӱӱл Росреестрнің Хакасияҷа управлениезі республиканың аал хонии паза промышленность чирлерін ілезіне сығарарынҷа паза санға аларынҷа улуғ тоғыс апарғаннар.
Автор :
Оксана Сунчугашева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы